បណ្តាអ្នកវិទ្យាសាស្រ្តបានអះអាងថា ពិសាទឹកផ្លែឈើស្រស់ដែលដាក់ស្ករច្រើនហួសកម្រិតពិតជាមិនទទួលបានអត្ថប្រយោជន៍សុខភាពនោះទេ ។ ផ្ទុយទៅវិញ វាបែរជាបង្កើនអត្រាកើតជំងឺមហារីកជាជាងការទប់ស្កាត់ ។ ពួកគេបានបញ្ជាក់ថា តាមពិតក្នុងពេលដែលយើងទទួលទានដោយដាក់ស្ករ សារធាតុដែលប្រឆាំងនឹងជំងឺមហារីកក្នុងផ្លែឈើបានបាត់បង់អស់ ។
ការសិក្សា ដែលធ្វើឡើងដោយអ្នកវិទ្យាសាស្ត្ររបស់អូស្ត្រាលីបានពិនិត្យលើរបបអាហាររបស់មនុស្សពេញវ័យប្រមាណ២.២០០នាក់ និងបានចំណាយពេលអស់២ឆ្នាំ ។ ជាការគួរឱ្យភ្ញាក់ផ្អើល ពួកគេរកឃើញថា អ្នកដែលទទួលទានប្រភេទបន្លែនិងផ្លែឈើមានដូចជាប៉ោម សណ្តែកបណ្តុះ ខាត់ណាលឿង ឬខៀវជាប្រចាំ អត្រាប្រឈមនឹងជំងឺមហារីកថយចុះ ប៉ុន្តែអ្នកដែលទទួលទានទឹកផ្លែឈើស្រស់ដាក់ស្ករច្រើន អត្រាប្រឈមនឹងជំងឺមហារីកបែរជាឡើងខ្ពស់ ។ ប្រសិនជាផឹកច្រើនជាង៣កែវក្នុង១ថ្ងៃនឹងវិវឌ្ឍទៅជាជំងឺមហារីកចុងពោះវៀនធំ ។
អ្នកវិទ្យាសាស្ត្រជឿថា បញ្ហានេះគឺមកពីក្នុងទឹកផ្លែឈើស្រស់សម្បូរទៅដោយស្ករច្រើនពេក។ ពួកគេថា សារធាតុដែលប្រឆាំងនឹងមហារីករបស់ផ្លែឈើមានដូចជាវីតាមីនសេ សារធាតុសរសៃរួមនិងធាតុគីមីផ្សេងៗទៀតបានបាត់បង់អស់អំឡុងការកែច្នៃ ។
យ៉ាងណាក៏ដោយលោកនេល បារីមកពីមូលនិធិស្រាវជ្រាវជំងឺមហារីករបស់អង់គ្លេសបានថ្លែងថា៖ «ការសិក្សាលើកនេះមិនទូលំទូលាយប៉ុន្មានទេ ។ ដូច្នេះវាមិនផ្តល់ចម្លើយច្បាស់លាស់ដល់យើងចំពោះផលប៉ះពាល់ជំងឺមហារីកពោះវៀនធំឡើយ ព្រោះថាការទទួលសាច់ក្រហមច្រើនក៏បណ្តាលឱ្យកើតជំងឺមហារីកដូចគ្នាដែរ ។
ផ្ទុយមកវិញ ការទទួលទានអាហារដែលសម្បូរដោយសារធាតុសរសៃច្រើនអាចកាត់បន្ថយអត្រាប្រឈមទៅវិញ ។ ផ្លែឈើនិងបន្លែគឺជាប្រភពដ៏ល្អតែមួយគត់នៃពពួករបបអាហារដែលសម្បូរដោយសារធាតុសរសៃ ។ ហេតុដូច្នេះ អាហារដែលសម្បូរដោយបន្លែនិងផ្លែឈើ ពិតជាអាចជួយកាត់បន្ថយអត្រាប្រឈមនឹងជំងឺមហារីកផ្សេងៗបាន ។ ជាយោបល់ល្អគេគួរតែប្រើប្រាស់បន្លែនិងផ្លែឈើឱ្យបានច្រើននៅក្នុងរបបអាហារប្រចាំថ្ងៃ» ៕
ចែករំលែកព័តមាននេះ