ខេត្តមណ្ឌលគិរី ៖ ផ្លូវជាតិលេខ៧៦ដ៏មានសក្តានុពល និងជាសរសៃឈាមសេដ្ឋកិច្ចដ៏សំខាន់បំផុតរបស់ខេត្តមណ្ឌលគិរី ដែលភ្ជាប់ពីផ្លូវជាតិលេខ៧ត្រង់ផ្លូវបំបែកស្រុកស្នួល ខេត្តក្រចេះ ភ្ជាប់ទៅផ្លូវជាតិលេខ៧៨ ត្រង់កែងបំបែកតាអង់ ខេត្តរតនគិរី ដែលមានប្រវែងប្រមាណជិតពីររយគីឡូម៉ែត្រ…
ខេត្តមណ្ឌលគិរី ៖ ផ្លូវជាតិលេខ៧៦ដ៏មានសក្តានុពល និងជាសរសៃឈាមសេដ្ឋកិច្ចដ៏សំខាន់បំផុតរបស់ខេត្តមណ្ឌលគិរី ដែលភ្ជាប់ពីផ្លូវជាតិលេខ៧ត្រង់ផ្លូវបំបែកស្រុកស្នួល ខេត្តក្រចេះ ភ្ជាប់ទៅផ្លូវជាតិលេខ៧៨ ត្រង់កែងបំបែកតាអង់ ខេត្តរតនគិរី ដែលមានប្រវែងប្រមាណជិតពីររយគីឡូម៉ែត្រ ហើយបានដាក់ឲ្យប្រើប្រាស់ជាផ្លូវការអស់រយៈពេលជាងដប់ឆ្នាំ គិតត្រឹមដើមឆ្នាំ២០២៥នេះ បានរងការខូចខាតដោយអន្លើៗតែត្រូវបានស្ថាបនានិងជួសជុលឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋ ជាពិសេសគឺភ្ញៀវទេសចរ និងដឹកកសិផលនានា ។
តាមចក្ខុវិស័យ របស់ប្រមុខរាជ រដ្ឋាភិបាល បានកំណត់យកខេត្តមណ្ឌលគិរី ជាតំបន់ប៉ូលសេដ្ឋកិច្ចទី៤ ក្នុងវិស័យ ទេសចរណ៍ បន្ទាប់ពីខេត្តដ៏ទៃនៅក្នុងតំបន់ ដើម្បីលើកស្ទួយនិងអភិវឌ្ឍន៍ខេត្តមណ្ឌលគិរី ឱ្យកាន់តែរីកចម្រើន ដូច្នេះគម្រោងជួសជុល កែលម្អ នៅតាមកំណាត់ផ្លូវជាតិ ផ្លូវខេត្តដែលមានស្រាប់ ឲ្យកាន់តែប្រសើរឡើង និងបន្តស្ថាបនាខ្សែផ្លូវឆ្ពោះទៅកាន់ច្រកទ្វារព្រំដែនទ្វេភាគីគឺជាករណីចាំបាច់បំផុត ។
លោក រស់ គីមធន ប្រធានមន្ទីរសាធារណៈការ និងដឹកជញ្ជូនខេត្តមណ្ឌលគិរី មានប្រសាសន៏ថា ដើម្បីធានាបានរាល់ការធ្វើដំណើររបស់ប្រជាពលរដ្ឋក្នុងមូលដ្ឋាន ជាពិសេសដំណើរការដឹកជញ្ជូនរាល់កសិផលរបស់ពុកម៉ែបងប្អូនប្រជាកសិករ ដែលកំពុងដល់រដូវប្រមូលផល ហើយមានតម្រូវការដឹកទំនិញទាំងនោះទៅកាន់ទីផ្សារទាន់ពេលវេលា ក្រុមការងារមន្ទីរសាធារណៈការខេត្ត យកចិត្តទុកដាក់ខិតខំស្តារឡើងវិញនូវកំណាត់ផ្លូវជាតិដែលរងការខូចខាតយ៉ាងសស្រាក់សស្រាំ។ លោក រស់ គីមធន បន្តថា សកម្មភាពរបស់ក្រុមការងារមន្ទីរសាធារណៈការខេត្តមណ្ឌលគិរី ដែលកំពុងស្តារផ្លូវជាតិលេខ៧៦នេះ គឺបានធ្វើចាប់ពីជិតព្រំប្រទល់រវាងខេត្តក្រចេះ រហូតដល់ទីប្រជុំជនស្រុកកែវសីមា ដោយអន្លើព្រោះមានកំណាត់ផ្លូវខ្លះនៅល្អស្អាត និងកំណាត់ផ្លូវខ្លះទៀតត្រូវជួសជុលបន្ទាន់។
