ខេត្តមណ្ឌលគិរី ៖ អភិបាលរងខេត្តមណ្ឌលគិរីទទួលបន្ទុកវិស័យកសិកម្ម បានដាស់តឿនដល់អាជីវករលក់ដូរផលិតផលកសិកម្មទាំងអស់ក្នុងខេត្ត ត្រូវមានភាពស្មោះត្រង់សម្រាប់អតិថិជន ដ្បិតបន្លែផ្លែឈើខេត្តមណ្ឌលគិរីមានកេរ្តិ៍ល្បីមានរសជាតិឆ្ងាញ់បែបធម្មជាតិកំពុងពេញនិយមរបស់មហាជន ដូច្នេះ បើមានបងប្អូននាំចូលបន្លែ ឬផ្លែឈើពីក្រៅប្រទេស ត្រូវបញ្ជាក់ជូនអ្នកទិញឲ្យបានច្បាស់ៗ…
ខេត្តមណ្ឌលគិរី ៖ អភិបាលរងខេត្តមណ្ឌលគិរីទទួលបន្ទុកវិស័យកសិកម្ម បានដាស់តឿនដល់អាជីវករលក់ដូរផលិតផលកសិកម្មទាំងអស់ក្នុងខេត្ត ត្រូវមានភាពស្មោះត្រង់សម្រាប់អតិថិជន ដ្បិតបន្លែផ្លែឈើខេត្តមណ្ឌលគិរីមានកេរ្តិ៍ល្បីមានរសជាតិឆ្ងាញ់បែបធម្មជាតិកំពុងពេញនិយមរបស់មហាជន ដូច្នេះ បើមានបងប្អូននាំចូលបន្លែ ឬផ្លែឈើពីក្រៅប្រទេស ត្រូវបញ្ជាក់ជូនអ្នកទិញឲ្យបានច្បាស់ៗ ដើម្បីពួកគាត់សម្រេចចិត្តទិញ ។
លោក ជាក់ ម៉េងហ៊ាង អភិបាលរងខេត្តមណ្ឌលគិរីមានប្រសាសន៍បន្តថា ខណៈតម្រូវការបន្លែផ្លែឈើដែលដាំដុះក្នុងទឹកដីខេត្តមណ្ឌលគិរីទទួលបានការបញ្ជាទិញច្រើន ការដាំដុះ និងការផ្គត់ផ្គង់មិនអាចឆ្លើយតបទៅតាមសេចក្តីត្រូវការ១០០%ទេ ។ អីុចឹងហើយ ក៏មានការនាំចូលបន្លែផ្លែឈើពីប្រទេសជិតខាង ដើម្បីបំពេញទីផ្សារបន្ថែមដែលសកម្មភាពនេះ ទាមទារឲ្យបងប្អូនអាជីវករទាំងអស់ត្រូវបង្ហាញពីភាពស្មោះត្រង់របស់ខ្លួន ដើម្បីរក្សាមុខមាត់ និងកេរ្តិ៍ឈ្មោះបន្លែផ្លែឈើធម្មជាតិមណ្ឌលគិរី ។
លោក ជាក់ ម៉េងហ៊ាង បន្តថា នៅពេលដែលអ្នកលក់មានភាពស្មោះត្រង់ជាមួយអថិតិជនរបស់ខ្លួនដោយបញ្ជាក់ពីប្រភពបន្លែឬផ្លែឈើបានត្រឹមត្រូវ គឺវាមានភាពងាយស្រួលដល់អ្នកទទួលទានសម្រេចចិត្តក្នុងការទិញផលិតផលណាមួយទៅតាមតម្រូវការ ឬលទ្ធភាពរបស់ខ្លួន ។ ចំណុចនេះ ក៏បានជួយការពារកិត្តិនាមផលិតផលកសិកម្មរបស់ខេត្តមណ្ឌលគិរី ពីការក្លែងបន្លំពីឈ្មួញខិលខូចដែលនាំចូលបន្លែផ្លែឈើពីប្រភពខាងក្រៅថា ដាំដុះលើទឹកដីខេត្តមណ្ឌលគិរីផ្ទាល់ ដែលអាចនាំឲ្យខូចឈ្មោះនៅថ្ងៃក្រោយ។
យោងតាមរបាយការណ៍លោក សុង ឃាង ប្រធានមន្ទីរកសិកម្មខេត្តមណ្ឌលគិរី នាឆ្នាំ២០២៤ កន្លងនេះ បានឲ្យដឹងថា ដំណាំសាកវប្បកម្ម បន្លែ ល្ហុង ឪឡឹក ម្នាស់ ស្វាយ ទុរេន ប័រ ក្រូចវល្លិ៍ និងស្រកានាគ អនុវត្តបានសរុបចំនួន២៤១២ហិកតា កើនលើសឆ្នាំ២០២៣ចំនួន៦៣ហិកតា ផ្ទៃដីប្រមូលផលសរុបបាន ២២២១ហិកតា កើនលើសឆ្នាំមុន៩១ហិកតា ទិន្នផលមធ្យម១២,៤៣០តោន/ហិកតា បរិមាណផលសរុប២៧៦០៨តោន ។
ចំណែកដំណាំឧស្សាហកម្ម (ដំឡូងមី សណ្តែកបាយ សណ្តែកដី ស្វាយចន្ទី ចេក ដូង ម្រេច កាហ្វេ កាកាវ ម៉ាកកាដាមៀ) ផ្ទៃដីអនុវត្តបានសរុប៤៥៨៩៩ហិកតា កើនលើសឆ្នាំមុន៤២៨២ហិកតា ផ្ទៃដីប្រមូលផលសរុប៤១ ៥០៤ ហិកតា កើនលើសឆ្នាំមុន ៤ ៤១៩ ហិកតា ទិន្នផលមធ្យម ១០,០៨៦ តោន/ហិកតា បរិមាណផលសរុបចំនួន ៤១៨ ៦១៣ តោន៕
ចែករំលែកព័តមាននេះ