ខេត្តសៀមរាប ៖ តាមប្រសាសន៍របស់លោកលី វណ្ណៈ នាយករដ្ឋបាលខេត្តសៀម​រាប និង​ជាអ្នកនាំពាក្យរដ្ឋបាលខេត្ត បាន​​ឱ្យដឹងកាលពីរសៀលថ្ងៃទី២៥ ខែធ្នូ ឆ្នាំ ២០២៤ ថា «​ខ្លោង​ទ្វារមុខវត្តព្រះ ព្រហ្មរ័ត្ន» ដែលត្រូវបានរងការប្រះស្រាំ បន្ទាប់ពីមានករណីគ្រោះថ្នាក់ចរាចរណ៍បង្កឡើងដោយឡានមួយគ្រឿងដែលជិះដោយជនបរទេសប្រុសស្រីចំនួន៣នាក់ បើកបរក្នុងល្បឿនលឿនបុកយ៉ាង​ពេញទំហឹង បណ្តាលឱ្យ​ខូចខាតនោះ ត្រូវបានរដ្ឋបាលខេត្តសៀមរាបមានការព្រួយបារម្ភពីសុវត្ថិភាពប្រជាពលរដ្ឋ ដែលធ្វើដំណើរឆ្លងកាត់ទៅមកលើស្ពាននេះ និងដោយមានការបញ្ហាផ្ទាល់ពីលោកប្រាក់ សោភ័ណ អភិបាលខេត្ត បានសម្រេចឱ្យមន្ត្រីក្រោមឱវាទយកគ្រឿងចក្រមកធ្វើការរុះរើជាបន្ទាន់ និង​រៀបចំកសាង​សារជាថ្មីឡើងវិញ នូវសោភ័ណ​ភាព​ដូចមុន។

សូមបញ្ជាក់ថា ការរៀបចំ​សាងសង់ជាថ្មីឡើងវិញ បានធ្វើនៅថ្ងៃទី​២៥ ខែធ្នូ ឆ្នាំ ២០២៤ នេះ បន្ទាប់ពីរថយន្តមួយគ្រឿងដែលជិះដោយជនបរទេសមួយក្រុម បានបើករថយន្ត ខ្វះការប្រុង​ប្រយ័ត្ន ទៅបុក​ខ្លោង​ទ្វារ មុខវត្តព្រះព្រហ្មរ័ត្ន បណ្តាលឱ្យខូចខាតយ៉ាងដំណំ នោះកាលពីយប់អាធ្រាត្រថ្ងៃទី ២៤ ខែធ្នូ ឆ្នាំ ២០២៤ វេលាម៉ោង១២និង៤៥នាទី ស្ថិត​នៅក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប លើផ្លូវវិថីពោធិ៍កំបោរ ។

បើតាមប្រភពពីសមត្ថកិច្ច បានប្រាប់ភ្នាក់ងារកោះសន្តិភាព កាលពីថ្ងៃទី២៤ ខែធ្នូ ឆ្នាំ២០២៤ នោះ ករណីគ្រោះថ្នាក់ចរាចរណ៍ បង្កឡើងដោយរថយន្តរបស់ជនបរទេស​មួយក្រុមមានគ្នា​ប្រុស​ស្រី៣នាក់​ បាន បើករថយន្តក្នុងស្ថានភាពស្រវឹង ស្រា ហើយជ្រុលទីបុកក្លោងទ្វារ មុខវត្តព្រះព្រហ្មរ័ត្ន រួចបានបញ្ចប់​សងសំណង ទៅឱ្យចៅអធិការវត្ត ព្រះព្រហ្មរ័ត្ន នូវទឹកប្រាក់​ចំនួន៨០០០ដុល្លារគត់ ដើម្បី បញ្ចប់រឿង នៅស្នងការដ្ឋាននគរបាលខេត្តសៀមរាប កាលពីថ្ងៃទី២៤ ខែធ្នូឆ្នាំ២០២៤ នោះ​ ។​

សូម​រំលឹកឡើងវិញ​ថា កម្លាំង​ការិយាល័យ​នគរបាល​ជំនាញ​បាន​ប្រាប់​ភ្នាក់ងារ​កោះសន្តិភាព នៅ​រសៀល​ថ្ងៃ​ទី​២៤ ខែធ្នូ ឆ្នាំ​២០២៤​ឱ្យ​ដឹង​ថា ខ្លោងទ្វារវត្ត​ព្រះព្រហ្ម​រ័​ត្ន ត្រូវ​បាន​រថយន្ត​មួយ​គ្រឿង​ដែល​ជិះ​ដោយ​ជនបរទេស​ប្រុស​ស្រី​៣​នាក់ បាន​បើកបរ​ក្នុង​ស្ថានភាព​ស្រវឹង​និង​ប្រើប្រាស់​ល្បឿន​យ៉ាង​លឿន​អស់ដៃ​ខ្វះ​ការ​ប្រុង​ប្រយ័ត្ន​បាន​រេ​ចង្កូត​ទៅ​បុក​ខ្លោងទ្វារ​ស្ពាន​ចូល​វត្ត​ព្រះព្រហ្ម​រ័​ត្ន ក្នុង​ទិស​ដៅ​ពី​ជើង​ទៅ​ត្បូង​ពេញកម្លាំង​លាន់ឮ​ដូច​រន្ទះ​ខែប្រាំង បង្ក​ឱ្យ​មានការ​ភ្ញាក់ផ្អើល​ទាំង​កណ្តាលរាត្រី​រំលង​អធ្រាត្រ ។

