ទីក្រុងសេអ៊ូល៖ ប្រធានាធិបតីកូរ៉េខាងត្បូង លោកយូនស៊ុកយូល បញ្ចេញប្រតិកម្មខ្លាំងតបទៅនឹងករណីដែលកូរ៉េខាងជើងបញ្ជូនទ័ពទៅជួយសម្ព័ន្ធមិត្តរុស្ស៊ីរបស់ខ្លួននៅក្នុងសង្គ្រាមដ៏បង្ហូរឈាមនៅអ៊ុយក្រែន។ លោកថ្លែងថារដ្ឋាភិបាលទីក្រុងសេអ៊ូលមិនអាចនៅស្ងៀមឈរឱបដៃមើលរុស្ស៊ី និងកូរ៉េខាងជើងប្រព្រឹត្តទង្វើបែបនេះបានឡើយ។ លោកថ្លែងដូច្នេះនៅក្នុងកិច្ចជំនួបទ្វេភាគីជាមួយថ្នាក់ដឹកនាំប៉ូឡូញដែលជាសម្ព័ន្ធមិត្តរបស់អ៊ុយក្រែនដើម្បីពង្រីកកិច្ចសហប្រតិបត្តិការយោធាជាមួយគ្នា។
កិច្ចជំនួបរវាងថ្នាក់ដឹកនាំកូរ៉េខាងត្បូង និងប៉ូឡូញនេះធ្វើឡើង១ថ្ងៃបន្ទាប់ពីមន្ត្រីរដ្ឋាភិបាលអាមេរិក និងកូរ៉េខាងត្បូងជឿជាក់ថាទាហានកូរ៉េខាងជើងបីពាន់នាក់ត្រូវគេដឹកតាមកប៉ាល់ចម្បាំងទៅដល់ប្រទេសរុស្ស៊ីហើយ ហើយកំពុងដាក់ពង្រាយជាបណ្ដើរៗនៅក្នុងជំរំហ្វឹកហ្វឺនដើម្បីត្រៀមបញ្ជូនបន្តទៅសមរភូមិក្ដៅនៅអ៊ុយក្រែន។
ទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូងបានឡើងរាយការណ៍ជូនរដ្ឋសភាកាលពីពេលថ្មីៗនេះថារបបក្រុងព្យុងយ៉ាងទំនងជាមានផែនការបញ្ជូនកងទ័ពរហូតដល់មួយម៉ឺននាក់ឯណោះទៅប្រទេសរុស្ស៊ីយ៉ាងយូរត្រឹមដំណាច់ឆ្នាំ២០២៤នេះ។ ទោះជាយ៉ាងណាក្ដី រដ្ឋាភិបាលទីក្រុងម៉ូស្គូ និងព្យុងយ៉ាងចេញមុខបដិសេធរបាយការណ៍នោះ។ ប្រទេសទាំង២អះអាងថារហូតមកដល់ពេលនេះគ្មានទាហានកូរ៉េខាងជើងនៅលើទឹកដីរុស្ស៊ីទេ។
លោកយូនស៊ុកយូលថ្លែងថាយើងឯកភាពថាករណីបញ្ជូនទ័ពកូរ៉េខាងជើងទៅរុស្ស៊ីជាការរំលោភធម្មនុញ្ញរបស់អង្គការសហប្រជាជាតិ និងសេចក្ដីសម្រេចរបស់ក្រុមប្រឹក្សាសន្តិសុខផង ហើយជាការបង្កភាពតានតឹងកាន់តែខ្លាំង។ លោកយល់ថាទង្វើនេះជាការគំរាមកំហែងចំពោះសន្តិសុខសាកល។ កូរ៉េខាងត្បូងនឹងសហការជាមួយក្រុមសម្ព័ន្ធមិត្ត និងប្រទេសជាដៃគូដើម្បីចាត់វិធានការឆ្លើយតបជាដំណាក់កាលៗ។
ជាដំបូង កូរ៉េខាងត្បូងរង់ចាំមើលជំហរនៃកិច្ចសហប្រតិបត្តិការយោធារវាងម៉ូស្គូ និងព្យុងយ៉ាងជាមុនសិន។ កូរ៉េខាងត្បូងនឹងឆ្លើយតបកម្រិតណាអាស្រ័យទៅលើកម្រិតសហការនោះ។ ខុទ្ទកាល័យរបស់លោកយូនស៊ុកយូលថ្លែងថារដ្ឋាភិបាលរបស់ខ្លួនកំពុងពិចារណាដាក់ចេញជម្រើសឆ្លើយតបតាមច្រើនវិធីដូចជាតាមការទូត សេដ្ឋកិច្ច និងយោធា។ ក្នុងនោះ កូរ៉េខាងត្បូងក៏កំពុងពិចារណាបញ្ជូនអាវុធទៅអ៊ុយក្រែន ជាប្រភេទអាវុធវាយការពារខ្លួន និងអាវុធវាយលុកទៅលើប្រទេសរុស្ស៊ី។
កាលពីពេលកន្លងមក កូរ៉េខាងត្បូងធ្លាប់ផ្ដល់ជំនួយទៅឱ្យអ៊ុយក្រែនជាជំនួយមនុស្សធម៌ និងជំនួយមិនមែនអាវុធ។ ម៉្យាងទៀត កូរ៉េខាងត្បូងគាំទ្រការដាក់ទណ្ឌកម្មសេដ្ឋកិច្ចរុស្ស៊ីពីបទវាយប្រហារអ៊ុយក្រែន។ សេអ៊ូលពុំដែលបានផ្ដល់អាវុធទៅជួយអ៊ុយក្រែនម្ដងណាឡើយដោយប្រកាន់ខ្ជាប់នូវគោលនយោបាយមិនផ្ដល់អាវុធទៅប្រទេសដែលកំពុងជាប់ដៃធ្វើសង្គ្រាម។
ប៉ុន្តែកូរ៉េខាងត្បូងឥឡូវនេះកំពុងខ្វាយខ្វល់យ៉ាងខ្លាំងនៅពេលក្រុមអ្នកជំនាញប្រមើលឃើញថារបបក្រុងព្យុងយ៉ាងបញ្ជូនទ័ពទៅរុស្ស៊ីលើកនេះមិនមែនឥតប្រយោជន៍ទេ។ រុស្ស៊ីអាចនឹងតបស្នងត្រឡប់មកវិញដោយផ្ដល់ជាលុយកាក់ បច្ចេកវិទ្យាផលិតអាវុធ ឬអាចឈានដល់ការផ្ដល់បច្ចេកវិទ្យានុយក្លេអ៊ែរថែមទៀត។ នៅក្នុងកិច្ចជំនួបទ្វេភាគីលើកនេះ ថ្នាក់ដឹកនាំប៉ូឡូញយល់ព្រមទទួលយកការបញ្ជូនគ្រឿងសព្វាវុធពីកូរ៉េខាងត្បូងដើម្បីពង្រឹងសមត្ថភាពការពារជាតិរបស់ប៉ូឡូញ៕
ចែករំលែកព័តមាននេះ