ខេត្តសៀមរាប ៖ ករណីផ្ទុះអធិករនៅក្នុងវត្តធម្មិស្សរារាម ក្នុងឃុំរលួស ហៅវត្តថ្មីជាលើកទី៣ ដែលមានទីតាំងស្ថិតក្នុងភូមិដូនទាវ ដោយមានការចូលរួមពីព្រះធម្មសិរី ជុំ គឹមឡេង ព្រះសុមង្គលសិលាចារ្យ…
ខេត្តសៀមរាប ៖ ករណីផ្ទុះអធិករនៅក្នុងវត្តធម្មិស្សរារាម ក្នុងឃុំរលួស ហៅវត្តថ្មីជាលើកទី៣ ដែលមានទីតាំងស្ថិតក្នុងភូមិដូនទាវ ដោយមានការចូលរួមពីព្រះធម្មសិរី ជុំ គឹមឡេង ព្រះសុមង្គលសិលាចារ្យ ព្រះមេគណខេត្តសៀមរាប, មេគណៈស្រុក, លោក វណ្ណ ប៊ុណ្ណា ប្រធានមន្ទីរធម្មការ និងសាសនា ខេត្តសៀមរាប និងមន្ត្រីសង្ឃ រួមនិងក្រុមការងារមន្ទីរ ព្រមទាំងអាជ្ញាធរមូលដ្ឋានគណៈកម្មាធិការវត្ត និងឧបាសក ឧបាសិកាជាច្រើននាក់ ដើម្បីចូលរួមពិភាក្សាគ្នារកដំណោះស្រាយឱ្យបានសមរម្យនៅក្នុងបរិវេណវត្តធម្មិស្សរាម ឃុំរលួស ហៅ.វត្តថ្មី នេះឱ្យមានភាពល្អប្រសើរឡើងវិញ ។
ក្នុងការជួបជុំគ្នានោះដែរ ប្រជាពលរដ្ឋខ្លះលើកឡើងថា សុំផ្លាស់ប្ដូរព្រះចៅអធិការវត្ត ព្រះនាម វ៉ន រា ចេញពីទីតាំងវត្តនេះ ដោយមានមូលហេតុថា ព្រះគ្រូ វ៉ន រា មានជំងឺសសៃប្រសាទ, ស្រោចទឹកជូន ប្រជាពលរដ្ឋក្នុងវត្ត និងយកអ្នកជំងឺមកមើលក្នុងវត្តខុស និងប្រជាពលរដ្ឋខ្លះទៀតលើកឡើងថា ចង់ឱ្យព្រះអង្គគង់ជាអធិការវត្តដដែល ។ ប៉ុន្ដែប្រជាពលរដ្ឋមួយក្រុមធំទៀតអះអាងថា ការចោទប្រកាន់នេះមិនត្រឹមត្រូវនោះឡើយ ពោលព្រះអង្គបានធ្វើកិច្ចការជាច្រើន នៅក្នុងបរិវេណវត្តធម្មិស្សរាម ឃុំរលួស ហៅ.វត្តថ្មី។ បន្ទាប់ពីផ្ទុះអធិករ មន្ទីរធម្មការ និងសាសនាខេត្តសៀមរាប និងអាជ្ញាធរបានសហការគ្នាចុះស្រាវជ្រាវ ប្រជុំពេញមួយព្រឹក កាលពីថ្ងៃទី២៦ ខែមករា ឆ្នាំ២០២៥ កន្លងទៅថ្មីៗនេះ ។
ក្នុងឱកាសនោះដែរ លោក វណ្ណ ប៊ុណ្ណា ប្រធានមន្ទីរធម្មការ និងសាសនាខេត្តសៀមរាប បានមានប្រសាសន៍ថា ដោយមានការចូលរួមពីសំណាក់ព្រះមេគណខេត្ត មេគណស្រុក និងមន្ត្រីសង្ឃ និងក្រុមការងារមន្ទីរ ព្រមទាំងអាជ្ញាធរមូលដ្ឋាន គណៈកម្មាការវត្ត និងឧបាសក ឧបាសិកា ជាច្រើននាក់ ដើម្បីចូលរួមពិភាក្សាគ្នារកដំណោះស្រាយឱ្យបានសមរម្យនៅក្នុងវត្តថ្មីនេះ ឱ្យមានភាពល្អប្រសើរឡើងវិញផងដែរ ព្រោះវត្តធម្មិស្សរាម ឃុំរលួស ហៅ.វត្តថ្មី នេះ លោកបានចុះមក សម្របសម្រួលជាលើកទី៣ហើយនៅក្នុងថ្ងៃនេះ ។
លោកបញ្ជាក់ថា លោកចុះមកពេលនេះ គឺមិនមែនជាអ្នកសម្រេចអ្វីនោះទេ គ្រាន់តែស្រាវជ្រាវឱ្យដឹងរឿងរ៉ាវតែប៉ុណ្ណោះ ដើម្បីយកទៅពិភាក្សាជាមួយ មេគណៈខេត្តនិងអភិបាលខេត្ត ។ រីឯការសម្រេចអ្វីនោះ គឺជាភារកិច្ចរបស់ព្រះសង្ឃ និងគណៈកម្មាការវត្ត ឧបាសក ឧបាសិកា ចំណុះជើងវត្ត ជាអ្នកបោះឆ្នោតជ្រើសរើសចៅអធិការវត្តដែលគេយល់ឃើញថា មានចរឹកលក្ខណៈត្រឹមត្រូវ។
គួរបញ្ជាក់ផងដែរថា វត្តធម្មិស្សរាម ឃុំរលួស ហៅ.វត្តថ្មី នៅភូមិដូនទាវ ឃុំរលួស ស្រុកប្រាសាទបាគង នេះគឺមានការផ្ទុះអធិកររាំរ៉ៃ ជាច្រើនឆ្នាំមកហើយ ដោយពុទ្ធបរិស័ទមួយ ចំនួន មិនពេញចិត្តនឹងចៅអធិការវត្តបច្ចុប្បន្ន ហើយពលរដ្ឋខ្លះក៏ពេញចិត្តចៅអធិការវត្តនេះដែរ។រីឯគណៈកម្មការវត្តក៏មិនសូវស៊ី សង្វាក់គ្នាដែរ។
ជុំវិញករណីខាងលើនេះដែរ ប្រជាពលរដ្ឋស្នើឱ្យអាជ្ញាធរមូលដ្ឋាននិងមន្ទីរពាក់ព័ន្ធព្រមទាំងមេគណខេត្ត មេគណស្រុក ជួយរកដំណោះស្រាយក្នុងវត្តថ្មី នេះផង ដើម្បីឱ្យមានសប្បុរសជនដែលចង់មកកសាងវត្តនេះឱ្យមានការរីកចម្រើនឡើងវិញផងដែរ៕
ចែករំលែកព័តមាននេះ