រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពកាច់សោ.កម៉ូតូ១គ្រឿង បានសម្រេច ព្យាយមជិះរត់គេច ប៉ុន្តែចុងក្រោយជាប់ខ្នោះរបស់សមត្ថកិច្ចនាយកដ្ឋានព្រហ្មទណ្ឌ កាលពីវេលាម៉ោង១១និង៣៥នាទីថ្ងៃទី១៨ ខែតុលា ឆ្នាំ២០២៤ កម្លាំងសមត្ថកិច្ចចុះល្បាតតាមបណ្តោយផ្លូវសហព័ន្ធរុស្ស៊ី…
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពកាច់សោ.កម៉ូតូ១គ្រឿង បានសម្រេច ព្យាយមជិះរត់គេច ប៉ុន្តែចុងក្រោយជាប់ខ្នោះរបស់សមត្ថកិច្ចនាយកដ្ឋានព្រហ្មទណ្ឌ កាលពីវេលាម៉ោង១១និង៣៥នាទីថ្ងៃទី១៨ ខែតុលា ឆ្នាំ២០២៤ កម្លាំងសមត្ថកិច្ចចុះល្បាតតាមបណ្តោយផ្លូវសហព័ន្ធរុស្ស៊ី ក្នុងសង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។
លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋានព្រហ្មទណ្ឌ បានប្រាប់អោយដឹងថា លោកបានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់ ដែលមានលោកវរសេនីយ៍ឯក ញ៉ែម វ៉ន នាយការិយាល័យព្រហ្មទណ្ឌកម្រិតធ្ងន់ ធ្វើការល្បាតតាមដងផ្លូវ ពេលនោះក៏ប្រទះឃើញជនសង្ស័យ ជិះម៉ូតូចំនួន១គ្រឿង មានគ្នាចំនួន ២នាក់ ធ្វើសកម្មភាព ចុះកាច់សោ.កម៉ូតូដែលចតទុកចោលមុខផ្ទះ បានសម្រេច។ ភ្លាមៗនោះ កម្លាំងជំនាញធ្វើការប្រដេញ និងឃាត់ខ្លួនជនសង្ស័យម្នាក់ នៅចំណុចម្តុំបុរីកីឡា ក្នុងសង្កាត់វាលវង់ ខណ្ឌ៧មករា ។
លោកឧត្តមសេនីយ៍ត្រី ប៊ុត វណ្ណារដ្ឋ បានប្រាប់បន្តថា ជនសង្ស័យ ដែលឃាត់ខ្លួនបាន មានឈ្មោះ សៅ វាសនា អាយុ២១ឆ្នាំ មុខរបរមិនពិតប្រាកដ ទីកន្លែងស្នាក់នៅផ្ទះជួលមិនចាំលេខ ផ្លូវលំ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ (ជាជនដៃដល់ និងមុខសញ្ញាចាស់ធ្លាប់ជាពន្ធធាគារ) ។ រីឯជនសង្ស័យម្នាក់ទៀតឈ្មោះសុខដែលជាអ្នកឌុប បានរត់គេចខ្លួនបាត់ ។
ក្នុងនោះដកហូត ម៉ូតូម៉ាកហុងដាឌ្រីម ពណ៌ក្រហម ពាក់ស្លាកលេខ ភ្នំពេញ1AV-6785 (របស់ជនរងគ្រោះ), ដែកស្រួច+សោរ ចំនួន2(របស់ជនសង្ស័យ) ។
បច្ចុប្បន្ន កម្លាំងជំនាញបាននាំជនសង្ស័យមកនាយកដ្ឋាននគរបាលព្រហ្មទណ្ឌ ដើម្បីធ្វើការសាកសួរ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ចាត់ការតាមនីតិវិធី ៕
ចែករំលែកព័តមាននេះ