រាជធានីភ្នំពេញ ៖ គ្រឿងចក្រជាច្រើនគ្រឿង បានចាប់ផ្តើមចូលគោលដៅ ដើម្បីដំណើរការសាងសង់ផ្លូវក្រវាត់ព្រំដែនហើយ នៅថ្ងៃទី១ ខែវិច្ឆិកា ឆ្នាំ២០២៤ ខណៈការសាងសង់ផ្លូ វក្រវាត់ព្រំដែននេះ…
រាជធានីភ្នំពេញ ៖ គ្រឿងចក្រជាច្រើនគ្រឿង បានចាប់ផ្តើមចូលគោលដៅ ដើម្បីដំណើរការសាងសង់ផ្លូវក្រវាត់ព្រំដែនហើយ នៅថ្ងៃទី១ ខែវិច្ឆិកា ឆ្នាំ២០២៤ ខណៈការសាងសង់ផ្លូ វក្រវាត់ព្រំដែននេះ នឹងត្រូវបញ្ចប់ក្នុងអំឡុង ឆ្នាំ២០២៧ ។
យោងតាមបណ្តាញសង្គមរបស់មូលនិធិកសាងហេដ្ឋានរចនាសម្ព័ន្ធតាមព្រំដែន បានឲ្យដឹងថា នៅព្រឹកថ្ងៃទី១ ខែវិច្ឆិកា ឆ្នាំ២០២៤ ការដ្ឋាន គម្រោងកសាងហេដ្ឋារចនាសម្ព័ន្ធ តាមព្រំដែន ដោយផ្តោតលើការកសាងផ្លូវក្រវាត់ព្រំដែន បានចាប់ផ្តើមចល័តគ្រឿងចក្រ ទៅចូលគោលដៅ ដើម្បីដំណើរការដ្ឋានសាងសង់ជាផ្លូវការហើយ ។
ប្រភពបានបញ្ជាក់ថា ៖ «គម្រោងកសាងហេដ្ឋារចនាសម្ព័ន្ធ តាមព្រំដែន ដោយផ្តោតលើការកសាងផ្លូវក្រវាត់ព្រំដែន និងផ្លូវតភ្ជាប់ចូលផ្លូវព្រំដែន មានប្រវែងផ្លូវសរុបប្រមាណ២៥០គីឡូម៉ែត្រ (ខេត្តមណ្ឌលគិរី ប្រវែងប្រមាណ១៤៧,៥២ គ.ម ខេត្តរតនគិរី ប្រវែងប្រមាណ ១០២.៤៨ គ.ម) ដែលការកសាងនេះ ប្រើរយៈពេលប្រមាណ ៣០ខែ នឹងសម្រេចជាស្ថាពរក្នុងអំឡុង ខែឧសភា ឆ្នាំ២០២៧» ។
សូមជម្រាបថា នៅយប់ថ្ងៃទី៣១ ខែតុលា ឆ្នាំ២០២៤ ម្សិលមិញនេះ សម្តេចបវរធិបតីបាន បញ្ជាក់ថា ៖ «ចលនា នៃការបរិច្ចាគថវិកាក្នុង “មូលនិធិកសាងហេដ្ឋារច នាសម្ព័ន្ធតាមព្រំដែន ដោយផ្ដោតលើការកសាងផ្លូវក្រវាត់ព្រំដែន” ត្រូវបិទបញ្ចប់នៅថ្ងៃទី៣១ ខែតុលា ឆ្នាំ២០២៤ ដោយមានការចូលរួមយ៉ាងច្រើនកុះករពីសំណាក់ប្រជាពលរដ្ឋខ្មែរគ្រប់មជ្ឈដ្ឋានទាំងក្នុង និងក្រៅប្រទេសចំនួន ៧២០.១០៥ អង្គ/នាក់ ដែលបានចូលរួមបរិច្ចាក និងទទួលបានថវិកាសរុបចំនួន ៣២.៩៥២.៤៤២.០៤៤ រៀល និងប្រាក់ដុល្លាអាមេរិកសរុបចំនួន ១៨.៧២៩.៩៩៨ ដុល្លាអាមេរិក (គិតជាទឹកប្រាក់ដុល្លារអាមេរិកប្រមាណ ២៦.៩៦៧.៦០៩ ដុល្លាអាមេរិក)» ។
សម្តេចបវរធីបតី បានបន្ថែមថា វិភាគទានស្ម័គ្រចិត្តដែលទទួលបាននេះ នឹងត្រូវយក ទៅប្រើប្រាស់ក្នុងការកសាងផ្លូវក្រវាត់ព្រំដែន។ ដើម្បីធានាការគ្រប់គ្រង ប្រើប្រាស់ថវិការបាន ត្រឹមត្រូវ តម្លាភាព និងចំគោលដៅ ខ្ញុំបានសម្រេចបង្កើតក្រុមការងារចំពោះកិច្ច ដើម្បីគ្រប់គ្រងមូ លនិធិកសាងហេដ្ឋារចនាសម្ព័ន្ធតាមព្រំដែន ដោយផ្ដោតលើការកសាងផ្លូវក្រវាត់ព្រំដែន ដែលដឹកនាំដោយឯកឧត្តម នាយឧត្តមសេនីយ៍ គឹម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី និងជានាយករងខុទ្ទកាល័យនាយករដ្ឋមន្ត្រី ៕
ចែករំលែកព័តមាននេះ