រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានអារម្មណ៍រំភើបចង់ស្រក់ទឹកភ្នែក ពេលឃើញទម្រង់ផ្សេងៗនៃសិល្បៈ ផ្គុំជាមួយនឹងក្បាច់គុន បង្ហាញភាពសម្បូរបែបនៃក្បាច់គុនវប្បធម៌បុរាណរបស់ដូនតាយើង ។ ការរំភើបអារម្មណ៍នាក្នុងឱកាសអញ្ជើញជាអធិបតីក្នុងពិធីបិទការប្រកួតកីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចមហាបវរធិបតី» លើកទី១ ឆ្នាំ២០២៤ នៅវិមានពហុកីឡដ្ឋានជាតិ «អូឡាំពិក» នាព្រលប់ថ្ងៃទី២០ ខែតុលា ឆ្នាំ២០២៤ ។
សម្ដេចមហាបវរធិបតី នាយករដ្ឋមន្ត្រី បានថ្លែងយ៉ាងដូច្នេះថា កិច្ចការធំបំផុត គឺចង់បង្ហាញអំពីភាពសម្បូរបែបអំពីក្បាច់គុនរបស់ខ្មែរឱ្យបានច្រើនបែបច្រើនទម្រង់ ដែលដូនតាខ្មែរបានបន្សល់ទុកជាកេរដំណែល ។
សម្ដេចមហាបវរធិបតី បានបង្ហាញអារម្មណ៍យ៉ាងដូច្នេះ ៖«និយាយរួមខ្ញុំរំភើបចង់ស្រក់ទឹកភ្នែកព្រោះឃើញក្បាច់គុននិយាយរួមសង្ខេបខ្លីតែម្តងនៅក្នុងការសម្តែងតែប្រហែលមិនដល់១០នាទីនេះឃើញទម្រង់ផ្សេងៗសិល្បៈយើងមានល្ខោនខោល យើងមានរបាំអប្សរា ផ្គុំជាមួយនឹងក្បាច់គុនរបស់យើង សុទ្ធតែអ្វីដែលដូនតាយើងរៀបចំឱ្យទាំងអស់ អត់មានត្រូវការបំបែកគ្នា សិល្បៈវប្បធម៌ក្បាច់គុនទេ គឺនៅជាធ្លុងមួយគ្រប់ប្រភេទនៃទម្រង់សិល្បៈ ប្រភេទនៃទម្រង់ ក្បាច់គុនមកជាមួយគ្នា អ្នកហាត់ក្បាច់គុណព្រឹទ្ធាចារ្យ ក្បាច់គុនគ្រប់ជំនាន់ ច្រើនជំនាន់ ចូលជាមួយគ្នានៅថ្ងៃនេះ នេះហើយការសម្តែង ជាពិសេសនៅក្រោមទង់ជាតិប្រាសាទអង្គរវត្តរបស់យើង នេះហើយស្មារតីដែលយើងចង់បង្ហាញភាពសម្បូរបែបនៃក្បាច់គុនវប្បធម៌បុរាណដូនតារបស់យើងដែលយើងចូលគ្នាខ្ញុំសូមអរគុណណាស់ចំពោះការរៀបចំនេះ» ។
សូមរម្លឹកថា ការប្រកួតយុទ្ធគុនចម្រុះបុរាណខ្មែរពានរង្វាន់សម្តេចមហាបវរធិបតី រៀបចំឡើងក្រោមគំនិតផ្តួចផ្តើមដ៏ខ្ពង់ខ្ពស់ប្រកបដោយចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក្នុងគោលដៅលើកកម្ពស់ អភិរក្ស និងអភិវឌ្ឍ «មរតកយុទ្ធគុនដូនតាខ្មែរ» ។
ការប្រកួតនេះប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៨-២០ ខែតុលា នៅពហុកីឡដ្ឋានជាតិអូឡាំពិក ដោយមានប្រតិភូ មន្ដ្រីបច្ចេកទេស គ្រូបង្វឹក និងកីឡាករ-កីឡាការិនីចូលរួមសរុប ៧២២នាក់ ៕
ចែករំលែកព័តមាននេះ