ទីក្រុងវ៉ាស៊ីនតោន៖ ថ្ងៃនេះជាយុទ្ធនាការឃោសនាបោះឆ្នោតវគ្គផ្ដាច់ព្រ័ត្ររបស់បេក្ខជនប្រធានាធិបតីអាមេរិកទាំង២រូបមុនពេលការបោះឆ្នោតជាផ្លូវការនឹងចាប់ផ្ដើមនៅថ្ងៃទី៥ ខែវិច្ឆិកា។ លោកស្រីហារីសបានចុះឃោសនានៅរដ្ឋធំៗដូចជាផឹនស៊ីលវេនៀ និងហ្វ៊ីឡាដែលហ្វៀ ខណៈដែលលោកត្រាំចុះទៅរដ្ឋណតខារ៉ូឡាយណា, ផឹនស៊ីលវេនៀ និងមីស៊ីហ្គេន។
លទ្ធផលស្ទង់មតិលើកចុងក្រោយបង្ហាញថាបេក្ខជនទាំង២នៅតែទទួលបានសំឡេងគាំទ្រប្រហាក់ប្រហែលគ្នា ជាហេតុធ្វើឱ្យគេពិបាកទស្សន៍ទាយថាតើបេក្ខជនរូបណានឹងឈ្នះការបោះឆ្នោតលើកនេះ។ ដូច្នេះ គេមានតែរង់ចាំអ៊ុតលទ្ធផលបោះឆ្នោតនៅថ្ងៃទី៥ ខែវិច្ឆិកាតែម្ដងទើបអាចដឹងច្បាស់ទាំងអស់គ្នា។ រហូតមកដល់ពេលនេះ ពលរដ្ឋអាមេរិកជាង៧៨លាននាក់បានបោះឆ្នោតមុនកាលកំណត់រួចហើយ។ មុន ឬក្រោយគង់តែបោះឆ្នោតដដែល ដូច្នេះ បោះឱ្យហើយតែម្ដងទៅក៏ល្អម៉្យាងដែរ។
លោកស្រីហារីសសន្យាថានឹងខិតខំឱ្យអស់ពីកម្លាំងកាយចិត្តដើម្បីបិទបញ្ចប់សង្គ្រាមនៅតំបន់ហ្កាហ្សាបើលោកស្រីមានវាសនាបានជាប់ឆ្នោតជាប្រធានាធិបតី។ ខាងលើនេះជាអ្វីដែលលោកស្រីសន្យានៅក្នុងវេទិកាសាធារណៈនៅរដ្ឋមីស៊ីហ្គែន។ នៅទីនោះមានប្រជាជនអាមេរិកដើមកំណើតអារ៉ាប់រស់នៅជាង២៤ម៉ឺននាក់។ ដូច្នេះ លោកស្រីព្យាយាមបញ្ចុះបញ្ចូលពួកគេ។
លោកត្រាំក៏ចុះឃោសនានៅរដ្ឋមីស៊ីហ្គែនផងដែរនៅយប់ថ្ងៃចន្ទ។ លោកសោកស្ដាយ បើដឹងអីចឹងកុំចាកចេញពីសេតវិមានកាលពីដើមឆ្នាំ២០២១ទៅល្អជាង។ លោកនិយាយបែបលេងសើចថាអត់បញ្ហាទេសម្រាប់លោកបើសិនអ្នកសារព័ត៌មានត្រូវគេបាញ់។ ព្រំដែនរបស់ប្រទេសយើងមានសុវត្ថិភាពជាងគេបំផុតនៅក្នុងប្រវត្តិសាស្ត្ររបស់ជាតិយើងនៅពេលខ្ញុំចាកចេញពីសេតវិមាន។ លោកថ្លែងដូច្នេះនៅផឹនស៊ីលវេនៀ។ លោកថាកាលនោះលោកមិនសមចាកចេញពីសេតវិមានទាល់តែសោះ។
លោកត្រាំនៅតែនិយាយអំពីការលួចបន្លំសន្លឹកឆ្នោត។ លោកចោទប្រកាន់ថាបក្សប្រជាធិបតេយ្យនៅផឹនស៊ីលវេនៀកំពុងខិតខំឱ្យអស់ពីកម្លាំងកាយចិត្តដើម្បីលួចបន្លំសន្លឹកឆ្នោត។ គេគិតថាពាក្យសម្ដីនេះរឹតតែបង្កការព្រួយបារម្ភបន្ថែមពីលើការព្រួយបារម្ភដែលមានស្រាប់នៅត្រង់ចំណុចថាតើអាចនឹងមានអស្ថិរភាព ឬសង្គ្រាមស៊ីវិលដែរឬទេក្រោយការបោះឆ្នោត។
ចំពោះសំណួរថាតើលោកត្រាំសុខចិត្តទទួលស្គាល់លទ្ធផលឆ្នោតដែរឬទេបើលោកទទួលបរាជ័យលើកនេះ? សាស្ត្រាចារ្យផូលអេបេក (Paul A. Beck) បង្រៀនផ្នែកវិទ្យាសាស្ត្រនយោបាយនៅសាកលវិទ្យាល័យរដ្ឋអូហៃយ៉ូ (Ohio) យល់ថាបើលោកត្រាំចាញ់ឆ្នោតលើកនេះ លោកនឹងមិនទទួលស្គាល់លទ្ធផលឆ្នោតជាដាច់ខាត។ លោកនឹងពុះពាររហូតដល់តំណក់ឈាមចុងក្រោយដើម្បីរំខានការប្រកាសលទ្ធផលឆ្នោតជាផ្លូវការ។
គេអាចមើលធ្លុះដល់ជម្រៅចិត្តរបស់លោកត្រាំតាមរយៈការក្រាញអំណាចកាលពីឆ្នាំ២០២០នៅពេលដឹងថាលោកបៃដិនមានជ័យជម្នះ។ សម្រាប់ការបោះឆ្នោតលើកនេះ លោកត្រាំនឹងអនុវត្តវិធីបែបនេះសាជាថ្មី។ នេះបើយោងតាមការប្រមើលមើលរបស់សាស្ត្រាចារ្យផូលអេបេក។ គ្រាន់តែថាកាលពីលើកមុន គាត់នៅកាន់អំណាចជាប្រធានាធិបតី ដូច្នេះ គាត់អាចក្រឡុកស្ថានការណ៍បានតាមចិត្ត។ ប៉ុន្តែលើកនេះ គាត់មិនអាចធ្វើខ្លាំងដូចកាលពីឆ្នាំ២០២០ និងដើមឆ្នាំ២០២១បានឡើយ៕
ចែករំលែកព័តមាននេះ