រាជធានីភ្នំពេញ ៖ នគរបាលខណ្ឌ ៧មករា បានបញ្ជូនជនសង្ស័យចំនួន០៥នាក់ ទៅកាន់តុលាការ បន្ទាប់ពីធ្វើសកម្មភាពលួចយ៉ាងសកម្ម និងកាន់កាប់អាវុធ ដោយខុសច្បាប់ ។…
រាជធានីភ្នំពេញ ៖ នគរបាលខណ្ឌ ៧មករា បានបញ្ជូនជនសង្ស័យចំនួន០៥នាក់ ទៅកាន់តុលាការ បន្ទាប់ពីធ្វើសកម្មភាពលួចយ៉ាងសកម្ម និងកាន់កាប់អាវុធ ដោយខុសច្បាប់ ។
នាព្រឹកថ្ងៃទី០៦ ខែធ្នូ ឆ្នាំ២០២៤នេះ មុនការបញ្ចូនខ្លួនទៅកាន់តុលាការ នគរបាលខណ្ឌ ៧មករា ក៏បានធ្វើការបង្ហាញមុខ ក្រុមជនសង្ស័យជាសាធារណៈ ផងដែរ ។
លោកវរសេនីយ៍ទោ វ៉ាន រតនា អធិការរងនគរបាលខណ្ឌ ៧មករា បានឲ្យដឹងថា ជនសង្ស័យទាំងនេះ គឺជាមុខសញ្ញាលួចយ៉ាងសកម្ម និងកាន់កាប់អាវុធដោយខុសច្បាប់។ ហើយក្រុមនេះ ធ្វើសកម្មភាពពេលយប់ ដោយប្រើប្រាស់រ៉ឺម៉កម៉ូតូ ជិះចល័ត លួចទ្រព្យសម្បត្តិរបស់ប្រជាពលរដ្ឋ គ្រប់ប្រភេទ និងមានសម្ភារៈ ដូចជា ៖ កន្ត្រៃកាត់ដែក កូនសោកាច់ក និងកាំបិត ផងដែរ ។
ប្រភពដដែលបន្តថា មុនឈានដល់ការឃាត់ខ្លួន កម្លាំងជំនាញ នៃអធិការដ្ឋាននគរបាលខណ្ឌ ៧មករា សហការជាមួយនិងកម្លាំងនគរបាលប៉ុស្តិ៍ទាំង៨ បានល្បាតពួនស្ទាក់ នៅក្នុងមូលដ្ឋាន ដើម្បីរក្សាសន្តិសុខសុវត្ថិភាពជូនប្រជាពលរដ្ឋ ខណៈកំពុងជិះល្បាតក្នុងមូលដ្ឋាន នៅផ្លូវលេខ៣៣៦ នៅសង្កាត់វាលវង់ ខណ្ឌ៧មករា ក៏ប្រទះឃើញក្រុមជនសង្ស័យ ចំនួន០៥នាក់ កំពុងជិះម៉ូតូរ៉ឺម៉ក ធ្វើដំណើរ ដោយមានការសង្ស័យ ទើបសមត្ថកិច្ច ធ្វើការឃាត់សួរនាំ និងឆែកឆេរឃើញមានសម្ភារៈមួយចំនួន សម្រាប់ធ្វើសកម្មភាពផងដែរ ទើបសមត្ថកិច្ចឃាត់ខ្លួនជនសង្ស័យទាំង៥នាក់ នាំខ្លួនមកអធិការដ្ឋាននគរបាលខណ្ឌ ៧មករា ។
សមត្ថកិច្ច ដកហូតវត្ថុតាង រួមមាន ៖ កាំបិតសាំងគីម ចំនួន១ដើម, រណាអារដែក, ដង្កាប់ដងជ័រ ពណ៌ក្រហម និងខ្មៅ,កន្ត្រៃកាត់ខ្សែភ្លើង, កន្ត្រៃកាត់ដែក, ដែកលួសសម្រាប់ឆ្កឹះសោ, ដែកចុងស្រួច ដងឈើ, ដែកឆាបចុងស្រួច ចំនួន២ និងក្រាមសថ្លា ១កញ្ចប់តូច និងឧបករណ៌ប្រើប្រាស់សារធាតុញៀន ។
សូមបញ្ជាក់ថា ពាក់ព័ន្ធនឹងការបង្ក្រាបបទល្មើសនេះដែរ កន្លងទៅ លោក ថេង សុថុល អភិបាលខណ្ឌ និងជាប្រធានគណៈបញ្ជាការឯកភាពខណ្ឌ តែងបានក្រើនរំលឹក និងចង្អុលបង្ហាញជាបន្តបន្ទាប់ ទៅកាន់សមត្ថកិច្ចទាំង០២ ប្រភេទ ឱ្យបង្កើន នូវការយកចិត្តទុកដាក់ខ្ពស់បំផុត លើកិច្ចការងារសន្តិសុខ ទាំងការបង្ការទប់ស្កាត់ និងបង្ក្រាបរាល់បទល្មើសតូចធំទាំងអស់ ក្នុងមូលដ្ឋាន ក្នុងគោលដៅធានាបានសន្តិសុខ សុវត្ថិភាពជូនប្រជាពលរដ្ឋ ឱ្យបានល្អប្រសើរបំផុត ៕
ចែករំលែកព័តមាននេះ