រាជធានីភ្នំពេញ ៖ បុរសម្នាក់ផឹកស៊ីស្រវឹង បើកបរទៅផ្ទះមិនរួច ក៏ឈប់ម៉ូតូដេកតាមផ្លូវ ត្រូវជនសង្ស័យយកម៉ូតូទៅបាត់ស្រមោល ​កាលពី​វេលាម៉ោង១២និង២០នាទីរំលងអាធ្រាត្រ​ឈានចូលថ្ងៃ២៦​ខែវិច្ឆិកា ឆ្នាំ​២០២៤ ស្ថិតនៅតាមបណ្ដោយផ្លូវបេតុង ភូមិក្បាលដំរី២ សង្កាត់កាកាបទី២ ខណ្ឌពោធិ​សែន​ជ័យ រាជធានីភ្នំពេញ ។

តាម​ប្រភពព័ត៌មានបញ្ជាក់ពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនកើតហេតុ គេឃើញបុរសរងគ្រោះជិះម៉ូតូមួយគ្រឿងម៉ាកស៊ុយស៊ូគីនិច ដោយមិនចាំស្លាកលេខនោះទេ ធ្វើដំណើរមកដល់ចំណុចខាងលើ ស្រាប់តែឈប់ម៉ូតូរួចហើយបានទៅប្រាសខ្លួនដេកលង់លក់នៅលើចិញ្ចើម​ខឿនមុខផ្ទះសំណាក់ យីហោ លាភហេង លុះក្រោយមកក៏មានជនសង្ស័យប្រុសស្រីពីរនាក់ដើរមកដល់ឃើញឱកាសល្អបានយកទូរស័ព្ទនិងម៉ូតូជិះចេញទៅបាត់ស្រមោលពីកន្លែងកើតហេតុ បន្ទាប់មកប្រជាពលរដ្ឋឃើញដូច្នេះក៏នាំគ្នារាយការណ៍ទាក់ទងទៅសមត្ថកិច្ចមូលដ្ឋានភ្លាមៗ។

ក្រោយពេលកើតហេតុ បន្ទាប់ពីកម្លាំងសមត្ថកិច្ចមូលដ្ឋានចុះមកដល់ដាស់សួរនាំរួចហើយនាំយកទៅប៉ុស្តិ៍ដើម្បីទាក់ទងទៅក្រុមគ្រួសារអោយមកទទួលយកផ្ទះវិញ ៕