ក្មេងប្រុសជំទង់ម្នាក់ ជិះម៉ូតូបុកគោងាប់១ក្បាល ខ្លួនឯងដួលរងរបួសធ្ងន់ធ្ងរ
រាជធានីភ្នំពេញ ៖ ក្មេងប្រុសជំទង់ម្នាក់ បានជិះម៉ូតូ ១គ្រឿង ក្នុងល្បឿនលឿន ប្រញាប់យកត្រី និងកំពឹស ដែលអូស និងដាក់មងបានទៅលក់…
រាជធានីភ្នំពេញ ៖ ក្មេងប្រុសជំទង់ម្នាក់ បានជិះម៉ូតូ ១គ្រឿង ក្នុងល្បឿនលឿន ប្រញាប់យកត្រី និងកំពឹស ដែលអូស និងដាក់មងបានទៅលក់ ពេលនោះ ស្រាប់តែមានគោញីជំទង់១ក្បាល រត់ឆ្លងផ្លូវកាត់មុខ ទាំងដែលម៉ូតូទៅជិតដល់ទៅហើយ។ ដោយសារតែម៉ូតូកំពុងលឿន ទើបមិនអាចជាន់ហ្វ្រាំឈប់ ឬគេចចេញទាន់ឡើយ ក៏ជ្រុលទៅបុកគោញីនោះ ពេញទំហឹង បណ្ដាលគោងា.ប់ភ្លាមៗនៅនឹងកន្លែង ឯក្មេងជំទង់រូបនោះដួលរងរបួសធ្ងន់ធ្ងរ ។
ឧប្បត្តិហេតុនោះបានកើតឡើងកាលពីវេលាម៉ោង០៣និង២៥នាទីរសៀលថ្ងៃទី៣០ ខែតុលា ឆ្នាំ២០២៤នេះ នៅតាមផ្លូវជាតិលេខ៣ ស្ថិតនៅក្នុងភូមិស្រែញរ សង្កាត់ពងទឹក ខណ្ឌដង្កោ រាជធានីភ្នំពេញ ។
ក្មេងជំទង់រងគ្រោះខាងលើ មិនត្រូវបានស្គាល់អត្តសញ្ញាណនោះទេ គ្រាន់តែដឹងថា មានអាយុប្រមាណ១៥ឆ្នាំ មុខរបរជាអ្នកនេសាទត្រី និងកំពឹសលក់ សព្វថ្ងៃរស់នៅក្នុងភូមិព្រៃសណ្ដែក សង្កាត់ចោមចៅទី២ ខណ្ឌពោធិ៍សែនជ័យ ។
ចំណែកគោញីជំទង់ដែលងា.ប់ រកម្ចាស់មិនឃើញនោះទេ ម្ចាស់អត់ហ៊ានចេញមុខមកទទួលខុសត្រូវឡើយ ព្រោះខ្លួនចិញ្ចឹមគោហើយ លែងចោលឲ្យដើរអនាធិបតេយ្យ បង្កគ្រោះថ្នាក់ដល់អ្នកដទៃបែបនេះ ។
បុរសម្នាក់ ដែលស្ថិតនៅកន្លែងកើតហេតុនោះបាននិយាយថា ក្មេងប្រុសជំទង់រងគ្រោះជាអ្នកសាទត្រី និងកំពឹសនៅស្ទឹងព្រែកត្នោតម្ដុំកំពង់ទួលដើម្បីលក់ ហើយនៅមុនពេលកើតហេតុក្មេងប្រុសនេះ បានជិះម៉ូតូ ១គ្រឿង ម៉ាកហុងដាឌ្រីសេ១២៥ ពណ៍ខ្មៅពាក់ស្លាកលេខភ្នំពេញ 1GG-7650 ។ ដឹកត្រី និងកំពឹស ដែលអូសនិងដាក់មងបាន ធ្វើដំណើរក្នុងទិសដៅពីត្បូងទៅជើងត្រលប់ទៅផ្ទះ ដោយបានបើកបរក្នុងល្បឿនលឿន ព្រោះប្រញាប់យកត្រី និងកំពឹស ដែលនេសាទបាននោះទៅលក់ ។
បុរសនោះ បាននិយាយប្រាប់ឲ្យដឹងបន្តទៀតថា លុះពេលពេលទៅដល់ត្រង់ចំណុចកើតហេតុខាងលើ ខណៈដែលម៉ូតូកំពុងតែលឿន ស្រាប់តែគោញីជំទង់ ១ក្បាលនោះ បានរត់ឆ្លងផ្លូវកាត់ពីមុខ ទាំងដែលម៉ូតូទៅជិតដល់ទៅហើយ ទើបពេលនោះមិនអាចជាន់ហ្វ្រាំងឈប់ ឬគេចចេញអត់ទាន់ ហើយក៏បានបុកគោញីនោះពេញទំហឹង បណ្ដាលឲ្យងាប់ភ្លាមៗនៅនឹងកន្លែង ចំណែកក្មេងប្រុសរូបនោះរងរបួសធ្ងន់ ហើយម៉ូតូក៏រងការខូចខាតផងដែរ ។
ក្រោយពេលកើតហេតុ ក្រុមសង្គ្រោះអង្គភាព ៧១១ បានដឹកបញ្ជូនក្មេងប្រុសខាងលើ បញ្ជូនទៅកាន់មន្ទីរពេទ្យ ដើម្បីសង្គ្រោះភ្លាមៗ បន្ទាប់មកនគរបាលប៉ុស្តិ៍ពងទឹក និងនគរបាលខណ្ឌដង្កោ បានចុះទៅពិនិត្យជាក់ស្ដែង និងបានប្រាប់ថា នាំយកម៉ូតូទៅរក្សាទុកនៅអធិការដ្ឋានខណ្ឌដង្កោ ។
ចំណែក គោញីដែលងាប់នោះ ត្រូវនាំយកទៅក្លាស្សេនៅប៉ុស្តិ៍ពងទឹក ដើម្បីទុកធ្វើការដោះស្រាយជាមួយជនរងគ្រោះ បើចាំបាច់ត្រូវលក់យកលុយជូនជនរងគ្រោះ ដើម្បីព្យាបាលរបួស ព្រោះរកម្ចាស់អត់ទាន់ឃើញនៅឡើយ ៕
ចែករំលែកព័តមាននេះ