សហរដ្ឋអាមេរិក ៖ សហរដ្ឋអាមេរិកគ្រោងនឹងហាមឃាត់ការលក់ និងនាំចូលរថយន្តគ្រប់ធុន រាប់ពីរថយន្តអ្នកដំណើរ រថយន្តដឹកទំនិញ និងរថយន្តក្រុងនៅសហរដ្ឋអាមេរិក ដែលដំណើរការផ្នែករឹង និងផ្នែកទន់ ឬ…
សហរដ្ឋអាមេរិក ៖ សហរដ្ឋអាមេរិកគ្រោងនឹងហាមឃាត់ការលក់ និងនាំចូលរថយន្តគ្រប់ធុន រាប់ពីរថយន្តអ្នកដំណើរ រថយន្តដឹកទំនិញ និងរថយន្តក្រុងនៅសហរដ្ឋអាមេរិក ដែលដំណើរការផ្នែករឹង និងផ្នែកទន់ ឬ Hardware និង Software ផលិតក្នុងប្រទេសចិន និងរុស្ស៊ី ដោយសាររតែហានិភ័យផ្នែកសុវត្ថិភាពជាតិ។ នេះបើតាមប្រភពពីសារព័ត៌មាន BBC ចេញផ្សាយកាលពីថ្ងៃទី២៣ ខែកញ្ញា ឆ្នាំ២០២៤។
ក្រុមមន្ត្រីអាមេរិកអះអាងថា ពួកគេព្រួយបារម្ភថា បច្ចេកវិទ្យាគ្រោងនឹងហាមឃាត់ ដែលប្រើសម្រាប់ការបើកបរដោយស្វ័យប្រវត្តិ ឬ គ្មានមនុស្សបើកបរ និងដើម្បីភ្ជាប់រថយន្តទៅនឹងបណ្តាញផ្សេងទៀត ដែលអាចអនុញ្ញាតឱ្យបច្ចាមិត្តគ្រប់គ្រងរថយន្តពីចម្ងាយលើផ្លូវនៅអាមេរិក។ បច្ចុប្បន្នមានការប្រើប្រាស់តិចតួចបំផុតនូវកម្មវិធីផលិតដោយចិន ឬរុស្ស៊ីលើរថយន្តនៅអាមេរិក។ ប៉ុន្តែទោះយ៉ាង លោកស្រី ជីណា រ៉ៃម៉ុនដូ (Gina Raimondo) រដ្ឋមន្ត្រីក្រសួងពាណិជ្ជកម្មអាមេរិកបានបញ្ជាក់ថា ផែនការនេះគឺជាជំហានគោលដៅ និងសកម្ម ដើម្បីការពារសហរដ្ឋអាមេរិកពីបំណងអាក្រក់ណាមួយ។
លោកស្រីបានបញ្ជាក់ក្នុងសេចក្តីថ្លែងការណ៍មួយថា «រថយន្តសព្វថ្ងៃនេះមានកាមេរ៉ា មីក្រូហ្វូន ប្រព័ន្ធតាមដាន GPS និងបច្ចេកវិទ្យាផ្សេងទៀតដែលភ្ជាប់ទៅអ៊ីនធឺណិត។ វាមិនមែនការស្រមើលស្រមៃច្រើនទេ ដើម្បីយល់ពីរបៀបដែលបច្ចាមិត្តបរទេសមានសិទ្ធិទទួលបានព័ត៌មាននេះ ហើយអាចបង្កហានិភ័យយ៉ាងធ្ងន់ធ្ងរដល់សន្តិសុខជាតិរបស់យើង និងឯកជនភាពពលរដ្ឋអាមេរិកផងដែរ»។
ឆ្លើយតបទៅនឹងផែនការនេះ លោក លីន ជៀន (Lin Jian) អ្នកនាំពាក្យក្រសួងការបរទេសចិនបានលើកឡើងថា សហរដ្ឋអាមេរិកកំពុងពង្រីកគំនិតសន្តិសុខជាតិនិយម ដើម្បីកំណត់គោលដៅលើបណ្តាក្រុមហ៊ុនចិនដោយអយុត្តិធម៌។ លោកបានគូសបញ្ជាក់ថា «ប្រទេសចិនប្រឆាំងនឹងការពង្រីកគំនិតសន្តិសុខជាតិនិយមរបស់សហរដ្ឋអាមេរិក និងសកម្មភាពរើសអើងដែលធ្វើឡើងប្រឆាំងក្រុមហ៊ុន និងផលិតផលចិន។ ហើយយើងជំរុញឱ្យភាគីអាមេរិកគោរពគោលការណ៍ទីផ្សារស៊េរី និងផ្តល់បរិយាកាសអាជីវកម្មបើកចំហ យុត្តិធម៌ តម្លាភាព និងមិនរើសអើងសម្រាប់សហគ្រាសចិន»។
ការហាមឃាត់ Software ផលិតនៅក្នុងប្រទេសចិន និងរុស្ស៊ីនឹងចូលជាធរមានចាប់ពីឆ្នាំ ២០២៧ ខណៈដែលច្បាប់លើ Hardware នឹងមានប្រសិទ្ធភាព៣ឆ្នាំក្រោយ ដោយសារតែត្រូវផ្តល់ពេលវេលាបន្ថែមទៀតដល់ឧស្សាហកម្ម ដើម្បីដំណើរការខ្សែសង្វាក់ផ្គត់ផ្គង់របស់ពួកគេឡើងវិញជាមុនសិន។
គួរបញ្ជាក់ថា សំណើដែលនឹងឈានចូលទៅដល់រយៈពេលនៃការផ្តល់មតិមួយនេះ គឺជាសកម្មភាពចុងក្រោយបង្អស់ពីសេតវិមានក្នុងគោលបំណងកំណត់វត្តមានរបស់ចិននៅក្នុងសង្វាក់ផ្គត់ផ្គង់ការផលិតរថយន្ត។ ដ្បិតសេតវិមានបានដំឡើងពន្ធរួចទៅហើយនៅលើរថយន្តអគ្គិសនី អាគុយសម្រាប់រថយន្តអគ្គិសនី និងទំនិញមួយចំនួនទៀតដែលនាំចូលមកពីប្រទេសចិន៕ (ប្រភព ៖ BBC)
ចែករំលែកព័តមាននេះ