Nvidia ទមា្លក់ Microsoft ក្លាយជាក្រុមហ៊ុនមានតម្លៃថ្លៃបំផុតលើពិភពលោក
សហរដ្ឋអាមេរិក ៖ ក្រុមហ៊ុន Nvidia បានទម្លាក់ក្រុមហ៊ុន Microsoft ដើម្បីក្លាយជាក្រុមហ៊ុនមានតម្លៃ
សហរដ្ឋអាមេរិក ៖ ក្រុមហ៊ុន Nvidia បានទម្លាក់ក្រុមហ៊ុន Microsoft ដើម្បីក្លាយជាក្រុមហ៊ុនមានតម្លៃបំផុតនៅលើពិភពលោក បន្ទាប់ពីតម្លៃភាគហ៊ុនបានកើនឡើងដល់កម្រិតខ្ពស់បំផុត កាលពីថ្ងៃទី១៨ ខែមិថុនា ឆ្នាំ២០២៤ កន្លងទៅ។
យោងតាមប្រភពពីសារព័ត៌មាន CNN ក៏ដូចជា BBC បានឱ្យដឹងថា ភាគហ៊ុនរបស់ក្រុមហ៊ុនបច្ចេកវិទ្យាអាមេរិក Nvidia បានបិទបញ្ចប់ការជួញដូរក្នុងតម្លៃ ១៣៨ដុល្លារអាមេរិក ពោលកើនឡើង ៣.៥% ដោយមានតម្លៃថ្លៃជាងក្រុមហ៊ុនបច្ចេកវិទ្យាដ៏ធំរបស់អាមេរិក Microsoft។ នេះគឺជាវិវត្តន៍ដ៏អស្ចារ្យបំផុតរបស់ក្រុមហ៊ុន Nvidia ដែលទើបតែបានទម្លាក់ក្រុមហ៊ុនបច្ចេកវិទ្យាដ៏ធំរបស់អាមេរិក Apple ធ្លាក់ទៅចំណាត់ថ្នាក់ទី ៣ កាលពីដើមខែមិថុនានេះ។
Nvidia គឺជាក្រុមហ៊ុនផលិតបន្ទះឈីបកុំព្យូទ័រ ដែលត្រូវការចាំបាច់សម្រាប់កម្មវិធីបញ្ញាសិប្បនិម្មិត AI ហើយតម្រូវការសម្រាប់ផលិតផលរបស់ក្រុមហ៊ុននេះ បានជំរុញការលក់ និងប្រាក់ចំណេញយ៉ាងខ្លាំង នៅក្នុងរយៈពេលប៉ុន្មានឆ្នាំចុងក្រោយនេះ។ ស្របពេលវិនិយោគិនជាច្រើនជឿថា ប្រាក់ចំណូលរក្រុមហ៊ុន Nvidia អាចកើនឡើងច្រើនជាងនេះទៀត ហើយតម្លៃភាគហ៊ុនក៏កើនឡើងកាន់តែខ្ពស់។
ឥឡូវនេះ តម្លៃរបស់ក្រុមហ៊ុន Nvidia កើនដល់ ៣.៣៤ទ្រីលានដុល្លារអាមេរិកហើយ ក្រោយការប្រមូលផ្តុំតម្លៃភាគហ៊ុន កាលពីថ្ងៃទី១៨ ខែមិថុនា ឆ្នាំ២០២៤ កន្លងទៅ។ ស្របពេលដែលតម្លៃក្រុមហ៊ុន Microsoft មានចំនួន ៣.៣២ទ្រីលានដុល្លារ ចំណែកឯតម្លៃក្រុមហ៊ុន Apple មានចំនួន ៣.២៧ទ្រីលានដុល្លារ។
តួលេខនេះ បង្ហាញឱ្យឃើញពីការរីកចម្រើនគ្មានដែនកំណត់របស់ក្រុមហ៊ុន Nvidia នៅក្នុងការប្រកួតប្រជែងក្នុងចំណោមក្រុមហ៊ុនអភិវឌ្ឍន៍ AI ខណៈដែលកាលពី៨ឆ្នាំមុន ភាគហ៊ុនក្រុមហ៊ុនមួយនេះ មានតម្លៃតិចជាង ១% នៃតម្លៃបច្ចុប្បន្ន។ ការប្រកួតប្រជែងបានផ្តល់អត្ថប្រយោជន៍ដល់ក្រុមហ៊ុន Nvidia ដែលគ្រប់គ្រងទីផ្សារបន្ទះឈីប AI ភាគច្រើន ហើយតួលេខលក់ និងប្រាក់ចំណេញបានកើនលើសពីការរំពឹងទុករបស់អ្នកវិភាគជាច្រើនក្នុងប៉ុន្មានឆ្នាំថ្មីៗនេះ។
បន្ទះឈីបទំនើបរបស់ Nvidia ពិបាកនឹងរកគូប្រៀបផ្ទឹមបានណាស់ ដោយបានដើរតួយ៉ាងសំខាន់ដល់ប្រព័ន្ធបញ្ញាសិប្បនិមិត្ត AI រួមទាំង AI ជំនាន់ថ្មី ដែលជាបច្ចេកវិទ្យាគាំទ្រដល់កម្មវិធី ChatGPT របស់ OpenAI ដែលអាចបង្កើតអត្ថបទ រូបភាព និងប្រព័ន្ធផ្សព្វផ្សាយផ្សេងទៀត។
ក្រុមហ៊ុនផលិតបន្ទះឈីបខ្នាតយក្សរបស់តៃវ៉ាន់ TSMC គឺជាដៃគូផលិតដ៏សំខាន់បំផុត សម្រាប់បន្ទះឈីប AI ដ៏ទំនើបរបស់ក្រុមហ៊ុន Nvidia ។ ហើយភាពជោគជ័យរបស់ Nvidia គឺជាការជំរុញដ៏សំខាន់ពី TSMC ដែលភាគហ៊ុនរបស់ពួកគេបានកើនឡើងខ្ពស់ កាលពីថ្ងៃទី៦ ខែមិថុនា ឆ្នាំ២០២៤ កន្លងទៅ៕ (ប្រភព ៖ CNN និង BBC)
ចែករំលែកព័តមាននេះ