Telegram ប្រតិក.ម្មបែបណា ក្រោយនាយកប្រតិបត្តិរបស់ខ្លួន ត្រូវឃុំខ្លួននៅបារាំង?
ប្រទេសអារ៉ាប់រួម ៖ ក្រុមហ៊ុនកម្មវិធីផ្ញើសារតេឡេក្រាម (Telegram) កាលពីថ្ងៃទី២៥ ខែសីហា ឆ្នាំ២០២៤ កន្លងទៅ បានចេញមកបញ្ជាក់ថា លោក…
ប្រទេសអារ៉ាប់រួម ៖ ក្រុមហ៊ុនកម្មវិធីផ្ញើសារតេឡេក្រាម (Telegram) កាលពីថ្ងៃទី២៥ ខែសីហា ឆ្នាំ២០២៤ កន្លងទៅ បានចេញមកបញ្ជាក់ថា លោក Pavel Durov សហស្ថាបនិក និងជានាយកប្រតិបត្តិរបស់ Telegram ដែលត្រូវបានឃុំខ្លួននៅក្នុងប្រទេសបារាំង កាលពីថ្ងៃទី២៤ ខែសីហា ឆ្នាំ២០២៤ គឺជារឿងដែលគ្មានអ្វីត្រូវលាក់បាំងនោះទេ។ គួររំលឹកថា មេធំកម្មវិធីផ្ញើសារតេឡេក្រាម (Telegram) ត្រូវបានចា.ប់ខ្លួននៅក្នុងប្រទេសបារាំង
យោងតាមប្រភពពីសារព័ត៌មាន BBC ចេញផ្សាយនៅព្រឹកថ្ងៃទី២៦ ខែសីហា ឆ្នាំ២០២៤ បានឱ្យដឹងថា លោក Pavel Durov ត្រូវបានចាប់ខ្លួន នៅអាកាសយានដ្ឋាន Le Bourget ស្ថិតនៅភាគខាងជើងទីក្រុងប៉ារីស ប្រទេសបារាំង ក្រោមដីកាពីបទល្មើសទាក់ទងនឹងកម្មវិធីផ្ញើសារ Telegram ។
ហើយការស៊ើបអង្កេតធ្វើឡើងពាក់ព័ន្ធនឹងការខ្វះក្រុមការងារត្រួតពិនិត្យ និងសម្របសម្រួលឱ្យបានគ្រប់គ្រាន់ ហើយលោក Durov ត្រូវបានចោទប្រកាន់ថា ពុំបានចាត់វិធានការដើម្បីទប់ស្កាត់សកម្មភាពឧក្រិដ្ឋកម្មជាច្រើនលើកម្មវិធី Telegram ជាពិសេសលើការបរាជ័យក្នុងការសហការជាមួយនឹងការអនុវត្តច្បាប់លើការជួញដូរគ្រឿងញៀន ខ្លឹមសារផ្លូវភេទរបស់កុមារ និងការក្លែងបន្លំ។
ក្រុមហ៊ុន Telegram បានបញ្ជាក់នៅក្នុងសេចក្តីថ្លែងការណ៍មួយថា «ការសម្របសម្រួលរបស់កម្មវិធីស្ថិតនៅក្នុងស្តង់ដារឧស្សាហកម្ម និងធ្វើឱ្យប្រសើរឡើងឥតឈប់ឈរ។ វាជារឿងមិនទំនងទាល់តែសោះក្នុងការអះអាងថាកម្មវិធី Telegram ឬម្ចាស់កម្មវិធីនេះ ត្រូវទទួលខុសត្រូវចំពោះការបំពានលើវេទិកានោះ»។
