បន្ទាយមានជ័យ ៖ រថយន្តបង្រៀនបើកបរឆ្លងចរន្តអគ្គិសនីឆាបឆេះម៉ាស៊ីន តែមិនបង្កគ្រោះថ្នាក់ដល់មនុស្ស ហេតុការណ៍នេះកើតឡើងនៅវេលាម៉ោង៩.១៥នាទីយប់ ថ្ងៃទី២៩ ខែមករា ឆ្នាំ២០២៥ នៅតាមបណ្តោយផ្លូវបេតុង ក្នុងភូមិសាមគ្គីមានជ័យ…
បន្ទាយមានជ័យ ៖ រថយន្តបង្រៀនបើកបរឆ្លងចរន្តអគ្គិសនីឆាបឆេះម៉ាស៊ីន តែមិនបង្កគ្រោះថ្នាក់ដល់មនុស្ស ហេតុការណ៍នេះកើតឡើងនៅវេលាម៉ោង៩.១៥នាទីយប់ ថ្ងៃទី២៩ ខែមករា ឆ្នាំ២០២៥ នៅតាមបណ្តោយផ្លូវបេតុង ក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
អ្នកឃើញហេតុការណ៍បានប្រាប់ថា ៖ ពេលកើតហេតុឃើញរថយន្តម៉ាកបាឡែន ពណ៌ទឹកប្រាក់ ពាក់ផ្លាកលេខ ភ្នំពេញ 2P-8323 ដែលជារថយន្តបង្រៀនបើកបរ «ដៃស័ក្តសិទ្ធិ» ធ្វើដំណើរពីជើងទៅត្បូងដល់កន្លែងកើតហេតុ ស្រាប់តែឃើញរថយន្តរលត់ទៅមុខមិនរួចនៅកណ្តាលផ្លូវ តែម្ចាស់មិនទាន់ចុះពីលើឡានទេ ស្រាប់តែមួយសន្ទុះក្រោយមក ឃើញហុយផ្សែងចេញតាមគម្របមុខឡានទើបផ្អើលឆោឡោស្រែកឲ្យគេជួយ ។
អ្នកឃើញហេតុការណ៍បញ្ជាក់ថា ៖ ក្រោយពេលកើតហេតុមិនបានប៉ុន្មាននាទីផង ស្រាប់តែសមត្ថកិច្ចចុះទៅដល់ភ្លាមៗជួយអន្តរាគមន៍ពន្លត់ និងឃើញមានរថយន្តពន្លត់អគ្គិភ័យខ្នាតតូចរបស់ក្រុមសង្គ្រោះបឋមទៅដល់ភ្លាមៗផងដែរ ជួយបាញ់ពន្លត់ រថយន្តឆេះអស់មួយផ្នែកខាងមុខ ហើយមិនបានបង្កឲ្យគ្រោះថ្នាក់ដល់មនុស្សនោះទេ ។
ប្រជាពលរដ្ឋសូមកោតសរសើរដល់អាជ្ញាធរ សមត្ថកិច្ចក្រុងប៉ោយប៉ែត រួមជាមួយក្រុមការងារសង្គ្រោះបឋមក្រុងប៉ោយប៉ែត ដែលតែងតែរួមសហការគ្នាបានយ៉ាងល្អ មកជួយអន្តរាគមន៍ប្រជាពលរដ្ឋបានទាន់ពេលវេលា ដូចជា ករណីគ្រោះថ្នាក់ជួយជនរងគ្រោះ គ្រោះថ្នាក់ចរាចរណ៍ អគ្គិភ័យឆាបឆេះផ្ទះ និងគ្រោះហានិភ័យផ្សេងៗទៀតផងដែរ៕
ចែករំលែកព័តមាននេះ