រាជធានីភ្នំពេញ ៖ គម្រោងស្តារហេដ្ឋារចនាសម្ព័ន្ធខ្នាតធំ របស់រដ្ឋបាលរាជធានីភ្នំពេញ ក្រោមការជួយឧបត្តម្ភពីរាជរដ្ឋាភិបាល ដើម្បីរំដោះការ ជន់លិច នៅតំបន់បឹងត្របែក ពិសេសតាមប្រឡាយ១០៥ ចាប់ពីក្រោយវិទ្យាល័យយុគន្ធរ…
រាជធានីភ្នំពេញ ៖ គម្រោងស្តារហេដ្ឋារចនាសម្ព័ន្ធខ្នាតធំ របស់រដ្ឋបាលរាជធានីភ្នំពេញ ក្រោមការជួយឧបត្តម្ភពីរាជរដ្ឋាភិបាល ដើម្បីរំដោះការ ជន់លិច នៅតំបន់បឹងត្របែក ពិសេសតាមប្រឡាយ១០៥ ចាប់ពីក្រោយវិទ្យាល័យយុគន្ធរ ដល់បឹងត្របែក ដែលធ្វើរយៈពេល៤ខែ សម្រេចបានលទ្ធផល ៦០% ហើយ នេះជាការបញ្ជាក់របស់លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ នាថ្ងៃទី២៩ ខែមករា ឆ្នាំ២០២៥ ។
លោកស្រី បន្តថា ប្រឡាយបឹងត្របែក បច្ចុប្បន្នមានទទឹងមធ្យម ៦ម៉ែត្រ ដែលមានសមត្ថភាពបង្ហូរទឹកត្រឹម ១២ម៉ែត្រគូប ក្នុង១វិនាទីប៉ុណ្ណោះ បណ្តាលឱ្យក្នុងពេលទឹកភ្លៀង ធ្លាក់ខ្លាំង លើសកម្ពស់ ៤០មម ក្នុង១ម៉ោង ទឹកភ្លៀងបានលិចលង់ រយៈពេលយូរ នៅផ្នែកខ្លះ នៃភូមិសាស្ត្រខណ្ឌបឹងកេងកង ចំការមន ៧មករា និងខណ្ឌដូនពេញ ។
លោកស្រីអ្នកនាំពាក្យ បញ្ជាក់ទៀតថា ដើម្បីដោះស្រាយបញ្ហាទឹកលិចខាងលើ ផ្លូវលេខ១០៥ ជាប់ប្រឡាយបឹងត្របែក ចាំបាច់ត្រូវពង្រីកពីទទឹង ៦ម៉ែត្រ ទៅទទឹង១២ម៉ែត្រ ដើម្បីឱ្យបង្កើនការបង្ហូរទឹកប្រឡាយនេះ ពី១២ម៉ែត្រគូប ក្នុង១វិនាទី កើនដល់ ២៤ម៉ែត្រគូប ក្នុង១វិនាទី ទើបបង្ហូរទឹកហូរទាន់ ក្នុងករណីនេះ ក្រោមផ្លូវលេខ១០៥ ជាប់ប្រឡាយនេះ ត្រូវដាក់លូប្រអប់ខ្នាតធំទទឹង ៦ម៉ែត្រ ជម្រៅ៣ម៉ែត្រ ឯខាងលើត្រូវស្ថាបនាផ្លូវដដែល ។
ជាមួយគ្នានេះដែរ អ្នកនាំពាក្យរូបនេះ បានរំលឹកណែនាំដល់អ្នកចូលចិត្តឃើញរូបភាពមិនដឹងខ្លឹមសារច្បាស់លាស់ ហើយផុស ដោយមិនបាន សួរនាំ ឬឆែករកប្រភពច្បាស់លាស់ បានបង្កឱ្យមានការភ័ន្តច្រឡំដល់មហាជន។ បើគ្រាន់តែ ចង់បានល្បីផេក វាអាចធ្វើឱ្យប៉ះពាល់ដល់ ស្ថាប័នកំពុងអនុវត្តគម្រោង និងអ្នកទទួលផល គឺប្រជាពលរដ្ឋ នៅតំបន់នោះ។ ផេកដែលបង្កើតបញ្ហានេះឡើង អាចប្រឈមនឹងផ្លូវច្បាប់ ៕
ចែករំលែកព័តមាននេះ