រាជធានីភ្នំពេញ ៖ អភិបាលរង រាជធានីភ្នំពេញ បានឱ្យដឹងថា ក្នុងសម័យប្រឡងមធ្យមសិក្សាទុតិយភូមិន្ទ ឆ្នាំ២០២៤នេះ មន្ត្រីជំនាញគ្រប់ផ្នែក នៃរដ្ឋបាលរាជធានីភ្នំពេញ បានចូលរួមបំពេញការងារយ៉ាងសកម្ម…
រាជធានីភ្នំពេញ ៖ អភិបាលរង រាជធានីភ្នំពេញ បានឱ្យដឹងថា ក្នុងសម័យប្រឡងមធ្យមសិក្សាទុតិយភូមិន្ទ ឆ្នាំ២០២៤នេះ មន្ត្រីជំនាញគ្រប់ផ្នែក នៃរដ្ឋបាលរាជធានីភ្នំពេញ បានចូលរួមបំពេញការងារយ៉ាងសកម្ម តាមរយៈការរៀបចំ សន្តិសុខសណ្តាប់ធ្នាប់ និងសុវត្ថិភាព នៅមណ្ឌលប្រឡងបានយ៉ាងល្អប្រសើរមានរបៀបរៀបរយ ដែលធ្វើឱ្យដំណើរការប្រឡងបានប្រព្រឹត្តទៅដោយរលូនតាមផែនការ ដែលបានគ្រោងទុក ។
លោក សុខ ពេញវុធ អភិបាលរង រាជធានីភ្នំពេញ បានថ្លែងដូច្នេះ ក្នុងឱកាសអញ្ជើញជាតំណាងលោក ឃួង ស្រេង អភិបាលរាជធានីភ្នំពេញ ចូលរួមក្នុងកិច្ចប្រជុំក្រុមប្រឹក្សារាជធានីភ្នំពេញ នាថ្ងៃទី១០ ខែតុលា ឆ្នាំ២០២៤នេះ នៅសាលរាជធានីភ្នំពេញ ។
ក្នុងកិច្ចប្រជុំនោះ លោកអភិបាលរង បានថ្លែងថា រដ្ឋបាលរាជធានីភ្នំពេញ បានចាត់ចែងកម្លាំង នៅតាមបណ្តាខណ្ឌទាំង១៤ ក្នុងភូមិសាស្ត្ររាជធានីភ្នំពេញ ដើម្បីការពារសុវត្ថិភាព និងសន្តិសុខសណ្តាប់ ធ្នាប់ជូនបេក្ខជនប្រឡងបាក់ឌុប នៅតាមមណ្ឌលប្រឡង នាថ្ងៃទី៨ និងថ្ងៃទី៩ ខែតុលា ឆ្នាំ២០២៤នេះ បានយ៉ាងល្អ បើទោះបីមានបេក្ខជនមួយចំនួន មានបញ្ហាសុខភាពរហូតដល់១៩២នាក់ក៏ដោយ ក៏មន្ទីរសុខាភិបាលរាជធានីភ្នំពេញ បានចាត់ចែងរថយន្តសង្គ្រោះបន្ទាន់ និងគ្រូពេទ្រធ្វើការសង្គ្រោះបឋមនៅតាមមណ្ឌលប្រឡងបានយ៉ាងល្អ ។
ទន្ទឹមនឹងនេះ លោកបានបញ្ជាក់ថា នៅតាមមណ្ឌលប្រឡងទាំងអស់ ក្នុងភូមិសាស្ត្ររាជធានីភ្នំពេញ គ្មានករណីយកលុយ ការផ្ញើកងម៉ូតូ រថយន្ត ពីបេក្ខជនប្រឡង និងអាណាព្យាបាល សិស្សឡើយ ដោយរដ្ឋបាលរាជធានីភ្នំពេញ បានផ្គត់ផ្គង់ថវិកា ក្នុង១មណ្ឌលប្រឡងចំនួន១លានរៀល ។
