ខេត្តបាត់ដំបង ៖ សា.ក.ស.ព.ទារិកាម្នាក់ដែលទើបនឹងកើតត្រូវបានគេប្រទះឃើញច្រកថង់អណ្ដែតត្រសែតក្នុងដងស្ទឹងសង្កែ នៅម៉ោងប្រមាណ៨ព្រឹកថ្ងៃទី០៦ កុម្ភៈ នៅចំណុចក្បែរ«ផ្សារលើ» លុះនៅម៉ោង១និង១៥នាទីថ្ងៃដដែលនេះ ស្រាប់តែមានសាកសពបុរសម្នាក់ទៀតដែលគេមិនស្គាល់អត្តសញ្ញាណ ត្រូវគេប្រទះឃើញអណ្ដែតឡើងនៅក្នុងទឹកស្ទឹងសង្កែដែរ ត្រង់ចំណុច«វេទិការបុណ្យអុំទូក» ចំកណ្ដាលបេះដូងក្រុងបាត់ដំបងតែម្ដង ។
សមត្ថកិច្ចបាននិយាយថា សពទារិកាដែលគេសន្និដ្ឋានបានថា អាចទើបចាប់កំណើតមានអាយុត្រឹមប៉ុន្មានម៉ោងប៉ុណ្ណោះ ត្រូវមនុស្សតិរិច្ឆានច្រកថង់យកទៅបោះចោលក្នុងស្ទឹងសង្កែក្បែរ«ផ្សារលើ» ហើយត្រូវបានអ្នកលក់ត្រីក្បែរមាត់ស្ទឹង ក្រឡេកឃើញដែលគូរឲ្យសង្ស័យ ។ ក្រោយពីប្រទះឃើញស្បោងអណ្ដែតទឹកដ៏គូរឲ្យសង្ស័យ ពួកគេប៉ុន្មាននាក់ក៏ជិះទូកទៅស្រង់ថងនោះពិនិត្យមើល ស្រាប់តែឃើញសាកសពទារិកាត្រូវគេច្រកថង់បោះចោលក្នុងស្ទឹង បង្កឲ្យមានការភ្ញាក់ផ្អើលពេលផ្សារ ។
សមត្ថកិច្ចបានចុះពិនិត្យសពទារិការដ៏កំសត់នោះ ក្រោយអ្នកលក់ត្រីវស្រង់ចេញពីក្នុងស្ទឹង ។ គេសង្ស័យទារិការអភ័ព្វនោះ ទើបតែនឹងចាប់កំណើត មានអាយុត្រឹមប៉ុន្មានម៉ោងប៉ុណ្ណោះ ។ ប៉ុន្តែគេមិនទាន់ហ៊ានធ្វើការសន្និដ្ឋានបានថា តើទារិកានោះត្រូវគេសម្លាប់រួចចក្រថង់បោះចូលស្ទឹង ឬ ក៏ចាប់កំណើតមកភ្លាមស្លាប់ភ្លាមនោះទេ ? តែមន្ត្រីជំនាញបានពិនិត្យ និងធ្វើកោសល្យវិច័យយ៉ាងល្អិតល្អន់ ដើម្បីស្វែងរកប្រភព និងមូលហេតុ ។
ដោយឡែក សាកសពបុរសម្នាក់ ដែលគេមិនស្គាល់អត្តសញ្ញាណ ហើយត្រូវគេប្រទះឃើញអណ្ដែតទឹកស្ទឹងនៅក្បែរ «វេទិការអុំទូក» ទំនងក៏គេស្វែងរកប្រភព និងមូលហេតុមិនទាន់ឃើញដែរ ។ ប៉ុន្តែមានគេអះអាងថា បុរសនោះជាជនអាណាថា ត្រូវគេដឹកពីខេត្តផ្សេង មកព្រលែងចោលនៅក្នុងក្រុងបាត់ដំបង ។ សាក្សីដែលធ្លាប់ប្រទះឃើញជននេះបាននិយាយថា គេធ្លាប់ឃើញជននេះប៉ុន្មានថ្ងៃមុន ដើរឡើង ដើរចុះនៅម្ដុំ «វេទិការអុំទូក» នោះ ហើយពេលខ្លះឃើញដើរតាមមាត់ស្ទឹង ដូចមនុស្សមិនគ្រប់ទឹក។ ប៉ុន្តែគេមិនដឹងពីមូលហេតុ ដែលនាំឲ្យជននេះក្លាយជាសាកសពអណ្ដែតទឹកនោះទេ។
មន្ត្រីបច្ចេកទេស និងគ្រូពេទ្យបានចុះទៅកាន់កន្លែងកើតហេតុភ្លាមៗ ដើម្បីពិនិត្យសាកសព ។ សមត្ថកិច្ចបានឲ្យដឹងថា គេមិនឃើញមានស្នាកស្នាមដែលគូរឲ្យសង្ស័យនៅលើរាងកាយសាកសពទេ។ ហើយក៏ពុំមាននរណាស្គាល់ជនរងគ្រោះម្នាក់នេះដែរ ។ សមត្ថកិច្ចបានសន្និដ្ឋានជាបឋមថា ជនរងគ្រោះអាចចុះងូតទឹក ហើយលង់ស្លាប់យ៉ាងទិចកាលពី០២ថ្ងៃមុននេះ លុះនៅរសៀលថ្ងៃទី ០៦ កុម្ភៈ ក៏សាកសពអណ្ដែតឡើង។ ក្រោយពិនិត្យសពគ្រប់សមត្ថកិច្ចបានដឹកសាកសពទៅតម្កល់ទុកបណ្ដោះអាសន្ននៅក្នុងវត្ត ក្រែងមានសាច់ញាតិមកទទូលយកទៅធ្វើបុណ្យ៕
ចែករំលែកព័តមាននេះ