(​បាងកក​)៖ ក្រោយ​ពី​សារព័ត៌មាន South China Morning Post ចុះ​ផ្សាយ​ថា ព្រះ​នាង​តូច​ជេន​ណា អាច​ក្លាយជា Lisa ទី​២ ក្នុង​វិស័យ K-pop សារព័ត៌មាន​ថៃ The Nation បាន​ហៅ​ព្រះ​នាង​ថា ជា Lisa តូច ។

កាលពី​ប៉ុន្មាន​ថ្ងៃមុន​នេះ អ្នក​និយម​លេង​បណ្តាញ​នៅ​កម្ពុជា បាន​នាំ​ចូល​ទៅ​បញ្ចេញ​តិ​រិះគន់​មិន​ពេញ​ចិត្តជា​ខ្លាំង​នៅ​លើ​ទំព័រ​ហ្វេ​ស​បុក​ផ្លូវការ​របស់​សារព័ត៌មាន Allkpop ដែល​បាន​ចុះ​ផ្សាយ​ក្រោម​ចំណងជើង «​សុ​បិ​ន្ត​ចង់​ក្លាយ​ជាលី​សា​បន្ទាប់​» ព្រះ​នាង​តូច​របស់​កម្ពុជា​អាយុ​១២​ឆ្នាំ គ្រោង​ផ្លាស់​យាង​ទៅ​ប្រទេស​កូរ៉េ​ខាងត្បូង ដើម្បី​ហ្វឹកហាត់​ក្លាយជា​តារា K-Pop» ។ ទាំង​ដែល​ពាក្យ​នេះ មិន​ដែល​ឮ​ចេញពី​មាត់​សាមីខ្លួន​ដែល​ជា​ព្រះ​នាង​តូច នរោត្តម ជេ​ណា ម្តងណា​សោះ ។

យ៉ាងណា​ក៏​ដោយ ក្រោយ​ពី​ឃើញ​ការ​ចុះ​ផ្សាយ​របស់​សារព័ត៌មាន​ខាងលើ និង​សារព័ត៌មាន​ជុំវិញ​ពិភពលោក​អំពី​ពាក្យ​ចចាមអារ៉ាម​ទាំងនោះ កាលពី​ថ្ងៃ​ទី​១៨ ខែតុលា ព្រះ​នាង​តូច ជេន​ណា ផ្ទាល់ បាន​ចេញ​មុខ​មក​ច្រានចោល​តាម​រយៈ​គណនី Weibo ដោយ​ព្រះ​នាង​បាន​បកស្រាយ​ថា «​ព្រះ​នាង​ពិតជា​ធ្លាប់​ទទួល​បានការ​អញ្ជើញ​ឱ្យ​ក្លាយជា​អ្នក​ហ្វឹក​ហ្វា​ត់​នៅ​K-Pop កាលពី​ឆ្នាំ​មុន​មែន ប៉ុន្តែ​ទ្រង់​បាន​បដិសេធ​មិន​យាង​ទៅ​នោះ​ទេ ដោយ​ទុក​ពេល​ផ្តោត​លើ​ការ​សិក្សា ។

ព្រះ​នាង​តូច ជេន​ណា សង្កត់ធ្ងន់​ច្បាស់​ៗ​ថា ទាំង​បច្ចុប្បន្ន ទាំង​ពេល​អនាគត ព្រះ​នាង គ្មាន​បំណង​ក្លាយ​ខ្លួន​ទៅ​ជាតា​រា K-Pop នោះ​ទេ​។ ប៉ុន្តែ​ទោះជា​ព្រះ​នាង​តូច​ជេន​ណា ចេញ​មក​បញ្ជាក់​ពី​ជំហរ​ច្បាស់​ៗ​យ៉ាងនេះ​ក្តី ឈាន​មក​ដល់​ថ្ងៃ​ទី​១៩ ខែតុលា ឆ្នាំ​២០២៤ ស្រាប់តែ​ព័ត៌មាន​របស់​ព្រះ​នាង​ពាក់ព័ន្ធ​នឹងវិស័យ​K-Pop បែរជា​ផ្ទុះ​ល្បី​នៅ​ប្រទេស​ថៃ បន្ទាប់​ពី​សារព័ត៌មាន​ថៃ The Nation បាន​បង្ហោះ​រូប​របស់​ព្រះ​នាង ដោយ​ភ្ជាប់​នឹង​អត្ថបទ​ព័ត៌មាន​មួយ ហើយ​ក្នុង​ខ្លឹមសារ​ដែល​បាន​រៀបរាប់​អ្នក​សរសេរ​អត្ថបទ​បាន​ប្រើ​ពាក្យ​មួយ​ឃ្លា​ថា «​ព្រះ​នាង​តូច​ជេន​ណា ជា «Lisa តូច​» ហើយ​ដែល​ពាក្យ​នេះ ហើយ​ក្លាយជា​ច​លករ​ធ្វើ​អោយ​ប្រជាជន​ផ្ទះ​លេខ​២ ផ្ទុះ​ការ​ខឹងសម្បារ ។

