រាជធានីភ្នំពេញ ៖ បុរសជាជាងជួសជុលទូរស័ព្ទដៃម្នាក់ បានជិះម៉ូតូ១គ្រឿង បញ្ច្រាស់ទិសដៅចរាចរណ៍សសៀរក្បែរសួនពុះចែកទ្រូងផ្លូវ ក្នុងបំណងឆ្លងផ្លូវ ហើយជាអកុសលក៏បានជ្រុលបុ.កជាមួយរថយន្ត១គ្រឿងពេញទំហឹង បណ្ដាលឱ្យខ្ទាតផ្លោងបោកក្បាលផ្ទប់កញ្ចក់រថយន្ត រួចធ្លាក់បោកផ្ទប់ថ្នល់១តង់ទៀត ស្លា.ប់បាត់បង់ជីវិតភ្លាមៗនៅនឹងកន្លែងកើតហេតុតែម្ដង ។
ខណៈនោះរថយន្តខាងលើពុំបានបើករត់នោះទេ គឺបានឈប់ស្ងៀមនៅនឹងកន្លែង ប៉ុន្តែអ្នកបើកបរបានរត់គេចខ្លួនបាត់ស្រមោល ។ ឧប្បត្តិហេតុគ្រោះថ្នាក់ចរាចរខាងលើនោះបានកើតឡើង កាលពីវេលាម៉ោង៥ល្ងាច ថ្ងៃទី១៥ ខែតុលា ឆ្នាំ២០២៤ នៅលើកំណាត់ផ្លូវជាតិលេខ៣ ត្រង់ចំណុចមុខហាងនុំប៉័ងស្ទឹងមានជ័យ ស្ថិតនៅក្នុងភូមិព្រៃព្រីងខាងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះឈ្មោះ កុង ស៊ុន អាយុជាង៣០ឆ្នាំ មុខរបរជាងជួសជុលទូរស័ព្ទ នៅក្នុងផ្សារចោមចៅ សង្កាត់ចោមចៅទី២ ខណ្ឌពោធិ៍សែនជ័យ ។ មានស្រុកកំណើតនៅភូមិអំពិលផ្អែម ឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ និងស្នាក់នៅក្នុងបុរីពិភពថ្មីភូមិព្រៃកី «ខ» សង្កាត់ពងទឹក ខណ្ឌដង្កោ រាជធានីភ្នំពេញ ។
បុរសម្នាក់ដែលជាអ្នកឃើញហេតុការណ៌ខាងលើនោះ បានប្រាប់ឲ្យដឹងថា នៅមុនពេលកើតហេតុបុរសរងគ្រោះបានជិះម៉ូតូ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខកំពង់ស្ពឺ1M-9818 ។ ធ្វើដំណើរពីទិសខាងជើងឆ្ពោះទៅទិសខាងត្បូង ដោយបើកបរសសៀរក្បែរសួនច្បារពុះចែកទ្រូងផ្លូវ ក្នុងទិសដៅបញ្ច្រាស់ទិសដៅចរាចរ ក្នុងគន្លងផ្លូវអាទិ៍ភាពរបស់រថយន្តដើម្បីឆ្លងផ្លូវ ។ បុរសនោះបានប្រាប់ឲ្យដឹងបន្តទៀតថា លុះពេលទៅដល់ត្រង់ចំណុចកើតហេតុក៏បានជ្រុលទៅបុកជាមួយរថយន្ត១គ្រឿង ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខភ្នំពេញ2BJ-0248 ។ ដែលកំពុងបើកបរក្នុងទិសដៅពីត្បូងទៅជើងពេញទំហឹង បណ្ដាលឲ្យខ្ទាតផ្លោងបោកក្បាលផ្ទប់កញ្ចក់មុខរថយន្ត រួចធ្លាក់បោ.កផ្ទប់ថ្នល់១តង់ទៀត ហើយស្លា.ប់ភ្លាមៗនៅនឹងកន្លែងតែម្ដង ។
នគរបាលខណ្ឌពោធិ៍សែនជ័យបានប្រាប់ឲ្យដឹងផងដែរថា រថយន្តបានរងការខូចខាតក្រពឹតថ្ពាល់បន្តិច និងបែកកញ្ចក់ព្រមទាំងដាច់ធ្លាក់កាងមុខ ហើយអ្នកបើកបរបានចុះរត់គេចខ្លួនបាត់ដោយសុវត្ថិភាព ។
ដោយឡែកម៉ូតូក៏បានរងការខូចខាតយ៉ាងដំណំដែរ ហើយក្រោយពេលកើតហេតុ នគរបាលខណ្ឌពោធិ៍សែនជ័យ និងប៉ុស្តិ៍ចោមចៅទី២ បានចុះទៅសម្រួលចារចរ ។ បន្ទាប់មកនគរបាលការិយាល័យចរាចរផ្លូវគោកនៃស្នងការដ្ឋានរាជធានីភ្នំពេញ បានចុះទៅធ្វើការវាស់វែង និងនាំយករថយន្ត និងម៉ូតូទៅរក្សាទុករង់ចាំការដោះស្រាយនៅពេលក្រោយ ព្រមទាំងប្រគល់ស.ពឲ្យក្រុមគ្រួសារបាននាំយកស.ពទៅធ្វើបុណ្យតាមប្រពៃណី ៕
ចែករំលែកព័តមាននេះ