ក្រុមហ៊ុនបានឱ្យដឹងថា លោក Durov ធ្វើដំណើរក្នុងទ្វីបអឺរ៉ុបជាញឹកញាប់ ហើយតែងតែគោរពតាមច្បាប់សហភាពអឺរ៉ុប រួមទាំងច្បាប់សេវាកម្មឌីជីថល ដែលមានបំណងធានានូវបរិយាកាសអនឡាញដែលមានសុវត្ថិភាព និងគណនេយ្យភាព។ អ្នកប្រើប្រាស់ស្ទើរតែមួយពាន់លាននាក់នៅទូទាំងពិភពលោកប្រើប្រាស់ Telegram ជាមធ្យោបាយទំនាក់ទំនង និងជាប្រភពនៃព័ត៌មានសំខាន់ៗ។ ហើយមកទល់ពេលនេះ ក្រុមហ៊ុនកំពុងរង់ចាំការដោះស្រាយភ្លាមៗ អំពីស្ថានភាពនេះ។
បើតាមប្រភពតុលាការ ដែលត្រូវបានដកស្រង់ដោយទីភ្នាក់ងារសារព័ត៌មាន AFP បានឱ្យដឹងថា ការឃុំខ្លួនលោក Durov ត្រូវបានបន្តកាលពីអាទិត្យសប្តាហ៍មុន ហើយអាចបន្តរយៈពេលរហូតដល់៩៦ម៉ោង។
លោក Pavel Durov អាយុ៣៩ឆ្នាំ កើតនៅក្នុងប្រទេសរុស្ស៊ី ដែលបច្ចុប្បន្នកំពុងរស់នៅក្នុងទីក្រុងឌូបៃ ប្រទេសអារ៉ាប់រួម ដែលក្រុមហ៊ុន Telegram មានមូលដ្ឋាននៅទីនោះ។ ក្រៅអំពីជាជនជាតិរុស្ស៊ី លោក Durov ក៏មានសញ្ជាតិអារ៉ាប់រួម និងបារាំងផងដែរ។
គួរឱ្យដឹងផងដែរថា កម្មវិធី Telegram មានប្រជាប្រិយភាពជាពិសេសនៅក្នុងប្រទេសរុស្ស៊ី អ៊ុយក្រែន និងរដ្ឋអតីតសហភាពសូវៀត។ ប៉ុន្តែត្រូវបានហាមឃាត់នៅក្នុងប្រទេសរុស្ស៊ី កាលពីឆ្នាំ ២០១៨ បន្ទាប់ពីការបដិសេធរបស់លោក Durov ក្នុងការប្រគល់ទិន្នន័យអ្នកប្រើប្រាស់។ ប៉ុន្តែបម្រាមនេះត្រូវបានដកវិញនៅឆ្នាំ ២០២១។ កម្មវិធីនេះ ត្រូវបានចាត់ថ្នាក់ជាវេទិកាផ្សព្វផ្សាយសង្គមដ៏សំខាន់ បន្ទាប់ពី Facebook, YouTube, WhatsApp, Instagram, TikTok និង Wechat ។
លោក Pavel Durov និងលោក Nikolai Durov ដែលជាបងប្រុស បានបង្កើតកម្មវិធី Telegram នៅក្នុងឆ្នាំ ២០១៣ ហើយបានចាកចេញពីប្រទេសរុស្ស៊ីនៅក្នុងឆ្នាំ ២០១៤ បន្ទាប់ពីបដិសេធមិនធ្វើតាមការទាមទាររបស់រដ្ឋាភិបាលក្រុងមូស្គូ ដើម្បីបិទសហគមន៍ប្រឆាំងលើវេទិកាប្រព័ន្ធផ្សព្វផ្សាយសង្គម VKontakte ដែលបងប្អូនត្រកូល Durov បានបង្កើតឡើង ហើយក្រោយមកបានលក់សិទ្ធិគ្រប់គ្រង។ បន្ទាប់ពីចាកចេញពីប្រទេសរុស្ស៊ី លោក Pavel Durov បានបញ្ជាក់យ៉ាងច្បាស់ថា គាត់គ្មានបំណងត្រឡប់ទៅវិញទេ៕ (ប្រភព ៖ BBC)
ចែករំលែកព័តមាននេះ