ទីក្រុងម៉ូស្គូ៖ រុស្ស៊ីលើកនេះលេងដៃធ្ងន់បន្តិចហើយ ប្រើសុទ្ធតែមីស៊ីលអន្តរទ្វីប (ICBM) បាញ់ចូលទឹកដីអ៊ុយក្រែននៅថ្ងៃព្រហស្បតិ៍។ នេះបើយោងតាមការបង្ហើបឱ្យដឹងពីកងទ័ពអាកាសអ៊ុយក្រែន។ មានន័យថានេះជាលើកដំបូងបំផុតដែលរុស្ស៊ីប្រើអាវុធដ៏មានអានុភាពខ្លាំងក្លាដល់ថ្នាក់នេះវាយប្រហារទៅលើប្រទេសដែលមានកម្លាំងទន់ខ្សោយជាងខ្លួនដូចជាអ៊ុយក្រែន។ គេដឹងថាគ្រាប់មីស៊ីលនោះអាចបំពាក់ក្បាលគ្រាប់នុយក្លេអ៊ែរបាញ់បានឆ្ងាយៗដល់រាប់ពាន់គីឡូ ឬជាងមួយម៉ឺនគីឡូម៉ែត្រ។
កាលពីមុននេះ អ៊ុយក្រែនទើបតែបាញ់មីស៊ីលរបស់អាមេរិកម៉ាក់អាត់តាខំ (ATACMS) ៨គ្រាប់ដើម្បីកម្ទេចឃ្លាំងអាវុធរបស់រុស្ស៊ីដែលស្ថិតនៅចម្ងាយជាង១០០គីឡូម៉ែត្រ។ មានន័យថាជាការវាយប្រហារឆ្ងាយៗចូលទឹកដីរុស្ស៊ីជាលើកដំបូងដោយមីស៊ីលរបស់អាមេរិកបន្ទាប់ពីទទួលបានសញ្ញាភ្លើងខៀវពីលោកបៃដិន។ ក្រោយមក រុស្ស៊ីព្រមានវាយបកវិញ។ សូម្បីតែស្ថានទូតអាមេរិកនៅទីក្រុងកៀវត្រូវបង្ខំចិត្តបិទទ្វារបន្ទាប់ពីទទួលបានសារសម្ងាត់ថាទីនេះអាចរងការវាយប្រហារតាមអាកាស។
ក្រុមអ្នកជំនាញខាងសន្តិសុខជាតិថ្លែងថាបើរុស្ស៊ីបានបាញ់មីស៊ីលអន្តរទ្វីបដូចការអះអាងនេះពិតមែន គេអាចចាត់ទុកថានេះជាករណីដំបូងបំផុតដែលប្រទេសមហាអំណាចមួយដូចជារុស្ស៊ីយកអាវុធដ៏មានអានុភាពខ្លាំងក្លាមកប្រើប្រាស់នៅក្នុងសមរភូមិជាក់ស្ដែង។ មីស៊ីលអន្តរទ្វីបបំពាក់ក្បាលគ្រាប់នុយក្លេអ៊ែរនេះក៏ជាអាវុធយុទ្ធសាស្ត្រដ៏សំខាន់របស់រុស្ស៊ីផងដែរទុកសម្រាប់តទល់ ឬសម្រាប់ពន្លះគ្នាមួយអស់ដៃជាមួយប្រទេសមហាអំណាចបើសង្គ្រាមនុយក្លេអ៊ែរផ្ទុះឡើងនាពេលអនាគត។
អ៊ុយក្រែនមិនបានបញ្ជាក់លម្អិតថាតើមីស៊ីលអន្តរទ្វីបនោះបំពាក់ក្បាលគ្រាប់អ្វី និងថាតើនោះជាមីស៊ីលអន្តរទ្វីបប្រភេទណាទេ។ ប៉ុន្តែគេសង្ឃឹមថារុស្ស៊ីមិនបានបំពាក់ក្បាលគ្រាប់នុយក្លេអ៊ែរនៅលើនោះទៅចុះ។ ក្រោយការផ្សព្វផ្សាយដំណឹងនេះ ខាងភាគីរុស្ស៊ីមិនទាន់ធ្វើអត្ថាធិប្បាយ ឬបញ្ចេញប្រតិកម្មអ្វីទាំងអស់។ កាសែតអ៊ុយក្រែនផ្សាយថាមីស៊ីលនោះឈ្មោះអ័រអេស-២៦-រូបេស (RS-26-Rubezh) ជាមីស៊ីលផ្លោងឆ្លងទ្វីបដែលប្រើប្រាស់ឥន្ធនៈរឹង។ វាអាចបាញ់បានចម្ងាយ៥៨០០គីឡូម៉ែត្រ។
មីស៊ីលស៊េរីអ័រអេស-២៦ត្រូវរុស្ស៊ីបាញ់សាកល្បងដោយជោគជ័យជាលើកដំបូងកាលពីឆ្នាំ២០១២។ វាមានប្រវែង១២ម៉ែត្រ ទម្ងន់៣៦តោន អាចបំពាក់ក្បាលគ្រាប់នុយក្លេអ៊ែរទម្ងន់៨០០គីឡូក្រាម។ កងទ័ពអាកាសអ៊ុយក្រែនថ្លែងថារុស្ស៊ីវាយប្រហារនៅពេលនោះសំដៅទៅលើរោងចក្រ-សហគ្រាស និងហេដ្ឋារចនាសម្ព័ន្ធសំខាន់ៗនៅទីក្រុងឌីនីប្រូ (Dnipro)។
អ៊ុយក្រែនមិនបានបញ្ជាក់ថាតើគ្រាប់មីស៊ីលនោះធ្លាក់ទៅលើតំបន់ណា ឬទីតាំងណា ឬក៏បានបង្កការខូចខាតកម្រិតណាទេ។ យោងតាមតាមការបង្ហើបឱ្យដឹងពីអភិបាលក្រុងឌីនីប្រូ នៅពេលវាយប្រហារនោះ រុស្ស៊ីបាញ់មីស៊ីលលឿនជាងសំឡេង១គ្រាប់ (មីស៊ីលហាយពើសូនិច – hypersonic) និងបាញ់មីស៊ីលបណ្ដែត៧គ្រាប់ ហើយត្រូវអ៊ុយក្រែនអាចបាញ់ធ្លាក់៦គ្រាប់៕
ចែករំលែកព័តមាននេះ