ជាការពិតការពីពេលថ្មីៗនេះ លោកយាយមួយរូបលះបង់ពេលវេលា ដោយធាក់កង់ជូនចៅមកប្រឡងធ្វើតេស្ត ខណៈលោកយាយបានលើកឡើងបែបនេះ ។
តាមរយៈការបង្ហោះរបស់លោកគ្រូ មួយបានលើកឡើងនៅក្នុងបណ្តាញសង្គម របស់លោកថា« ទឹកចិត្តលោកយាយ ដើម្បីចៅលោកយាយពិតជាស្រលាញ់ចៅណាស់ខំជូនចៅមកប្រឡង តេស្តទី៦ ឡើងទី៧ នៅមណ្ឌល វិ ហ៊ុន សែន វាលរេញ ដោយក្តីសប្បាយរីករាយ សប្បាយចិត្ត ខ្ញុំឃើញហើយពិតជារំភើប និងកោតសសើរលោកយាយណាស់ ។
លោកយាយនិយាយថា ជំនាន់លោកយាយ មិនមានសាលាស្អាតរៀនទេ ចៅពិតជាមានសំណាងណាស់ បានមករៀននៅសាលាដ៏ស្រស់ស្អាតនេះ (ប្រទេសមានសន្តិភាព)» ។
ជាការពិត លោកយាយរូបនេះអាចនឹងយល់ពីតម្លៃនៃការសិក្សាច្បាស់ ទើបលោកយាយលើកឡើងថា« ជំនាន់លោកយាយមិនមានសាលាស្អាតរៀនទេ ចៅពិតជាមានសំណាងណាស់ បានមករៀននៅសាលាដ៏ស្រស់ស្អាតនេះ» ។
តាមរយៈបទសម្ភាសន៍ជាមួយនឹងសារព័ត៌មានកោះសន្តិភាព លោក ងាម ស៊ីដារ៉ា នាយកវិទ្យាល័យ ហ៊ុន សែន វាលរេញ មានប្រសាសន៍ថា កាលពីកន្លងទៅ ថ្ងៃទី១១ ខែតុលា ឆ្នាំ២០២៤ គឺមានការរៀបចំតេស្តប្រឡងសម្រាប់ប្អូនៗសិស្សានុសិស្ស ដែលបញ្ចប់ថ្នាក់ទី៦ ចូលទី៧ នៃវិទ្យាល័យហ៊ុនសែន វាលរេញ ដែលស្ថិតក្នុងស្រុកព្រៃនប់ ខេត្តព្រះសីហនុ ។
លោកនាយកវិទ្យាល័យព្រៃនប់ បន្តទៀតថា ក្នុងថ្ងៃប្រឡងនោះទៀតសោត គឺមានម្តាយឪពុក អាណាព្យាបាលជាច្រើនរយនាក់បានមកចូលរួមលើកទឹកចិត្តកូនៗដែលប្រឡង ។
អ្វីដែលគួរអោយកត់សម្គាល់នៅថ្ងៃនោះ លោកថា មានលោកយាយមួយព្រះជន្មប្រហែលជាង៨០ឆ្នាំ បានមកលើកទឹកចិត្តចៅ ដូច្នេះលោកក៏អនុញ្ញាតអោយលោកយាយចូលមកខាងក្នុងបានឃើញពីទិដ្ឋភាពនៃការប្រឡង ។
លោកយាយបាននិយាយថា« លោកយាយពិតជាសប្បាយចិត្តណាស់ ពេលបានឃើញចៅអង្គុយនៅកន្លែងស្អាត គួរអោយចង់រៀន ខណៈពេលជំនាន់លោកយាយពុំបានរៀនសូត្រខ្ពង់ខ្ពស់ឡើយ ដោយពើបប្រទះតែសង្គ្រាម ដូច្នេះលោកយាយថា ចៅពិតជាសំណាងណាស់ ដែលមានឪកាសរៀនសូត្រនៅទីនេះ»។
គួរបញ្ជាក់ដែរថា វិទ្យាល័យ ហ៊ុន សែន វាលរេញ ពិតជាយកចិត្តទុកដាក់ចំពោះសិស្សានុសិស្ស ដោយក្រៅពីតេស្តប្រឡងនោះលោកនាយកគណៈគ្រប់គ្រង និងលោកគ្រូអ្នកគ្រូ ក៏បានចូលរួមប្រជុំផងដែរ ជាមួយអាណាព្យាបាលសិស្ស ដែលមកពីកន្លែងផ្សេងៗដើម្បីតាមដានការសិក្សារបស់សិស្សដែលមកប្រឡងកម្រិតថ្នាក់ទី៦ ឈានចូលអនុវិទ្យាល័យ ៕ ដោយ៖លីហួ គីមឆាយ
ចែករំលែកព័តមាននេះ