ក្រៅពីកិច្ចការងារចំពោះមុខ មន្ទីរសាធារណៈការ បានខិតខំប្រឹងប្រែងធ្វើការថែទាំផ្លូវជាប្រចាំ និងជួសជុលនៅកំណាត់ផ្លូវដែលរងការខូចខាត ពិបាកដល់ការធ្វើដំណើរ និងដឹកជញ្ជូនរបស់ប្រជាពលរដ្ឋ និងការធ្វើដំណើររបស់ភ្ញៀវទេសចរណ៍ទៅកាន់ខេត្តមណ្ឌលគិរី ឲ្យកាន់តែមានភាពប្រសើរ ជាងមុន និងស្ថាបនា ស្ពានបេតុងថ្មី ជំនួសស្ពានដែកបេឡេត៍ចាស់ទ្រុឌទ្រោម រួមទាំងស្ថាបនាខ្សែផ្លូវឆ្ពោះទៅកាន់ច្រកទ្វាព្រំដែន និងតាមបណ្តាស្រុក ដោយកែលម្អរពីផ្លូវដីមានលក្ខណៈតូចង្អៀត និងពិបាកធ្វើដំណើរមកជាផ្លូវក្រាលកម្រាលកៅស៊ូ DBST មានលក្ខណៈងាយស្រួល ដល់ប្រជាពលរដ្ឋក្នុងការធ្វើដំណើរ និងដឹកជញ្ជូនកសិផលនានា។
តាមការបញ្ជាក់របស់លោក រស់ គីមធន ប្រធានមន្ទីរសាធារណៈការ និងដឹកជញ្ជូនខេត្តមណ្ឌលគិរី បានឲ្យដឹងថា ផ្លូវជាតិលេខ៧៦ត្រូវបានស្តារឡើងវិញ ដោយប្រើប្រាស់ថវិកាវិនិយោគក្នុងផែនការឆ្នាំ២០២៥ ចាប់ពីកំណាត់ផ្លូវ ចន្លោះគីឡូម៉ែត្រ ៤៩+០០០ ដល់ គីឡូម៉ែត្រ៥២ + 000 កំណាត់ទី២ចន្លោះគីឡូម៉ែត្រលេខ ៥៨ + ៤00 ដល់ ៦០ + ៣០០ និងទី៣ចន្លោះគីឡូម៉ែត្រលេខ ១៧០+000 ដល់១៧០ + ៦០០ ។មិនត្រឹមតែប៉ុណ្ណោះក្រុមការងារជំនាញមន្ទីរនៅបន្តសកម្មភាពថែទាំតាមចិញ្ចើមផ្លូវ លុបបំបាត់ក្រឡុក ក៏ដូចជាសម្អាតប្រឡាយអមសងខាងផ្លូវ និងកាត់ព្រៃ ស្មៅ ផងដែរ។
លោកប្រធានមន្ទីរសាធារណៈការ និងដឹកជញ្ជូនខេត្តមណ្ឌលគិរី ក៏បានសំណូមពរដល់បងប្អូនប្រជាពលរដ្ឋ សូមចូលរួមគោរពច្បាប់ចរាចរណ៍បើកបរដោយស្មារតីប្រុងប្រយ័ត្ន កុំបើកបរក្រោមឥទ្ធិពលគ្រឿងស្រវឹង បើកបរចេះយោគយល់អធ្យាស្រ័យគ្នា និងត្រួតពិនិត្យលក្ខណៈបច្ចេកទេសយានយន្តជាប្រចាំ ដើម្បីសុវត្ថិភាពក្នុងការបើកបររបស់ខ្លួនឯង និងអ្នកធ្វើដំណើរតាមដងផ្លូវទាំងអស់។
ហើយជាពិសេសក៏សូមស្នើសុំដល់ ក្រុមហ៊ុនដឹកជញ្ជូនទាំងអស់ ដែលប្រកបរបរដឹកទំនិញ ដឹកសម្ភារៈសំណង់ កសិផល ផ្សេងៗ កុំតទ្រុងកែច្នៃយានយន្តខុសលក្ខណបច្ចេកទេស ដឹកសំពីងសំពោង និងសូមកុំផ្ទុកលើសទម្ងន់កំណត់ ដែលធ្វើឲ្យផ្លូវឆាប់ទ្រុឌទ្រោម និងខូចខាតខាតបង់ថវិកាជាតិសម្រាប់ការជួសជុលផ្លូវឡើងវិញ ដោយបញ្ឈប់ការដឹកលើសទម្ងន់កម្រិតកំណត់ ដើម្បីធានាអាយុកាលយូរអង្វែងនៃផ្លូវថ្នល់ និងស្ពាន និងសូមប្រជាពលរដ្ឋ បញ្ឈប់ការរំលោភលើដីចំណីផ្លូវ ការចាក់ដីលើសពីកំពស់កម្រិតផ្លូវថ្នល់ ដែលធ្វើឲ្យទឹកដក់លើចិញ្ចើមផ្លូវខូចខាតទៅដល់តួផ្លូវជាដើម ៕
ចែករំលែកព័តមាននេះ