បរទេស ៖ អ្នកជំនាញបានលើកឡើងថា បណ្តាប្រទេសនៅអាស៊ីអាគ្នេយ៍ កំពុងព្យាយាមទាក់ទាញភ្ញៀវទេសចរពីប្រទេសឥណ្ឌា ដែលជាប្រទេសមានប្រជាជនច្រើនជាងគេបំផុតនៅលើពិភពលោក ហើយត្រូវបានចាត់ទុកថា អណ្តូងរ៉ែមាសថ្មីមួយ សម្រាប់ឧស្សាហកម្មទេសចរណ៍ពិភពលោក។ នេះបើយោងតាមប្រភពពីសារព័ត៌មាន…
បរទេស ៖ អ្នកជំនាញបានលើកឡើងថា បណ្តាប្រទេសនៅអាស៊ីអាគ្នេយ៍ កំពុងព្យាយាមទាក់ទាញភ្ញៀវទេសចរពីប្រទេសឥណ្ឌា ដែលជាប្រទេសមានប្រជាជនច្រើនជាងគេបំផុតនៅលើពិភពលោក ហើយត្រូវបានចាត់ទុកថា អណ្តូងរ៉ែមាសថ្មីមួយ សម្រាប់ឧស្សាហកម្មទេសចរណ៍ពិភពលោក។ នេះបើយោងតាមប្រភពពីសារព័ត៌មាន VnExpress ចេញផ្សាយនៅថ្ងៃទី២៨ ខែសីហា ឆ្នាំ២០២៤។
ចំនួនប្រជាជនឥណ្ឌាដែលធ្វើដំណើរទៅក្រៅប្រទេសបានកើនឡើងដល់ ២៧ លាននាក់កាលពីឆ្នាំ ២០១៩ ដែលជាចំនួនទ្វេដងនៃចំនួនប្រចាំឆ្នាំ កាលពីមួយទសវត្សរ៍មុន។ ហើយយោងតាមទស្សនាវដ្ដីអង់គ្លេស The Economist បានឱ្យដឹងថា ការចំណាយរបស់ភ្ញៀវទេសចរឥណ្ឌា កាលពីឆ្នាំមុនមានតម្លៃរហូតដល់ ៣៣ពាន់លានដុល្លារអាមេរិក ដែលកើនឡើងបីដងធៀបនឹងមួយទសវត្សរ៍មុន ហើយការព្យាករណ៍បង្ហាញថានឹងកើនឡើងដល់ ៤៥ពាន់លានដុល្លារអាមេរិក នៅឆ្នាំ ២០២៥។
លោក Sudhir Upadhyay នាយកប្រតិបត្តិរបស់ក្រុមហ៊ុន TravB2B ដែលផ្តល់សេវាកម្មទេសចរណ៍អាស៊ីដល់ភ្នាក់ងារទេសចរណ៍ជាង៧ពាន់នៅក្នុងប្រទេសឥណ្ឌា បានប្រាប់សារព័ត៌ VnExpress ថា «នេះគឺជាប្រភពសក្តានុពលដ៏ធំ នៃអតិថិជនដែលមានការចំណាយខ្ពស់ ហើយវាមិនគួរឱ្យភ្ញាក់ផ្អើលទេ ដែលបណ្តាប្រទេសនានាកំពុងព្យាយាមទាក់ទាញភ្ញៀវទេសចរឥណ្ឌា»។
លោកថា ប្រទេសឥណ្ឌា គឺជាទីផ្សារប្រភពដែលត្រូវបានស្វែងរកច្រើនបំផុតនាពេលបច្ចុប្បន្ន ហើយបានវ៉ាដាច់ប្រទេសចិន ដោយលោកបានព្យាករណ៍ថា ទីផ្សារទេសចរណ៍អន្តរជាតិរបស់ឥណ្ឌានឹងកើនឡើងដល់ ៥ ឬ ៦ដងនៃទំហំបច្ចុប្បន្ននៅក្នុងរយៈពេល ៨ ទៅ ១០ឆ្នាំខាងមុខ។
ប្រទេសចិនគឺជាប្រភពនៃអ្នកទេសចរដ៏ធំបំផុតរបស់ពិភពលោក ហើយប្រទេសនានាបានកែសម្រួលគោលនយោបាយពួកគេ ដើម្បីទាក់ទាញភ្ញៀវចិន ប៉ុន្តែនៅបណ្តាប្រទេសមជ្ឈិមបូព៌ា និងអាស៊ីអាគ្នេយ៍ ភ្ញៀវទេសចរឥណ្ឌាកំពុងផ្តល់ឱ្យពួកគេយ៉ាងសម្បើម។ តួយ៉ាង ប្រទេសថៃ និងម៉ាឡេស៊ីបានលើកលែងទិដ្ឋាការសម្រាប់ពលរដ្ឋឥណ្ឌារួចទៅហើយ ហើយប្រទេសមជ្ឈិមបូព៌ាមួយចំនួនបានជ្រើសរើសតារាភាពយន្តឥណ្ឌាជាឯកអគ្គរដ្ឋទូតម៉ាកល្បីរបស់ពួកគេថែមទៀតផង។
លោក Upadhyay ក៏បានបន្ថែមទៀតថា ម្ហូបអាហារក៏ដើរតួសំខាន់ផងដែរ ដោយសារអ្នកទេសចរឥណ្ឌាក៏ផ្តោតយ៉ាងខ្លាំងអំពីម្ហូបអាហារផងដែរ។ ប្រជាជនឥណ្ឌាជាច្រើនមិនត្រឹមតែជាអ្នកបួសប៉ុណ្ណោះទេ។ ពួកគេក៏មិនបរិភោគអាហារដែលចម្អិនដែលប្រើសាច់ ឬអាហារសមុទ្រផងដែរ។
ហើយបន្ទាប់មកមានកត្តាសាសនាដូចជា អ្នកកាន់សាសនាឥស្លាមមិនបរិភោគសាច់ជ្រូក និងអាហារមិនមែនជាហាឡាល (Halal) ជាសកម្មភាព អាកប្បកិរិយា ឬវត្ថុដែលត្រូវបានអនុញ្ញាតក្រោមការបង្រៀនរបស់សាសនាឥស្លាម។ រីឯអ្នកកាន់សាសនាហិណ្ឌូ និងពុទ្ធសាសនិកក៏ជៀសវាងសាច់គោផងដែរ។ ដូច្នេះការរៀបចំផែនការដោយប្រុងប្រយ័ត្ននៃការរៀបចំម្ហូបអាហារគឺចាំបាច់ សម្រាប់ក្រុមភ្ញៀវទេសចរឥណ្ឌា៕ (ប្រភព ៖ VnExpress)
ចែករំលែកព័តមាននេះ