ហេតុការណ៍​រថយន្ត​បុក​ខ្លោងទ្វារ​ស្ពានថ្ម​ចូល​វត្ត​នេះ​បាន​កើតឡើង​នៅ​ថ្ងៃ​ទី​២៤ ខែធ្នូ ឆ្នាំ ២០២៤ វេលា​ម៉ោង​០០​និង​៤៥​នាទី​កណ្តាលអធ្រាត្រ ត្រង់​ចំណុច​មុខ​វត្ត​ព្រះព្រហ្ម​រ័​ត្ន ស្ថិត​នៅ​ភូមិ​មណ្ឌល​១ សង្កាត់​ស្វាយ​ដង្គំ ក្រុង​សៀមរាប លើ​វិ​ថី​ពោធិ៍​កំបោរ ។

សមត្ថកិច្ច​បាន​បន្ត​ថា រថយន្ត​ដែល​បុក​ខ្លោងទ្វារ​ស្ពាន​ចូល​វត្ត​ព្រះព្រហ្ម​រ័​ត្ន​នោះ​ម៉ាក Hongqi HS5 ពណ៌​ខៀវ ពាក់​ផ្លា​ក​លេខ​ភ្នំពេញ 2CA -5186 អ្នក​ជិះ​នៅ​ក្នុង​រថយន្ត​នេះ​មាន​គ្នា​ចំនួន​៣​នាក់​៖
១-​ឈ្មោះ WANG NANJIE ភេទ​ប្រុស អាយុ​៣៣​ឆ្នាំ ជនជាតិ​ចិន ។ ២-​ឈ្មោះ PHAN THI NGOC.HAN ភេទ​ស្រី អាយុ​២៤​ឆ្នាំ ជនជាតិ​វៀតណាម ។ និង​៣-​ឈ្មោះ LUO LITAO ភេទ​ស្រី អាយុ​២៥​ឆ្នាំ ជនជាតិ​ចិន ។

សមត្ថកិច្ច​បាន​បន្ត​ឱ្យ​ដឹង​ទៀត​ថា គ្រោះថ្នាក់​នេះ បណ្តាល​ឱ្យ​អ្នក​ជិះ​នៅ​ក្នុង​រថយន្ត​ទាំង​បី​នាក់​របួស​ព្រលឹង​ចុង​សក់​គ្រាន់តែ​មិន​សន្លប់​ធំ​តែ​ប៉ុណ្ណោះ ។ ចំណែក​រថយន្ត​រង​ការ​ខូចខាត​ធ្ងន់​ខ្ទេច​មុខ​មើល​មិន​យល់ និង​ខ្លោងទ្វារ​ស្ពានថ្ម​វត្ត​ព្រះព្រហ្ម​រ័​ត្ន​ដ៏​រឹង​មាំ ក៏​ខូចខាត​ធ្ងន់​ដោយ​ប្រះ​ស្រាំ ។

ព្រះ​គ្រូ​ចៅអធិការ​វត្ត​ព្រះព្រហ្ម​រ័​ត្ន និង​តំណាង​ឱ្យ​ជន​បង្ក ដែល​បើករថយន្ត​បុក​ខ្លោងទ្វារ​ស្ពាន​ចូល​វត្ត​ព្រះព្រហ្ម​រ័​ត្ន បណ្តាល​ឱ្យ​ខូចខាត​នោះ ត្រូវ​បាន​សម្របសម្រួល​ចេញ​សង​ថ្លៃ​ខូចខាត​ចំនួន ៨០០០​ដុល្លារ ដើម្បី​បញ្ចប់រឿង នៅ​ស្នងការដ្ឋាន​នគរបាល​ខេត្តសៀមរាប នា​រសៀល​ថ្ងៃ​ទី​២៤ ខែធ្នូ ឆ្នាំ​២០២៤ ។

ខ្លោងទ្វារ​ស្ពាន​ចូល​វត្ត​ព្រះព្រហ្ម​រ័​ត្ន​នេះ ​បាន​កសាង​ឡើង​កាលពី​ឆ្នាំ​១៩៩៨ គឺ​មាន​អាយុ​១៦​ឆ្នាំ​ហើយ ៕