តាម​រយៈ​ផេ​ក​ហ្វេ​ស​បុក​ផ្លូវការ​សារព័ត៌មាន​ថៃ The Nation បាន​បញ្ជាក់​ថា ព្រះ​នាង​កម្ពុជា​អាយុ​១២​ឆ្នាំ សម្លឹង​មើល​អាជីព​ជាតា​រា K-pop ។ ព្រះ​នាង នរោត្ដម ជេន​ណា ដែល​ជា​ឥស្សរជន​ដ៏​មាន​ប្រជា​ប្រិយ​មួយ​រូប​នៅ​ក្នុង​ប្រទេស​កម្ពុជា ដែល​មាន​អ្នក​តាមដាន​តាម​បណ្តាញ​សង្គម​រាប់​លាន​នាក់​នោះ ត្រូវ​បាន​គេ​រាយការណ៍​ថា កំពុង​ពិចារណា​លើ​ការ​ហ្វឹកហាត់​នៅ​ប្រទេស​កូរ៉េ ដើម្បី​បន្ត​ក្តី​សុ​បិ​ន្ត​របស់​នាង​ក្នុង​ការ​បង្ហាញខ្លួន​ជាតា​រា​លំដាប់​ពិភពលោក ។

ដោយ​មាន​ជំនាញ​ច្រៀង និង​រាំ​គួរ​ឱ្យ​កត់សម្គាល់ និង​ភាព​ស្ទាត់ជំនាញ​ក្នុង​ប្រាំ​ភាសា ខ្សែ​រាជវង្ស​វ័យក្មេង​រូប​នេះ កំពុង​ឈាន​ឆ្ពោះទៅ​ប្រលូក​ក្នុង​ពិភព K-Pop នេះ​បើ​យោង​តាម​បណ្តាញសារព័ត៌​មាន​តៃវ៉ាន់ Sanli News Network​។ អ្វី​ដែល​ធ្វើ​ឱ្យ​អ្នក​និយម​លេង​បណ្តាញ​សង្គម​ផ្ទះ​លេខ​២ កើត​ទុក​មិន​សុខចិត្ត​នោះ គឺ​ត្រង់​ថា សារព័ត៌មាន​ថៃ The Nation​នេះ បាន​សរសេរ​រៀបរាប់ សរសើរ ព្រះ​នាង​តូច​ជេន​ណា​ថា « ជា​រឿយ​ៗ ព្រះ​នាង ត្រូវ​បាន​គេ​ចាត់​ទុក​ថា ជា “Lisa តូច​” របស់​ប្រទេស​កម្ពុជា ដោយសារ​តែ​សមត្ថភាព​រាំ​របស់​នាង និង​ភាព​ស្រ​ដៀង​ទៅ​នឹង Lisa សមាជិក​ក្រុម BLACK
PINK ។ ព្រះ​នាង Jenna ទទួល​បានការ​ចាប់អារម្មណ៍​យ៉ាង​ខ្លាំង​ចំពោះ​រូបរាង​ដ៏​ពិសេស និង​ទេព​កោសល្យ​សម្តែង​របស់​ព្រះ​នាង ។

អ្នកគាំទ្រ​កំពុង​ប្រៀបធៀប​ព្រះ​នាង​ទៅ​នឹង​តារា K-pop ដើម​កំណើត​អាស៊ី ដូច​ជា Lisa សមាជិក​ក្រុម BLACKPINK និង Minnie សមាជិក​ក្រុម (G)I-DLE ដោយ​រំពឹង​ថា ព្រះ​នាង​នឹង​ទទួល​បាន​ភាព​ល្បីល្បាញ​ស្រ​ដៀង​គ្នា ។ នៅ​ឆ្នាំ​នេះ នាង​បាន​បង្ហាញ​ពី​ទេព​កោសល្យ​របស់​នាង​បន្ថែម​ទៀត​តាម​រយៈ​ការ​ឈ្នះ​ពានរង្វាន់​តារា​សម្តែង​ចំណូល​ថ្មី​ល្អ​បំផុត នៅ​មហោស្រព​ភាពយន្ត​កម្ពុជា​-​អាស៊ី​លើក​ទី​២ សម្រាប់​តួនាទី​របស់​នាង​ក្នុង​ខ្សែភាពយន្ត​ភ័យរន្ធត់ «​បណ្តាសា​នាង​រាត្រី​» ។

ស្រប​ពេល​ដែល​ព្រះ​នាង​បន្ត​កើនឡើង​នៃ​ប្រជាប្រិយភាព និង​ភាព​ល្បី​ល្បាយ​ទាំង​ក្នុង​វិស័យ​ចម្រៀង និង​សិល្បៈ​សម្ដែង​នោះ ព្រះ​នាង នរោត្ដម ជេន​ណា ត្រៀម​ក្លាយជា​មុខមាត់​ថ្មី​ក្នុង​វិស័យ​សិល្បៈ​ពិភពលោក​។​» តាម​រយៈ​ការ​ចុះ​ផ្សាយ​នេះ យើង​ឃើញ​ថា មាន​អ្នកលេង​ហ្វេ​ស​បុក​ជា​ច្រើន​អ្នក​បាន​ចូល​ទៅ​ខម​មិន​ដោយ​ភាគច្រើន​បាន​កោតសរសើរ​ព្រះ​នាង ប៉ុន្តែ​ខណៈ​ដែល​ជនជាតិ​ថៃ​ជា​ច្រើន​នាក់ បែរជា​សម្តែង​ប្រតិកម្ម​ជា​អវិជ្ជមាន​ទៅ​វិញ ដោយ​បាន​ប្រើប្រាស់​ពាក្យ​ពេ​ជន៍​អសុរោះ និង​ខឹងសម្បារ ទៅ​លើ​សារព័ត៌មាន​មួយ​នេះ រហូត​សារព័ត៌មាន The Nation បាន​សម្រេចចិត្ត​លុប​ចោល​នូវ​ការ​បង្ហោះ​ខាងលើ ចេញ​ទំព័​ហ្វេ​ស​បុក របស់​ខ្លួន​នៅ​ព្រឹក​ថ្ងៃ​ទី​២០ ខែតុលា ឆ្នាំ​២០២៤៕ ​