រាជធានីភ្នំពេញ ៖ សម្តេចបរវធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញបទបញ្ជាថា មានតែទាហានជាន់ខ្ពស់តែប៉ុណ្ណោះ ដែលអាចប្រើប្រាស់ផ្លាកលេខរថយន្តខេមរភូមិន្ទ (ខម)បាន…
រាជធានីភ្នំពេញ ៖ សម្តេចបរវធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញបទបញ្ជាថា មានតែទាហានជាន់ខ្ពស់តែប៉ុណ្ណោះ ដែលអាចប្រើប្រាស់ផ្លាកលេខរថយន្តខេមរភូមិន្ទ (ខម)បាន ចំពោះអ្នកផ្សេងប្រើផ្លាកលេខធម្មតាបានហើយ ។
សម្តេចបវរធិបតីបានគូសបញ្ជាក់នៅក្នុង«ពិធីអបអរសាទ រខួបអនុស្សាវរីយ៍៣០ឆ្នាំ ថ្ងៃបង្កើតកងពលតូចលេខ៧០» នៅថ្ងៃទី១៥ ខែតុលា ឆ្នាំ២០២៤ យ៉ាងដូច្នេះថា៖ «ចាប់ពីពេលនេះតទៅហើយប្រើឲ្យចំគោលដៅមានតែនាយទាហានជាន់ខ្ពស់មានសិទ្ធិប្រើផ្លាកលេខ«ខម» អីញ្ចឹងអ្នកផ្សេងជិះរថយន្តពាក់ផ្លាកលេខសខ្មៅទៅគ្មានអ្នកណាធ្វើឃាតទេ»។
សម្តេចបវរធិបតីបានបន្តថា៖ «ទោះបីជាឡានបានពាក់ផ្លាក «ខម» យ៉ាងណាក្តី នៅពេលមានហានិភ័យក៏ផ្លាកលេខ«ខម»នេះ មិនអាចជួយបានដែរ។ ហើយការប្រើផ្លាកលេខ «ខម»ច្រើន បានធ្វើឲ្យមានភាពច្របូកច្របល់ ព្រោះថា អ្នកបើកមិនពិតប្រាកដអាចបើកសាហាវជាម្ចាស់រថយន្តទៀត។ ដល់ពេលអ្នកបើប្រាកដទៅបើកឡាននោះ ធ្វើឲ្យខូចឈ្មោះដែល ចំណុចនេះជាបញ្ហា»។
ជាមួយគ្នានោះដែរ សម្តេចបវរធិបតីបានស្នើឲ្យថ្នាក់ដឹកនាំធ្វើការគ្រប់គ្រងចំពោះការពាក់ផ្លាកលេខ«ខម»ឲ្យបានត្រឹមត្រូវ និងធ្វើការគ្រប់គ្រងអាវុធត្រូវពង្រឹងក្នុងការគ្រប់គ្រងឲ្យបានត្រឹម ត្រូវផងដែរ។ ឃ្លាំងអាវុធគ្រាប់សន្តិសុខត្រូវរៀបចំឲ្យបានល្អ ដែលចំណុចនេះគឺជាកិច្ចការសំខាន់ ។
សូមជម្រាបការលើកឡើងរបស់សម្តេចបវរធិបតី ហ៊ុន ម៉ាណែត បន្ទាប់ពីពេលកន្លងមក នេះមានការករណីមួយចំនួនបានកើតឡើងដោយមានរថយន្តពាក់ផ្លាកលេខ«ខម»បើកបរមានគ្រោះថ្នាក់ចរាចរណ៍ទៅប៉ះអ្នកដទៃរួចគេចខ្លួនបាត់ ឬក៏មានអ្នកជួយការពារ ដែលចំណុចនេះ ធ្វើឲ្យមហាជនរិះគន់យ៉ាងខ្លាំងផងដែរ៕
ចែករំលែកព័តមាននេះ