រាជធានីភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈប្រកាសថា មិនមានគម្រោងជ្រើសរើសមន្ត្រីថ្មី ដើម្បីចូលបម្រើការងារក្នុងក្របខណ្ឌរបស់ខ្លួននោះទេ ដោយឡែក…
រាជធានីភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈប្រកាសថា មិនមានគម្រោងជ្រើសរើសមន្ត្រីថ្មី ដើម្បីចូលបម្រើការងារក្នុងក្របខណ្ឌរបស់ខ្លួននោះទេ ដោយឡែក ប្រសិនជាក្នុងករណីចាំបាច់ ក្រសួងនឹងជ្រើសរើសមន្ត្រីផ្អែកលើមូលដ្ឋានចំនួន៣ ។
យោងតាមបណ្តាញសង្គមរបស់ក្រសួងមុខងារសាធារណៈ នៅថ្ងៃទី៧ ខែវិច្ឆិកា បានឲ្យដឹងថា មូលដ្ឋានចំនួន៣នោះ រួមមាន៖ ១-ចំនួនដែលត្រូវជ្រើសរើសផ្អែកលើចំនួនមន្ត្រីដែលបានចូលនិវត្តន៍ចំនួន២៧កន្លែង , ២-ជ្រើសរើសតែមន្ត្រីដែលមានជំនាញបច្ចេកទេស ឬស្ថិតក្នុងមូលដ្ឋាននៃបច្ចេកវិទ្យា ឬបរិវត្តកម្មឌីជីថល និង៣-ជាការជ្រើសរើសមន្ត្រីផ្អែកលើកិច្ចព្រមព្រៀងការងារ ។
ប្រមុខដឹកនាំក្រសួងមុខងារសាធារណៈបានឱ្យដឹងទៀតថា ទន្ទឹមនេះ ក្រសួងមុខងារសាធារណៈបាននិងកំពុងអនុវត្តការកែទម្រង់ផ្ទៃក្នុងរបស់ខ្លួនជាបន្តបន្ទាប់តាមរយៈការពិនិត្យឡើងវិញ ការវិភាគមុខងារ និងរចនាសម្ព័ន្ធរបស់ក្រសួងផ្ទាល់ ការពង្រឹងវត្តមានមន្ត្រី ការរៀបចំកែលម្អហេដ្ឋារចនាសម្ព័ន្ធកន្លែងការងារជូនមន្ត្រី ការបែងចែកតួនាទី និងភារកិច្ចស្របតាមគុណវុឌ្ឍិរបស់មន្ត្រី ការពង្រាយមន្ត្រី ការបណ្តុះបណ្តាល អភិវឌ្ឍសមត្ថភាពមន្ត្រី ការដាក់អនុវត្តប្រព័ន្ធលើកទឹកចិត្តគាំទ្រសមិទ្ធកម្មមន្ត្រី រួមទាំងការងារផ្សេងទៀតក្នុងគោលដៅចូលរួមធ្វើទំនើបកម្ម និងរៀបចំប្រព័ន្ធរដ្ឋបាលសាធារណៈដែលមានសមត្ថភាពខ្ពស់ ខ្លាំង វៃឆ្លាត និងស្អាតស្អំ ។
ក្រសួងបន្ដថា ទាំងនេះ ជាការចូលរួមចំណែកយ៉ាងសំខាន់ជាមួយក្រសួង ស្ថាប័នផ្សេងៗទៀត ដើម្បីសម្រេចឱ្យបាននូវការកែទម្រង់រដ្ឋបាលសាធារណៈ ស្របតាមទស្សនវិស័យរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
សូមជម្រាបថា ខ្លឹមសាររបស់ឯកឧត្តម ហ៊ុន ម៉ានី ខាងលើនេះ ជាផ្នែកមួយដែលឯកឧតក្តមបានលើកឡើងក្នុងសិក្ខាសាលា និងកិច្ចប្រជុំ ស្តីពីការពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួង ស្ថាប័ននាពេលកន្លងមក ៕
ចែករំលែកព័តមាននេះ