ទីក្រុងតូក្យូ៖ នៅទីបំផុត អ្នកតំណាងរាស្ត្រជប៉ុនសម្រេចចិត្តបោះឆ្នោតគាំទ្រលោកអ៊ីស៊ីបាជានាយករដ្ឋមន្ត្រីជប៉ុននៅអាណត្តិថ្មីទោះបីគណបក្សរបស់លោកមិនអាចដណ្ដើមបានអាសនៈភាគច្រើនដាច់ខាត (៥០+១) ដើម្បីដឹកនាំរដ្ឋាភិបាលតែម្នាក់ឯងក៏ដោយ។ លោកបានសម្រេចរំលាយរដ្ឋសភាចោល និងរៀបចំការបោះឆ្នោតមុនអាណត្តិកាលពីថ្ងៃទី២៧ ខែតុលា។
លោកអ៊ីស៊ីបាថ្វីដ្បិតត្រូវបានតែងតាំងឧបកិច្ចជានាយករដ្ឋមន្ត្រី ប៉ុន្តែរដ្ឋាភិបាលរបស់លោកគ្មានសំឡេងភាគច្រើនដាច់ខាតនៅក្នុងរដ្ឋសភាទេ។ ដូច្នេះ ប្រឈមនឹងការបញ្ជូនកម្មវិធីនយោបាយទៅឱ្យសភាអនុម័តមិនបានសម្រេចនាពេលអនាគត។ ទន្ទឹមនឹងនោះ រដ្ឋាភិបាលរបស់លោកក៏ប្រឈមនឹងបញ្ហាប្រែប្រួលនៃនយោបាយអន្តរជាតិផងដែរ។ ឧទាហរណ៍ ការឡើងកាន់អំណាចរបស់លោកត្រាំនាខែមករា ឆ្នាំ២០២៥ជាសញ្ញាមិនល្អទាល់តែសោះសម្រាប់អនាគតនៃសេដ្ឋកិច្ចរបស់ជប៉ុន។
ក្នុងនាមជាអ្នកគាំពារនិយមសេដ្ឋកិច្ចម្នាក់ លោកត្រាំអាចនឹងដាក់ចេញគោលនយោបាយដែលប៉ះពាល់សេដ្ឋកិច្ចរបស់ជប៉ុន។ ម៉្យាងទៀត ភាពតានតឹងរវាងជប៉ុន និងចិន និងកូរ៉េខាងជើងក៏ជាបញ្ហាដ៏ធំ១ដែលធ្វើឱ្យរដ្ឋាភិបាលជប៉ុនឈឺក្បាលមិនតិចទេ។ នេះមិនទាន់គិតទៅដល់បញ្ហានៅក្នុងស្រុកដែលប្រជាជនជប៉ុនប្រឈមនឹងការរស់នៅកាន់តែលំបាកដោយសារថ្លៃចំណាយទៅលើជីវភាពប្រចាំថ្ងៃកាន់តែខ្ពស់ ខណៈដែលប្រាក់ចំណូលរបស់ពួកគេមិនអាចឆ្លើយតបនឹងតម្រូវការជាក់ស្ដែង។
គណបក្សប្រជាធិបតេយ្យសេរីរបស់លោកអ៊ីស៊ីបា និងគណបក្សកូមេអ៊ីតុ (Komeito) ដែលជាដៃគូសម្ព័ន្ធភាពជាមួយគ្នាអាចទទួលបានអាសនៈច្រើនជាងបក្សដទៃទៀតក៏ពិតមែន ក៏ប៉ុន្តែមិនអាចគ្រប់សំឡេងភាគច្រើនដាច់ខាតទេ។ នេះជាករណីដំបូងចាប់តាំងពីឆ្នាំ២០១២ដែលមានបញ្ហានេះកើតឡើងម្ដងទៀត។ ហេតុនេះ គណបក្សសម្ព័ន្ធភាពជាប់ជំពាក់ត្រូវតែពឹងផ្អែកទៅលើសំឡេងគាំទ្រពីអ្នកតំណាងរាស្ត្ររបស់គណបក្សប្រឆាំងខ្លះដើម្បីបង្គ្រប់សំឡេងអនុម័តសេចក្ដីព្រាងច្បាប់អ្វី១។
ដោយសារមិនទទួលបានសំឡេងភាគច្រើនដាច់ខាតនេះហើយទើបបានជារដ្ឋសភាត្រូវបោះឆ្នោតជម្រុះរវាងបេក្ខជន២នាក់ដែលទទួលបានអាសនៈច្រើនជាងគេលំដាប់ទី១ និងទី២នៅក្នុងរដ្ឋសភា។ ម៉្យាងទៀត នេះក៏ជាករណីដំបូងគេផងដែរនៅក្នុងរយៈពេល៣០ឆ្នាំចុងក្រោយ។ នៅទីបំផុត គ្មានបេក្ខជនរូបណាទទួលបានសំឡេងគាំទ្រភាគច្រើនដាច់ខាតពីសភាទេ។
ទោះជាយ៉ាងណាក្ដី ដូចការរំពឹងទុកអីចឹងគឺថាជម្រើសដែលមាននៅក្នុងដៃគេចមិនផុតពីលោកអ៊ីស៊ីបាទេព្រោះយ៉ាងហោចណាស់ លោកទទួលបានសំឡេងគាំទ្រពីអ្នកតំណាងរាស្ត្រច្រើនជាងបេក្ខជនដែលមកគណបក្សប្រឆាំង។ លទ្ធផលឆ្នោតបង្ហាញថាលោកអ៊ីស៊ីបាទទួលបាន២២១សំឡេងនៅក្នុងចំណោមអ្នកតំណាងរាស្ត្រសរុប៤៦៥រូប។
មានន័យថាសំឡេងភាគច្រើនដាច់ខាតគឺ២៣៣អ្នកតំណាងរាស្ត្រ។ ដូច្នេះ លោកអ៊ីស៊ីបាខ្វះ១២សំឡេងទៀតទើបពេញសិទ្ធិជានាយករដ្ឋមន្ត្រី។ ក្រុមអ្នកច្បាប់យល់ថាលោកអ៊ីស៊ីបាធ្វើជានាយករដ្ឋមន្ត្រីនៅក្នុងស្ថានភាពបែបនេះចេះតែអាចធ្វើបានហើយ។ គ្រាន់តែថាលោកអាចនឹងជ្រុះចេញពីអំណាចនៅពេលណាមួយក៏បានដែរបើសិនគណបក្សដទៃចង់រករឿង៕
ចែករំលែកព័តមាននេះ