លោក សុខ ពេញវុធ បានបន្ថែមថា ដោយមានករណីភ្លៀងខ្លាំងៗ ជាប់គ្នា នៅមុនថ្ងៃប្រឡង និងថ្ងៃប្រឡង កងកម្លាំង អាជ្ញាធរខណ្ឌ និងមន្ត្រីជំនាញរដ្ឋបាលរាជធានីភ្នំពេញ ក៏បានដោះស្រាយបញ្ហាភ្លាមៗ ដោយបានបូមទឹក និងច្រកបាវខ្សាច់នៅមណ្ឌលប្រឡងលិចទឹក ដោយទឹកភ្លៀងចំនួន៤មណ្ឌលបានយ៉ាងទាន់ពេលវេលា ដើម្បីកុំឱ្យរំខានដល់ដំណើរការប្រឡងរបស់សិស្សានុសិស្ស ។
លោកបន្តទៀតថា ក្រោមការចង្អុលបង្ហាញពីលោក ឃួង ស្រេង អភិបាលរាជធានីភ្នំពេញ ជុំវិញដំណើរការប្រឡងបាក់ឌុបនៅរាជធានីភ្នំពេញនេះ បានធ្វើឱ្យរដ្ឋបាលរាជធានីភ្នំពេញ ទទួលបានការកោតសរសើរពីប្រធានមណ្ឌលប្រឡង ពីរដ្ឋមន្ត្រីក្រសួងអប់រំ យុវជន និងកីឡា តំណាងអង្គភាពប្រឆាំងអំពើពុករលួយ ពិសេសពីបេក្ខជនប្រឡង និងអាណាព្យាបាលសិស្ស ។
នៅក្នុងឱកាសនោះដែរ លោក សុខ ពេញវុធ ក៏បានឱ្យដឹងដែរថា ក្នុងខែកញ្ញា ឆ្នាំ២០២៤ កន្លងទៅនេះ រដ្ឋបាលរាជធានីភ្នំពេញ សម្រេចបានការងារជោគជ័យជាច្រើន ហើយទទួលការសារទរ ពីប្រជាពលរដ្ឋ ដូចជា ការៀបចំរថយន្តក្រុងសាធារណៈ ដឹកប្រជាពលរដ្ឋទៅលេងស្រុកកំណើត នាឱកាសបុណ្យភ្ជុំបិណ្ឌ ដោយឥតគិតថ្លៃ ការផ្តល់សេវាសាធារណៈ បានល្អប្រសើរ និងការរក្សាបានសន្តិសុខ សណ្តាប់ធ្នាប់ និងសុខសុវត្ថិភាព ជូនប្រជាពលរដ្ឋនាឱកាសបុណ្យកាន់បិណ្ឌ និងភ្ជុំបិណ្ឌ ដែលពុំមានបញ្ហា បទល្មើសព្រហ្មទណ្ឌណាមួយកើតឡើងឡើយ ដែលធ្វើឱ្យពុទ្ធបរិស័ទ បានទៅធ្វើបុណ្យ ប្រកបដោយ សទ្ធាជ្រះថ្លា និងសប្បាយរីករាយ ។
លោក ម៉ប់ សារិន ប្រធានក្រុមប្រឹក្សារាជធានីភ្នំពេញ បានសម្តែងការកោតសរសើរ ចំពោះថ្នាក់ដឹកនាំរដ្ឋបាលរាជធានីភ្នំពេញ ដែលបានបំពេញការងារបានយ៉ាងល្អ ក្នុងការបម្រើសេវានានា ជូនប្រជាពលរដ្ឋនៅមូលដ្ឋានប្រកបដោយប្រសិទ្ធភាពខ្ពស់ ។
លោកប្រធានក្រុមប្រឹក្សាបានបញ្ជាក់ថា ភាពជោគជ័យ នៃការងាររបស់របស់រដ្ឋបាលរាជធានីភ្នំពេញនេះ បានធ្វើឱ្យប្រជាពលរដ្ឋមានការកោតសរសើរ និងសាទរជាខ្លាំង ដែលបង្ហាញថា អាជ្ញាធរបានយកចិត្តទុកដាក់ជាខ្លាំងចំពោះសុខទុក្ខរបស់ប្រជាពលរដ្ឋ ៕
ចែករំលែកព័តមាននេះ