សហរដ្ឋអាមេរិក ៖ ក្រុមហ៊ុន Apple មិន​ទាន់​ប្រកាស​ចេញ​បង្ហាញ​ស្មា​ត​ហ្វូ​ន​ត្រកូល iPhone 16 គ្រប់​ម៉ូ​ដែល​នៅឡើយ​ទេ ប៉ុន្តែ​កាលពី​ពេល​ថ្មី​ៗ​នេះ ស្រាប់តែ​លេច​ចេញ​ពាក្យ​ចចាមអារ៉ាម​មួយ​ចំនួន​រួច​ទៅ​ហើយ​អំពី​ត្រកូល iPhone 17 ដែល​ទំនងជា​នឹង​ត្រូវ​ដាក់​បង្ហាញ​ជា​ផ្លូវការ នៅ​ខែកញ្ញា ឆ្នាំ​ក្រោយ​។

ជាក់ស្តែង ពាក្យ​ចចាមអារ៉ាម​មួយ​ដ៏​រសើប​ខ្លាំង​ជាទី​បំផុត​បាន​អះអាង​ថា ត្រកូល iPhone 17 គ្រប់​ម៉ូ​ដែល រួម​មាន iPhone 17, iPhone 17 Slim, iPhone 17 Pro និង iPhone 17 Pro Max នឹង​បំពាក់​កាមេរ៉ា​មុខ​ទំហំ​រហូត​ដល់ ២៤​មេ​ហ្គា​ភិ​ច​សែ​ល​ឯណោះ​។ បើ​ប្រៀបធៀប​ជាមួយនឹង​ស្មា​ត​ហ្វូ​ន​ត្រកូល iPhone 15 បច្ចុប្បន្ន​ទាំង​៤​ម៉ូ​ដែល ដែល​បំពាក់​កាមេរ៉ា​មុខ​ទំហំ​ត្រឹមតែ ១២​មេ​ហ្គា​ភិ​ច​សែ​ល​ប៉ុណ្ណោះ​។ នេះ​បើ​យោង​តាម​ការ​អះអាង​របស់​លោក Jeff Pu អ្នកវិភាគ​របស់​គេហទំព័រ MacRumors​។

ការ​វិភាគ​របស់​លោក Jeff Pu បាន​ចែករំលែក​តារាង​មួយ​នៅ​ក្នុង​កំណត់​ត្រា​ស្រាវជ្រាវ​មួយ សម្រាប់​ធនាគារ​វិនិយោគ Haitong ដែល​បាន​បង្ហាញ​ថា ត្រកូល iPhone 17 គ្រប់​ស៊េរី​នឹង​មាន​កាមេរ៉ា​មុខ​ទំហំ​២៤​មេ​ហ្គា​ភិ​ច​សែ​ល ជាមួយ​លេ​ន 6P​។ ការ​លើក​ឡើង​នេះ ក៏​មិន​ខុស​ពី​ការ​លើក​ឡើង​របស់​លោក Ming-Chi Kuo ដែល​ជា​អ្នកវិភាគ​ដ៏​មាន​ប្រជាប្រិយ ដែល​បាន​អះអាង​ដូច​គ្នា កាលពី​ខែមករា​កន្លង​ទៅ​។​

ប្រភព​ពី MacRumors និង GSM Arena បានឱ្យ​ដឹង​ថា ស្មា​ត​ហ្វូ​ន​ត្រកូល iPhone 16 ក៏​មិន​អន់​នោះ​ដែរ ដោយ​មក​ជាមួយនឹង​ការ​អភិវឌ្ឍ​ថ្មី​មិនធម្មតា​ផង​ដែរ ជាមួយនឹង​បច្ចេកវិទ្យា​បញ្ញា​សិប្បនិម្មិត AI ទំនើប​ចុង​ក្រោយ​៕