រាជធានីភ្នំពេញ ៖ នៅក្នុងប្រទេសកម្ពុជាសន្ទុះនៃការប្រើប្រាស់រថយន្តអគ្គិសនីកើតឡើងជាង៦០០% នៅឆ្នាំ២០២៤ និងមាននិន្នាការកើនឡើងនាឆ្នាំបន្តបន្ទាប់ ។ នេះបើតាមអ្នកនាំពាក្យក្រសួងសាធារណការនិងដឹកជញ្ជូន ។ លោកផន រឹម…
រាជធានីភ្នំពេញ ៖ នៅក្នុងប្រទេសកម្ពុជាសន្ទុះនៃការប្រើប្រាស់រថយន្តអគ្គិសនីកើតឡើងជាង៦០០% នៅឆ្នាំ២០២៤ និងមាននិន្នាការកើនឡើងនាឆ្នាំបន្តបន្ទាប់ ។ នេះបើតាមអ្នកនាំពាក្យក្រសួងសាធារណការនិងដឹកជញ្ជូន ។
លោកផន រឹម អ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងនៅថ្ងៃទី១៧ មករា ឆ្នាំ២០២៥ថា ឆ្នាំ២០២៤ មានរថយន្តអគ្គិសនី(EV) ចុះបញ្ជីសរុប២.២៥៣គ្រឿងកើនលើសឆ្នាំ២០២៣ ចំនួន៦២០% (ឆ្នាំ២០២៣ ចំនួន៣១៣គ្រឿង) ខណៈដែលត្រីចក្រយាន និងទោចក្រយានក៏មានការកើនឡើងផងដែរ ។
អ្នកនាំពាក្យបានលើកឡើងថា ប្រជាពលរដ្ឋមានសុទិដ្ឋនិយមច្រើន និងបង្ហាញការចាប់អារម្មណ៍ខ្ពស់ចំពោះការប្រើប្រាស់យានយន្តអគ្គិសនី ដែលជានិន្នការថ្មី បើប្រៀបធៀបជាមួយការប្រើប្រាស់យានយន្តប្រើប្រាស់ប្រេងឥន្ទនៈចំហេះក្នុងដែលជានិន្នាការចាស់ ។
ជាមួយគ្នានោះដែរ អ្នកនាំពាក្យក្រសួងសាធារណការក៏បានគូសបញ្ជាក់ថា ការប្រើប្រាស់យានយន្តអគ្គិសនីត្រូវបានគេមើលឃើញថា ចំណាយប្រចាំថ្ងៃតិច ,ផាសុភាព, កម្រិតបំពុលក្នុងបរិយាកាសទាបបំផុត ។
ក្រុមហ៊ុនយានយន្តខ្លះបានអះអាងពីកម្រិតនៃការបំភាយឧស្ម័នពុលកម្រិតសូន្យថែមទៀត ។ លោកបានបន្ថែមថា ទន្ទឹងនឹងនិន្នាការកើនឡើង រាជរដ្ឋាភិបាលនតាមរយៈក្រសួងសាធារណការ និងដឹកជញ្ជូន និងក្រសួងស្ថាប័នពាក់ព័ន្ធនានាបានប្រឹងប្រែងធ្វើឱ្យប្រសើរឡើងចំនួនស្ថានីយសាកអាគុយកាន់តែច្រើន និងលក្ខណ្ឌអំណោយផលផ្សេងៗទៀតកាន់តែប្រសើរ ៕
ចែករំលែកព័តមាននេះ