រាជធានីភ្នំពេញ ៖ អ្នកដឹកគ្រែលក់តាមរ៉ឺម៉កម៉ូតូបានត្អូញត្អែរថា រយៈពេល៣ឆ្នាំចុងក្រោយនេះ គឺចាប់ពីឆ្នាំ២០២១ ដល់ឆ្នាំ២០២៤នេះការលក់ដូរជួបការលំបាកខ្លាំងណាស់ លក់មិនសូវដាច់ឡើយ ដែលបញ្ហានេះពិបាករកឃើញប្រាក់ចំណេញខ្លាំងណាស់ ។ ជាពិសេសប្រឈមនិងបំណុលធនាគារថែមទៀត ដែលចាញ់អំឡុងពេលនៃការផ្ទុះជំងឺកូវីដ១៩ឆ្ងាយណាស់ ថ្វីដ្បិតតែពេលនោះហាក់វឹកវរមែន តែសប្បាយក្នុងការលក់ដាច់ជាងពេលនេះ អាចរកប្រាក់បង់ធនាគារនិងផ្គត់ផ្គង់ជីវភាពគ្រួសារឲ្យកូនរៀនបានស្រួលជាង ។
នៅពេលសួរថា ក្នុងអំឡុងពេលនៃការផ្ទុះជំងឺកូវីដ១៩ មនុស្សទូទៅជួបការលំបាកគ្រប់គ្នារកប្រាក់ពុំសូវបាន លំបាកក្នុងការចេញធ្វើការរកប្រាក់ សូម្បីតែតំបន់ខ្លះនៅក្នុងប្រទេសត្រូវបានបិទខ្ទប់ផងនោះ តើហេតុអ្វីបានជាថា ពេលនោះស្រួលលក់និងលក់ដាច់ជាងពេលនេះទៅវិញ ? ។ ពួកគាត់បានឆ្លើយថា ពួកគាត់ក៏ឆ្ងល់ដែរ ហើយក៏ពុំបានដឹងថាមកពីមូលហេតុអ្វីដែរ ប៉ុន្តែបើតាមការស្មានរបស់ពួកគាត់នោះ គឺថាអាចដោយសារតែពេលទើបចាប់ផ្ដើមផ្ទុះជំងឺកូវីដភ្លាមៗ ក្នុងឆ្នាំ២០១៩និង២០២០នោះ សេដ្ឋកិច្ចសកលមិនទាន់ធ្លាក់ចុះខ្លាំងនៅឡើយ ហើយមនុស្សភាគច្រើនក៏នៅមានលុយក្នុងដៃនៅឡើយដែរ ។
ពួកគាត់បាននិយាយទៀតថា លុះផុតពីនោះមកសេដ្ឋកិច្ចធ្លាក់ចុះកាន់តែខ្លាំងមនុស្សរកលុយក៏កាន់តែលំបាក ទោះជាមានតម្រូវការចង់បានគ្រែដេកដែរ ប៉ុន្តែគ្មានលុយទិញ ជាក់ស្ដែងកន្លងមកពួកគាត់ដែលជាអ្នកលក់បានជួបច្រើនមកហើយចំពោះអតិថិជនខ្លះ ពេលបានឃើញពួកគាត់ដឹកគ្រែលក់កាត់មុខផ្ទះបានហៅឲ្យឈប់ដើម្បីទិញ ។ បើតាមមើលទៅអតិថិជនទាំងនោះពិតជាចង់បានគ្រែខ្លាំងណាស់ តែទាស់លុយអត់គ្រប់អត់លទ្ធភាពដើម្បីទិញឡើយ ចំណែកពួកគាត់ក៏ចង់លក់ជូនដែរ ព្រោះទី១ឆាប់អស់បានត្រលប់ទៅផ្ទះយកមកលក់បន្តទៀត និងទី២បានស្រាលរ៉ឺម៉កស្រួលដឹកធូរកម្លាំងផងដែរ ។
ប៉ុន្តែអតិថិជនខ្លះបានតថ្លៃទាបបំផុតតាមទៅតាមទឹកលុយដែលខ្លួនមាន ដោយឲ្យមិនដល់ថ្លៃដើមដែលពួកគាត់ទិញចូលមកផង ធ្វើឲ្យពួកគាត់អត់ចំណេញហើយខាតទៀតដើម ទើបមិនអាចលក់ជូនបាននោះឡើយ ។
នៅក្នុងមុខរបរអាជីពជាអ្នកដឹកគ្រែលក់តាមរ៉ឺម៉កម៉ូតូរយៈពេលជាង២០ឆ្នាំកន្លងមកនេះ លោកអុិន សុខ អាយុ៤៤ឆ្នាំ រស់នៅភូមិទួលដំណាក់ ឃុំទួលដំណាក់ ស្រុកបារាយណ៍ ខេត្តកំពង់ធំ ក៏បានត្អូញត្អែរដូចគ្នាទៅនិងអ្នកលក់គ្រែផ្សេងទៀតផងដែរ ។ គាត់ថា ចាប់ពីចន្លោះឆ្នាំ២០២១ ដល់ឆ្នាំ២០២៤នេះ ហាក់ជួបការលំបាកយ៉ាងខ្លាំងលើមុខរបរមួយនេះ ដោយសារតែលក់មិនសូវដាច់សោះ គឺចាញ់អំឡុងពេលដែលជំងឺកូវី១៩ផ្ទុះឡើងនាឆ្នាំ២០១៩-២០២០ទៅវិញ ។
