សៀមរាប ៖ ថ្មីៗក្រសួងធនធានទឹក និងឧតុនិយម បានព្យាករណ៍ថា រយៈពេល៣ខែទៅមុខ អាចនឹងមានការខ្វះខាតទឹក ដោយអំពាវនាវឱ្យប្រជាពលរដ្ឋប្រើប្រាស់ទឹកដោយសន្សំសំចៃ និងថែរក្សាប្រភពទឹកដោយប្រុងប្រយ័ត្ន ។…
សៀមរាប ៖ ថ្មីៗក្រសួងធនធានទឹក និងឧតុនិយម បានព្យាករណ៍ថា រយៈពេល៣ខែទៅមុខ អាចនឹងមានការខ្វះខាតទឹក ដោយអំពាវនាវឱ្យប្រជាពលរដ្ឋប្រើប្រាស់ទឹកដោយសន្សំសំចៃ និងថែរក្សាប្រភពទឹកដោយប្រុងប្រយ័ត្ន ។
ជុំវិញបញ្ហាថែរក្សាប្រភពទឹកនេះ នៅថ្ងៃទី០៧ ខែវិច្ឆិកា ឆ្នាំ២០២៤ មន្ត្រីជំនាញរបស់អាជ្ញាធរជាតិអប្សរាបានបញ្ជាក់ឱ្យដឹងថា ទោះបីស្ថានភាពទឹកភ្លៀង ឆ្នាំ២០២៤នេះ បានអូសបន្លាយពេល និងធ្លាក់រាយប៉ាយមិនទៀងទាត់យ៉ាងណាក៏ដោយ មន្ត្រីជំនាញរបស់អាជ្ញាធរជាតិអប្សរាបានរៀបចំប្រមែប្រមូលទឹកពេញអាងស្ដុកទឹកទាំងអស់ ដែលមានក្នុងតំបន់រមណីយដ្ឋានអង្គរ សរុបប្រមាណ៦០លានម៉ែត្រគីប ដើម្បីជាប្រយោជន៍បម្រើឱ្យការប្រើប្រាស់តាមតម្រូវការចាំបាច់ក្រែងលោខ្វះខាត ជាពិសេសនារដូវប្រាំងដែលនឹងចូលមកដល់នាពេលដ៏ឆាប់ ។
ប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធនៃអាជ្ញាធរជាតិអប្សរា លោក ភឿន សុឃីម បានរៀបរាប់ឱ្យដឹងថា គិតមកដល់ខែវិច្ឆិកា ឆ្នាំ២០២៤ ការប្រមូលទឹកចូលអាងស្ដុកទឹកសំខាន់ៗនៅតំបន់រមណីយដ្ឋានអង្គរ គឺសម្រេចបាន១០០ភាគរយ ក្នុងនោះរាប់ទាំងបារាយណ៍តូចធំ កសិន្ធុទឹក អូរ និងប្រឡាយជាដើម ។ លោក ភឿន សុឃីម បន្តទៀតថា ទឹកដែលប្រមូលបានទាំងនេះ មានបរិមាណជាង៦០លានម៉ែត្រត្រីគុណ ដែលត្រៀមសម្រាប់ការប្រើប្រាស់នារដូវប្រាំងខាងមុខ ក្នុងនោះ រាប់ទាំងកិច្ចការងារអភិរក្សប្រាសាទ បរិស្ថាន និងបម្រើអោយវិស័យកសិកម្ម សម្រាប់ប្រជាពលរដ្ឋដែលនៅតំបន់ជុំវិញប្រមាណ៧ពាន់ហិកតា ។
ជុំវិញកិច្ចការអភិរក្សប្រាសាទ អ្នកជំនាញរូបនេះ បានអះអាងពីសារសំខាន់នៃការរក្សាឱ្យបាននូវវត្តមានទឹកនៅក្នុងតំបន់រមណីយដ្ឋានអង្គរ ដោយបញ្ជាក់ថា ទឹកមានសារសំខាន់នៅតំបន់ប្រាសាទ ដោយសារបុព្វបុរសសម័យមុនបានរៀបចំ និងកសាងប្រាសាទ ដោយមានគ្រឹះដីខ្សាច់ ដូច្នេះទើបកសាងកសិន្ធុជុំវិញ ដើម្បីបញ្ចូលទឹកឱ្យគ្រឹះរឹងមាំល្អ ។
ប្រសិនគ្មានទឹក ប្រាសាទនឹងរងការដួលរលំ និងបាក់បែកខ្លាំង ។ ក្រៅពីនេះទឹកក៏ជាបង្កើនសម្រស់ និងសោភ័ណភាពនៅតំបន់ប្រាសាទផង ។ ទឹកក៏ជួយឱ្យដើមឈើលូតលាស់បានល្អ ទាក់ទាញទេសចរ និងជួយកាត់បន្ថយការកើនឡើងនៃរលកកម្ដៅខ្លាំងនារដូវប្រាំង ។
បន្ថែមលើនេះ លោក ភឿន សុឃីម បានឱ្យដឹងថា ការងារគ្រប់គ្រងទឹកនៅតំបន់រមណីយដ្ឋានអង្គរកាន់តែល្អប្រសើរពីមួយឆ្នាំទៅមួយឆ្នាំ ក្រោយអាជ្ញាធរជាតិអប្សរាបានរៀបចំ និងស្ដារប្រព័ន្ធទឹកបុរាណ ក្នុងតំបន់រមណីយដ្ឋានអង្គរឡើងវិញ ចាប់ពីឆ្នាំ២០១២មក ។
ជាងនេះទៅទៀត ក្រោមការគិតគូរដ៏វែងឆ្ងាយ និងភាពឈ្លាសវៃពីថ្នាក់ដឹកនាំអាជ្ញាធរជាតិអប្សរា ដោយយល់ពីសារសំខាន់នៃការងារគ្រប់គ្រងទឹកដែលធ្វើឱ្យប្រព័ន្ធគ្រប់គ្រងទឹកក្នុងតំបន់កាន់តែមានភាពជឿនលឿន និងមានប្រសិទ្ធភាពខ្ពស់ តួយ៉ាងនាឆ្នាំ២០២៤នេះ សំណង់ទ្វារទឹកមួយចំនួនត្រូវបានស្ដារ និងជួសជុលឡើងវិញជាបន្តបន្ទាប់ ។
ប្រភពពីមន្ត្រីដដែលបានឱ្យដឹងថា បរិមាណទឹក៦០លានម៉ែត្រគីបដែលប្រមូលរក្សាទុកនាឆ្នាំ២០២៤នេះ គឺជាចំនួនប្រហាក់ប្រហែលនឹងឆ្នាំ២០២៣ដែរ ដែលនេះជាសមិទ្ធិផលដែលកើតចេញពីការពង្រីកវិសាលភាពកាន់តែទូលំទូលាយ និងពេញលេញលើកកិច្ចការងារគ្រប់គ្រងទឹករបស់អាជ្ញាធរជាតិអប្សរា ដើម្បីធានាបានថា បំពេញគ្រប់តាមតម្រូវការក្នុងតំបន់រមណីយដ្ឋានអង្គរ ដោយមានការបារម្ភពីរឿងកង្វះខាតទឹក ៕
ចែករំលែកព័តមាននេះ