កងទ័ពជើងទឹក ត្រៀមកម្លាំង១,២០០នាក់ សម្រាប់អន្តរាគមន៍ជួយពលរដ្ឋជួបគ្រោះទឹកជំនន់
រាជធានីភ្នំពេញ ៖ ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាអគ្គលេខាធិការរង នៃគណៈកម្មាធិការជាតិសន្តិសុខលម្ហសមុទ្រ បានឲ្យដឹងថា កងទ័ពជើងទឹក…
រាជធានីភ្នំពេញ ៖ ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាអគ្គលេខាធិការរង នៃគណៈកម្មាធិការជាតិសន្តិសុខលម្ហសមុទ្រ បានឲ្យដឹងថា កងទ័ពជើងទឹក បានត្រៀមកម្លាំង១,២០០នាក់ និងមធ្យោបាយរួចជាស្រេច សម្រាប់ចុះអន្តរាគមន៍ ជួយបងប្អូនប្រជាពលរដ្ឋ ជួបករណីទឹកជំនន់ នៅតាមបណ្តារាជធានី-ខេត្តនានា ។
ថ្លែងប្រាប់កោះសន្តិភាព នាថ្ងៃទី១៨ ខែកញ្ញា ឆ្នាំ២០២៤នេះ ឧត្តមនាវីឯក ទៀ សុខា បានលើកឡើងថា ខណៈគ្រោះទឹកជំនន់បានកំពុង គំរាមកំហែង នៅប្រទេសជិតខាងរបស់កម្ពុជា ហើយក៏ទទួលបានបទបញ្ជាររបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឲ្យកងកម្លាំងប្រដាប់អាវុធគ្រប់ប្រភេទត្រៀមខ្លួន ចុះអន្តរាគមន៍ជួយបងប្អូនប្រជាពលរដ្ឋរងគ្រោះដោយសារទឹកជំនន់នោះ បញ្ជការដ្ឋានកងទ័ពជើងទឹក បានត្រៀមកម្លាំង និងសម្ភារៈ រួចជាស្រេចសម្រាប់ចុះជួយអន្តរាគមន៍គ្រប់ពេលវេលាទាំងអស់ ពោលគឺ២៤ ម៉ោងលើ២៤ម៉ោង ។
ឧត្តមនាវីឯក ទៀ សុខា ថ្លែងថា ខណៈពេលដែលអាកាសធាតុមិនសូវល្អ នាពេលនេះកងទ័ពជើងទឹក បានត្រៀមកម្លាំង១,២០០នាក់ ដើម្បីជួយសង្គ្រោះប្រជាពលរដ្ឋនៅ តាមតំបន់ ដែលអាចប្រឈមនឹងជំនន់ទឹកភ្លៀង ជាពិសេសតំបន់ខ្លះ នៃខេត្តកំពង់ស្ពឺ, ស្ទឹងត្រែង កំពង់ឆ្នាំង, រាជធានីភ្នំពេញ, តំបន់តាមមាត់សមុទ្រ, និងតាមបណ្តាកោះនានា ជាដើម ។
ឯកឧត្តមឧត្តមនាវីឯក ទៀ សុខា បានបញ្ជាក់ទៀតថា «កងទ័ពជើងទឹកបានត្រៀមធម្យោបាយសង្គ្រោះ ដែលមានសម្ភារៈ ដូចជា នាវា អូប័រ ទូក និងអាវប៉ូង ជាពិសេសទៅទៀតនោះ គឺថ្នាំដង្កូវ គ្រូពេទ្យ កងទ័ពជើងទឹក ដើម្បីចល័តចុះជួយសង្គ្រោះ បងប្អូនប្រជាពលរដ្ឋណា ដែលជួបនូវគ្រោះទឹកជំនន់» ។
ក្រៅពីត្រៀមនូវកម្លាំង និងធម្យោបាយនានា កងទ័ពជើងទឹកក៏បានត្រៀមនូវស្បៀងអាហារមួយ ចំនួន សម្រាប់ចែកជូនដល់បងប្អូនប្រជាពលរដ្ឋ ដែលរងគ្រោះនូវទឹកជំនន់ទាំងនោះផងដែរ ដើម្បីជួយ សម្រាល់ទុក្ខលំបាករបស់ពួកគាត់ ៕
ចែករំលែកព័តមាននេះ