ខេត្តកំពង់ស្ពឺ៖ ប្រជាកសិករជាច្រើនគ្រួសារ ដែលកំពុងដាំត្រសក់ នៅឃុំក្រាំងអំពិល ស្រុកសំរោងទង ខេត្តកំពង់ស្ពឺ កំពុងមានការព្រួយបារម្ភ ខ្លាចតម្លៃត្រសក់នៅលើទីផ្សារ ធ្លាក់ចុះថោក ដូចបន្លែត្រកួនដែរ…
ខេត្តកំពង់ស្ពឺ៖ ប្រជាកសិករជាច្រើនគ្រួសារ ដែលកំពុងដាំត្រសក់ នៅឃុំក្រាំងអំពិល ស្រុកសំរោងទង ខេត្តកំពង់ស្ពឺ កំពុងមានការព្រួយបារម្ភ ខ្លាចតម្លៃត្រសក់នៅលើទីផ្សារ ធ្លាក់ចុះថោក ដូចបន្លែត្រកួនដែរ ធ្វើឱ្យពួកគាត់បាត់បង់ប្រាក់ចំណេញ។ គួររំលឹកថា កសិករដាំត្រសក់នៅឃុំអ្នកលឿងបារម្ភខ្លា.ចតម្លៃត្រសក់លើទីផ្សារធ្លាក់ថ្លៃ ធ្វើឱ្យប៉ះពាល់ដល់ប្រាក់ចំណូលរបស់ពួកគាត់
លោក ឌឿ ដា អាយុ៤៥ឆ្នាំ រស់នៅក្នុងភូមិព្រៃឈើទាល ឃុំក្រាំងអំពិល ស្រុកសំរោងទង បានរៀបរាប់ថា ដំណាំត្រសក់ងាយស្រួលដាំ និងប្រើពេលខ្លីត្រឹមតែជាងមួយខែប៉ុណ្ណោះ គឺអាចទទួលផលបានហើយ។
លោក ឌឿ ដា អ្នកដាំបន្លែត្រសក់បានបន្ថែមថា ការថែទាំបន្លែត្រសក់ គាត់ធ្វើដីលើករង រៀបចំប្រព័ន្ធគ្របកៅស៊ូ ប្រព័ន្ធទុយយោតំណក់ទឹក ប្រើជីធម្មជាតិមានដូចជា ជីអាចម៍គោ អាចម៍មាន់ អាចម៍ទាជាដើម ហើយចំពោះថ្នាំប្រើតែពីរដងតែប៉ុណ្ណោះ។ ប៉ុន្តែអ្វីដែលជាបញ្ហា និងការព្រួយបារម្ភរបស់ប្រជាកសិករនោះ គឺតម្លៃរបស់ត្រសក់នៅលើទីផ្សារ ម្ដងតម្លៃឡើង ម្ដងតម្លៃធ្លាក់ចុះ តាមតែលើមាត់របស់ឈ្មួញកណ្តាលជាអ្នកឱ្យតម្លៃតែប៉ុណ្ណោះ។ ធ្វើឱ្យខាតបង់ថវិកាដើម្បីចំណាយលើការដាំដុះ ក៏ដូចជាផ្គត់ផ្គង់ជីវភាពគ្រួសារផងដែរ។
លោក ឌឿ ដា ប្រជាកសិករ បានបញ្ជាក់ថា បច្ចុប្បន្ននេះតម្លៃត្រសក់លក់ទៅឱ្យឈ្មួញ ដែលមកទទួលទិញដល់ចំការ ក្នុងមួយគីឡូក្រាមបានតម្លៃចំនួន១០០០រៀលទៅ១៥០០រៀល តម្លៃនេះគឺសមរម្យ អាចឱ្យពួកគាត់ជាប្រជាកសិករអ្នកដាំ ទទួលបានប្រាក់ចំណេញខ្លះដែរ ប៉ុន្តែពេលនេះត្រសក់របស់ពួកគាត់ ទើបតែចាប់ផ្ដើមចេញផ្កា រយៈពេល១០ថ្ងៃទៀត ទើបអាចប្រមូលផលបាន ដូច្នេះហើយទើបពួកគាត់មានការព្រួយបារម្ភ ខ្លាចត្រសក់ធ្លាក់ចុះថោក ដូចបន្លែត្រកួនដែរ នៅពេលដែលពួកគាត់ប្រមូលផលបាននោះ។
ប្រជាកសិករអ្នកដាំបន្លែត្រសក់ បានធ្វើការសំណូមពរដល់ ឈ្មួញកណ្តាលមេត្តាកុំទំលាក់តម្លៃបន្លែដែលប្រជាកសិករអ្នកដាំបន្លែប្រើកម្លាំងផង មួយវិញទៀតសូមឱ្យអាជ្ញាធរ និងជំនាញពាក់ព័ន្ធមេត្តាជួយរកទីផ្សារដល់ប្រជាកសិករអ្នកដាំបន្លៃលក្ខណៈគ្រួសារផងទាន ៕
ចែករំលែកព័តមាននេះ