បុរសនោះបានរៀបរាប់ប្រាប់បន្ថែមទៀតថា ពេលនោះលក់ដាច់ខ្លាំងជាងពេលនេះឆ្ងាយណាស់ ដោយក្នុង១រ៉ឺម៉កចំនួន៧គ្រែរួមទាំងទូផ្ដៅមួយចំនួនទៀតផង លក់ត្រឹមតែរយៈពេល១អាទិត្យ ឬជាង១០ថ្ងៃប៉ុណ្ណោះគឺលក់អស់ហើយ រួចត្រលប់ទៅស្រុកវិញយកមកលក់បន្តទៀតហើយ ។ ដោយឡែករយៈពេល៣ឆ្នាំចុងក្រោយនេះជួបការលំបាកជាបន្តបន្ទាប់ ជាពិសេសនៅក្នុងឆ្នាំ២០២៤នេះតែម្ដង មិនងាយលក់អស់ទេ គ្រែ១រ៉ឺម៉កចំនួន៧គ្រែដូចគ្នា រយៈពេលជាង២ខែហើយ ក៏លក់អត់អស់ដែរ រកតែប្រាក់ដើម្បីបង់ធនាគារលែងបានហើយ ហើយគាត់ខានបងធនាគារ៥ខែមកហើយ ។
លោកអុិន សុខ បានបញ្ជាក់ប្រាប់ទៀតថា គ្រែដែលគាត់ដឹកលក់រាល់ថ្ងៃនេះជាប្រភេទគ្រែប្រអប់និងគ្រែធម្មតា ដែលធ្វើអំពីឈើកកោះនិងផ្ចឹក ដែលមានតម្លៃចាប់ពីជាង៣០០ដុល្លារទៅជាង៥០០ដុល្លារ ហើយគាត់មិនមែនផលិតខ្លួនឯងនោះទេ ។ គាត់បានទិញមកពីគេដែរ ដើមទុនក្នុងការរកសុីនេះបានខ្ចីប្រាក់ធនាគារហើយបង់ការប្រាក់រាល់ខែ ។ ដោយឡែកជើងចុងក្រោយបំផុតនេះគាត់បានចេញមកលក់រយៈពេលជាង២ខែមកហើយ ទើបតែលក់ដាច់អស់គ្រែចំនួន៥ប៉ុណ្ណោះ នៅសល់២គ្រែទៀតកំពុងដឹកដើរលក់បន្តទៀត ហើយពុំដឹងថាថ្ងៃណាទើបលក់អស់នោះឡើយ ។
គាត់គិតថា បុណ្យកាន់បិណ្ឌបានចូលមកដល់ហើយ នៅប៉ុន្មានថ្ងៃទៀតប៉ុណ្ណោះបុណ្យភ្ជុំធំនិងចូលមកដល់ដែរ ដូច្នេះនៅសល់គ្រែ២ទៀតនេះបើទោះជាលក់ដាច់អស់ឬមិនអស់ក៏ដោយ ក៏គាត់បង្ខំចិត្តត្រូវតែដឹត្រលប់ទៅផ្ទះវិញសិនដែរ ដើម្បីធ្វើបុណ្យទាននិងគេកុំឲ្យដូនតាចាំមើលផ្លូវ ។
គាត់បានប្រាប់បន្តថា គាត់ដឹកដើរលក់តែម្នាក់ឯងប៉ុណ្ណោះ នៅតាមបណ្ដាខេត្តនានាដូចជាខេត្តកណ្ដាល ខេត្តតាកែវ ខេត្តកំពត ខេត្តកំពង់ស្ពឺ និងរាជធានីភ្នំពេញជាដើម ហើយយប់នៅត្រង់ណាគឺសម្រាកនៅទីនោះតែម្ដង ចំណែកប្រពន្ធនៅផ្ទះធ្វើទូផ្ដៅលក់ និងកូនប្រុសស្រី២នាក់កំពុងរៀនសូត្រ ។ ចំពោះប្រាក់កម្រៃវិញគ្រែ១ចំណេញបានត្រឹមតែ៥០ដុល្លារប៉ុណ្ណោះ តែបើប៉ះចំអតិថិជនដែលពូកែតថ្លៃស្វិតស្វាញទៀតនោះចំណេញបានតិចជាងនេះទេ ។ ម្យ៉ាងទៀតប្រសិនបើលក់ឆាប់អស់ទូទាត់ទៅលើសុីចាយប្រចាំថ្ងៃយ៉ាងត្បិតត្បៀតផងនោះ១ជើងៗអាចនៅសល់បានត្រឹមតែជាង២០០ដុល្លារ ប៉ុណ្ណោះយកត្រលប់ទៅផ្ទះវិញបង់ធនាគារ ប៉ុន្តែបើរយៈពេលយូរថ្ងៃទើបលក់អស់នោះអត់សល់ទេ និងចូលដើមទៀតផង ។
ជាចុងក្រោយលោកអុិន សុខ ក៏ដូចជាអ្នកលក់គ្រែដ៏ទៃទៀតដែរបានអំពាវនាវសុំឲ្យមហាជនទាំងអស់ជួយចូលរួមគាំទ្រគ្រែរបស់ខ្មែរយើង និងជួយទិញឲ្យបានគ្រប់ៗគ្នាផង ហើយគាត់ក៏មិនចង់ត្អូញត្អែអ្វីដែរ ប៉ុន្តែពេលនេះពិតជាជួបការលំបាកក្នុងការលក់ដូរមែន មិននិយាយលេងនោះឡើយ ៕
ចែករំលែកព័តមាននេះ