ខេត្តតាកែវ ៖ ផ្ទះឈើលើថ្មក្រោម១កន្លែង ត្រូវបានអគ្គិភ័យឆាបឆេះអស់ទាំងស្រុងទាំងព្រឹក ខណៈម្ចាស់បានចាក់សោចោលយកពងទាទៅលក់ ហើយក៏បានផ្ទុះសេខ្សែភ្លើង បណ្តាលអោយភ្លើងឆាបឆេះអស់គ្មានសល់ ។ ហេតុការណ៍នេះបានកើតឡើងនៅថ្ងៃទី៣០ ខែមករា…
ខេត្តតាកែវ ៖ ផ្ទះឈើលើថ្មក្រោម១កន្លែង ត្រូវបានអគ្គិភ័យឆាបឆេះអស់ទាំងស្រុងទាំងព្រឹក ខណៈម្ចាស់បានចាក់សោចោលយកពងទាទៅលក់ ហើយក៏បានផ្ទុះសេខ្សែភ្លើង បណ្តាលអោយភ្លើងឆាបឆេះអស់គ្មានសល់ ។ ហេតុការណ៍នេះបានកើតឡើងនៅថ្ងៃទី៣០ ខែមករា ឆ្នាំ២០២៥ វេលាម៉ោង០៨និង៣០នាទី ស្ថិតនៅភូមិគោករវៀង ឃុំស្រែរនោង ស្រុកត្រាំកក់ ខេត្តតាកែវ ។
លោកវរសេនីយឯកឌុក ធីយ៉ា អធិការនគរបាលស្រុកត្រាំកក់ បានអោយដឹងថា មានករណីអគ្គិភ័យមួយកើតឡើង បណ្តាលអោយឆេះផ្ទះមួយខ្នងទំហំ៨ម៉ែត្រ គុណនឹង៦ម៉ែត្រ ធ្វើអំពីឈើលើថ្មក្រោម ប្រកក្បឿង ឆេះទាំងស្រុង បណ្តាលអោយខូចខាតសម្ភារៈមួយចំនួន ។
ដោយឡែកសម្ភារៈដែលខូចខាត និងបាត់បង់មានដូចខាងក្រោម ៖
-ប្រាក់ខ្មែរចំនួន ០៣លានរៀល
-ប្រាក់ដុល្លារចំនួន ៦០០០ដុល្លារ
-មាសចំនួន ០៥ជី
-ផ្លាកទីន ចំនួន០៥ជី
-ពងទា ចំនួន១២០០០គ្រាប់
-ទូរទឹកកក ចំនួន០១គ្រឿង
-ទូរឈើ ចំនួន០១
-គ្រែចំនួន ០១
-គ្រែងឿ ចំនួន០១
-តុឈើ ចំនួន០១
ចំពោះឯកសារ សំលៀកបំពាក់ និងសម្ភារៈប្រើប្រាស់មួយចំនួន ។
លោកអធិការនគរបាលស្រុកបានបន្តទៀតថា ចំណែកម្ចាស់ផ្ទះមានឈ្មោះង៉ែត កែម ភេទស្រី អាយុ៥២ឆ្នាំ រស់នៅភូមឃុំខាងលើ ហើយ ករណីខាងលើនេះ មិនបណ្តាលអោយមានមនុស្សរងរបួស និងមិនរាលដាលដល់ផ្ទះអ្នកដទៃឡើយ ។
ក្នុងកិច្ចអន្តរាគមន៍កម្លាំងជំនាញអគ្គិភ័យនៃអធិការដ្ឋាននគរបាលស្រុកត្រាំកក់បានប្រើប្រាស់រថយន្តពន្លត់អគ្គិភ័យចំនួន០១គ្រឿងប្រើប្រាស់ទឹកអស់ចំនួន០១ធុងស្មើនឹង៦០០០លីត្រ(ប្រាំមួយពាន់លីត្រ) និងម៉ាស៊ីនបូមទឹកចំនួន០១គ្រឿង រហូតដល់ម៉ោង០៩និង៤០នាទីថ្ងៃខែឆ្នាំដដែល ទើបអគ្គិភ័យខាងលើរលត់ជាស្ថាពរ ។ ចំពោះមូលហេតុបណ្តាលមកពីឆ្លងចរន្តអគ្គិសនី ៕
ចែករំលែកព័តមាននេះ