រាជធានីភ្នំពេញ ៖ ស្ថិតក្នុងក្របខណ្ឌអាស៊ាន-ជប៉ុន ភាគីកម្ពុជាលើកទឹកចិត្តជប៉ុនឱ្យរួមចំណែកជាមួយអាស៊ាន ក្នុងការកសាងបណ្តាញអគ្គិសនីអាស៊ាន ។ នៅក្នុងកិច្ចប្រជុំកំពូលអាស៊ាន-ជប៉ុនលើកទី២៧ សម្តេចធិបតី ហ៊ុន ម៉ាណែត…
រាជធានីភ្នំពេញ ៖ ស្ថិតក្នុងក្របខណ្ឌអាស៊ាន-ជប៉ុន ភាគីកម្ពុជាលើកទឹកចិត្តជប៉ុនឱ្យរួមចំណែកជាមួយអាស៊ាន ក្នុងការកសាងបណ្តាញអគ្គិសនីអាស៊ាន ។
នៅក្នុងកិច្ចប្រជុំកំពូលអាស៊ាន-ជប៉ុនលើកទី២៧ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានលើកទឹកចិត្តជប៉ុន ឱ្យរួមចំណែកដល់កិច្ចខិតខំប្រឹងប្រែងរបស់អាស៊ាន ក្នុងការកសាងបណ្តាញអគ្គិសនីអាស៊ាន ។ នេះបើយោងតាមលទ្ធផលនៃកិច្ចប្រជុំកំពូលអាស៊ាន-ជប៉ុន លើកទី២៧ របស់ក្រសួងការបរទេសកម្ពុជា កាលពីថ្ងៃទី១០ តុលា ឆ្នាំ២០២៤ ។
ប្រភពបានឱ្យដឹងថា «សម្តេចធិបតីនាយករដ្ឋមន្ត្រីកម្ពុជាបានកោតសរសើរចំពោះការរួមចំណែករបស់ជប៉ុនក្នុងផែនការមេ ស្តីពីការតភ្ជាប់អាស៊ាន (MPAC) ឆ្នាំ២០២៥ ហើយក្នុងន័យនេះ បានទន្ទឹងរង់ចាំការសម្រេចបាន នូវកិច្ចព្រមព្រៀងសេវាកម្ម ដឹកជញ្ជូនតាមផ្លូវអាកាសអាស៊ាន-ជប៉ុន ដែលកាន់តែមានលក្ខណៈសេរី និងផ្តល់ផលប្រយោជន៍ទៅវិញទៅមក ដែលសម្រួលដល់លំហូរពាណិជ្ជកម្ម និងទំនាក់ទំនងរវាងប្រជាជន និងប្រជាជន។
ក្រសួងការបរទេសកម្ពុជាបានបញ្ជាក់ថា «ក្នុងរបៀបវារៈបៃតង សម្តេចធិបតីបានសម្តែងការកោតសរសើរ ចំពោះការប្តេជ្ញាចិត្តរបស់ជប៉ុន ក្នុងការជួយដល់អាស៊ាន ក្នុងការកាត់បន្ថយកាបូន និងបានលើកទឹកចិត្តជប៉ុន ឱ្យរួមចំណែកដល់កិច្ចខិតខំប្រឹងប្រែងរបស់អាស៊ាន ក្នុងការកសាងបណ្តាញអគ្គិសនីអាស៊ាន»។
ជាមួយគ្នានេះ លទ្ធផលដដែលនេះ បានបញ្ជាក់បន្ថែមថា «សម្តេចធិបតី បានគូសបញ្ជាក់ផងដែរថា ចំណងមិត្តភាពរវាងប្រជាជន និងប្រជាជននៅតែជាសសរស្តម្ភដ៏សំខាន់ នៃភាពជាដៃគូ ហើយពេញចិត្តចំពោះការអនុវត្ត ប្រកបដោយប្រសិទ្ធភាពនូវភាពជាដៃគូ ដើម្បីសហបង្កើតថ្មី នូវអនាគតមួយជាមួយនឹងជំនាន់ក្រោយ គម្រោង WA 2.0 ដែលនឹងផ្តល់កាលានុវត្តភាព ដល់មនុស្សចំនួន ១០លាននាក់ ជាពិសេស អ្នកដឹកនាំជំនាន់ក្រោយ នៃតំបន់អាស៊ីអាគ្នេយ៍ និងជប៉ុន ដើម្បីធ្វើទំនាក់ទំនង និងស្វែងយល់ពីគ្នាទៅវិញទៅមក កាន់តែប្រសើរឡើង» ៕
ចែករំលែកព័តមាននេះ