ទីក្រុងរ៉ង់ហ្គូន៖ ពួកឧទ្ទាមដ៏ធំមួយនៅប្រទេសភូមាប្រកាសពីការត្រៀមខ្លួនចូលតុចរចាដើម្បីបញ្ចប់សង្គ្រាម។ ក្រុមដែលហៅខ្លួនឯងថាកងទ័ពរំដោះជាតិតាអាង (The Ta’ang National Liberation Army) មានកងទ័ពសរុប៧ពាន់នាក់។ ពួកគេបន្តប្រយុទ្ធប្រឆាំងនឹងរដ្ឋអំណាចនៅភូមាអស់រយៈពេលជាងមួយទសវត្សមកហើយដើម្បីទាមទារស្វ័យភាពសម្រាប់រដ្ឋសាន។…
ទីក្រុងរ៉ង់ហ្គូន៖ ពួកឧទ្ទាមដ៏ធំមួយនៅប្រទេសភូមាប្រកាសពីការត្រៀមខ្លួនចូលតុចរចាដើម្បីបញ្ចប់សង្គ្រាម។ ក្រុមដែលហៅខ្លួនឯងថាកងទ័ពរំដោះជាតិតាអាង (The Ta’ang National Liberation Army) មានកងទ័ពសរុប៧ពាន់នាក់។ ពួកគេបន្តប្រយុទ្ធប្រឆាំងនឹងរដ្ឋអំណាចនៅភូមាអស់រយៈពេលជាងមួយទសវត្សមកហើយដើម្បីទាមទារស្វ័យភាពសម្រាប់រដ្ឋសាន។
កាលពីខែតុលា ឆ្នាំ២០២៣ ចលនានេះ និងពួកឧទ្ទាម២ក្រុមទៀតបានរួមកម្លាំងគ្នាវាយប្រហារទៅលើមូលដ្ឋានរបស់របបសឹកលោកមីនអុងឡាំង។ ពួកគេវាយដណ្ដើមបានទីតាំងមួយផ្នែកនៅរដ្ឋសាន។ នៅក្នុងនោះក៏មានតំបន់សម្បូររ៉ែត្បូងទទឹម និងច្រកផ្លូវពាណិជ្ជកម្មជាមួយប្រទេសចិនផងដែរ។ ក្រោយមក របបសឹកបានបាញ់ប្រហារទៅលើទីតាំងដែលបាត់បង់នោះដោយកាំភ្លើងធំ និងយន្តហោះចម្បាំង។ ប៉ុន្តែពួកគេពុំសូវវាយប្រហារដោយកងទ័ពជើងគោកនៅក្នុងទ្រង់ទ្រាយធំនោះទេ។
ចលនាឧទ្ទាមតាអាងបានប្រកាសតាមតេឡេក្រាមថាខ្លួនត្រៀមជួបចរចាគ្នាដើម្បីបិទបញ្ចប់ជម្លោះប្រដាប់អាវុធនេះ។ ពួកគេអះអាងការប្រយុទ្ធគ្នាកាលពីពេលកន្លងមកបានត្រឹមតែធ្វើឱ្យប្រជាជនរងគ្រោះតែប៉ុណ្ណោះ។ ប៉ុន្តែទន្ទឹមនឹងការត្រៀមចរចាគ្នានេះ ពួកគេក៏សូមរក្សាសិទ្ធិធ្វើសង្គ្រាមជាបន្តទៀតដើម្បីការពារតំបន់កាន់កាប់របស់ខ្លួន។ យើងត្រៀមជជែកគ្នា ប៉ុន្តែយើងមិនបោះបង់ចោលតំបន់ឈរជើងរបស់យើងជាដាច់ខាត។ នេះជាអ្វីដែលមេបញ្ជាការកងទ័ពតាអាង ឧត្ដមសេនីយ៍ថាប៊ុនណេខ្យាវថ្លែងប្រាប់អ្នកសារព័ត៌មាន។
គួរកត់សម្គាល់ថាការដែលពួកឧទ្ទាមតាអាងបោះដៃទៅរកការចរចាគ្នានេះធ្វើឡើងបន្ទាប់ពីរបបសឹកលោកមីនអុងឡាំងកាលពីខែកញ្ញាបានអំពាវនាវឱ្យគូបដិបក្ខទាំងអស់ដែលកំពុងតែប្រយុទ្ធប្រឆាំងយ៉ាងស៊ីសាច់ហុតឈាមនៅក្នុងព្រៃសូមងាកមករកតុចរចាវិញ។ ក្រុមអ្នកវិភាគជឿជាក់ថារដ្ឋាភិបាលចិនទំនងជាបានដាក់សម្ពាធទៅលើក្រុមឧទ្ទាមតាអាង និងកងទ័ពសម្ព័ន្ធជាតិប្រជាធិបតេយ្យដែលជាសម្ព័ន្ធមិត្តរបស់ក្រុមនេះដើម្បីផ្អាកយុទ្ធនាការសង្គ្រាមរបស់ខ្លួនប្រឆាំងនឹងរបបសឹក។
ប្រទេសចិនមានទំនាក់ទំនងល្អជាមួយរបបសឹកនៅណៃពិដោរ និងជាមួយពួកឧទ្ទាមនៅរដ្ឋសាន។ ចិនតែងតែអំពាវនាវឱ្យបញ្ឈប់ការប្រយុទ្ធគ្នានៅរដ្ឋសានដែលជាច្រកផ្លូវដ៏សំខាន់សម្រាប់តភ្ជាប់គម្រោងអភិវឌ្ឍផ្លូវ និងខ្សែក្រវាត់តម្លៃរាប់ទ្រីលានដុល្លារ។ នៅក្នុងសេចក្ដីថ្លែងការណ៍របស់ខ្លួនកាលពីថ្ងៃចន្ទ កងទ័ពតាអាងសូមគោរព និងទទួលស្គាល់ថារដ្ឋាភិបាលចិនពិតជាបានខិតខំប្រឹងប្រែងដើម្បីធ្វើឱ្យមានស្ថិរភាពនៅតាមព្រំដែន និងដើម្បីបិទបញ្ចប់អរិភាពនៅក្នុងចំណោមភាគីជម្លោះ៕
ចែករំលែកព័តមាននេះ