រាជធានីភ្នំពេញ ៖ ក្រុមជនសង្ស័យ៣នាក់ ជាមុខសញ្ញាគាស់ទ្វាររថយន្តលួចយកកាបូប ទូរស័ព្ទដៃ និងសម្ភារៈផ្សេងៗ ដែលម្ចាស់ទុកប្រហែសនៅក្នុងរថយន្ត ត្រូវនគរបាលការិយាល័យព្រហ្មទណ្ឌកម្រិតស្រាលឃាត់ខ្លួន កាលពីថ្ងៃទី១៨ ខែតុលា…
រាជធានីភ្នំពេញ ៖ ក្រុមជនសង្ស័យ៣នាក់ ជាមុខសញ្ញាគាស់ទ្វាររថយន្តលួចយកកាបូប ទូរស័ព្ទដៃ និងសម្ភារៈផ្សេងៗ ដែលម្ចាស់ទុកប្រហែសនៅក្នុងរថយន្ត ត្រូវនគរបាលការិយាល័យព្រហ្មទណ្ឌកម្រិតស្រាលឃាត់ខ្លួន កាលពីថ្ងៃទី១៨ ខែតុលា ឆ្នាំ២០២៤កន្លងទៅ ។លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានឲ្យដឹងថា ជនសង្ស័យជាមុខសញ្ញាទាំង៣នាក់នេះមាន ៖
១-ឈ្មោះ ឃិត ធា ភេទប្រុស អាយុ៤៦ឆ្នាំ ។
២-ឈ្មោះ ឆូយ សុផល ហៅ យ៉ាម៉ាហា ហៅស្វិត ភេទប្រុស អាយុ៣៨ឆ្នាំ ។
៣-ឈ្មោះ យិន ធី ហៅ តឿ ភេទប្រុស អាយុ៤២ឆ្នាំ ។
ពួកគេទាំង៣នាក់ ពុំមានកន្លែងស្នាក់នៅពិតប្រាកដទេ និងមានប្រវត្តិធ្លាប់ជាប់ពន្ធនាគារម្នាក់ៗ២ឆ្នាំ ពាក់ព័ន្ធនឹងបទល្មើសព្រហ្មទណ្ឌគឺបើកទ្វាររថយន្តលួច ហើយត្រូវបានដោះលែងវិញនៅក្នុងអំឡុងឆ្នាំ២០២២ និងឆ្នាំ២០២៣ ។
នៅចំពោះមុខសមត្ថកិច្ច ជនសង្ស័យសារភាពថា ក្រោយពេលចេញពីពន្ធនាគារវិញ ពួកគេបានប្រមូលផ្តុំគ្នាធ្វើសកម្មភាព ២ករណី ៖ ករណីទី១-លួចយកកាបូប និងទូរស័ព្ទដៃពីក្នុងរថយន្ត នៅមុខផ្ទះមួយ តាមផ្លូវលេខ១៩៦២ ភូមិក្រាំងអង្គ្រង សង្កាត់ក្រាំងធ្នង់ ខណ្ឌសែនសុខ កាលពីថ្ងៃទី១៣ ខែតុលា ឆ្នាំ២០២៤ វេលាម៉ោងប្រហែល២និង១៣រំលងអធ្រាត្រ យកបានប្រាក់ចំនួន ១៨៥០ដុល្លារអាមេរិក និង ៣០០ ០០០រៀល ទូរស័ព្ទដៃម៉ាកអាយហ្វូន១៤ប្រូម៉េក១គ្រឿង ទូរស័ព្ទដៃម៉ាកអុបប៉ូ១គ្រឿង និងទូរស័ព្ទដៃម៉ាក TECNO ១គ្រឿង ។
ករណីទី២-លួចយកកាបូប និងទូរស័ព្ទដៃពីក្នុងរថយន្តនៅមុខបន្ទាយ«ង៧០» ផ្លូវជាតិលេខ៣ សង្កាត់ចោមចៅទី២ ខណ្ឌពោធិ៍សែនជ័យ កាលពីថ្ងៃទី១៨ ខែតុលា ឆ្នាំ២០២៤ វេលាម៉ោង១២និង២០នាទីអធ្រាត្រ ។
នៅពេលឃាត់ខ្លួន សមត្ថកិច្ចបានដកហូតរថយន្តព្រូស ១គ្រឿង និងទូរស័ព្ទដៃ៦គ្រឿង ។ជន សង្ស័យ និងវត្ថុតាង ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ដែលគ្មានអ្វីសំណាងធំក្រៅពីជាប់គុកបន្តទៀតឡើយ ៕
ចែករំលែកព័តមាននេះ