ខេត្តស្ទឹងត្រែង ៖ ប្រជាពលរដ្ឋរាប់រយនាក់ កាលពីព្រឹកថ្ងៃទី១៤ ខែសីហា ឆ្នាំ២០២៤ បានបញ្ចេញមតិប្រតិកម្មខ្លាំងៗទៅលើវិទ្យុខេមរភាសាមួយ ដែលផ្សាយចេញពីក្រៅស្រុក ដោយប្រឌិត និងបំភាន់ព័ត៌មានខុសពីការពិត…
ខេត្តស្ទឹងត្រែង ៖ ប្រជាពលរដ្ឋរាប់រយនាក់ កាលពីព្រឹកថ្ងៃទី១៤ ខែសីហា ឆ្នាំ២០២៤ បានបញ្ចេញមតិប្រតិកម្មខ្លាំងៗទៅលើវិទ្យុខេមរភាសាមួយ ដែលផ្សាយចេញពីក្រៅស្រុក ដោយប្រឌិត និងបំភាន់ព័ត៌មានខុសពីការពិត ដែលថា ប្រជាពលរដ្ឋរស់នៅភូមិឫទ្ធិសែនជ័យ១ ឃុំអូរស្វាយ ស្រុកបុរីអូរស្វាយសែនជ័យ មានគម្រោងផែនការ លើកគ្នាទៅតវ៉ាធ្វើបាតុកម្ម នៅឯទីក្រុងភ្នំពេញ ។
ប្រជាពលរដ្ឋ ដែលបានប្រមូលផ្ដុំជុំគ្នាទាំងនោះ បានលើកឡើងស្រដៀងៗគ្នាថា ពួកគាត់ដែលជាប្រជាពលរដ្ឋរស់នៅក្នុងភូមិឫទ្ធិសែនជ័យ១ ឃុំអូរស្វាយ ស្រុកបុរីអូរស្វាយសែនជ័យ ពុំមានគំនិតចលនាប្រឆាំង នឹងរដ្ឋាភិបាលនោះឡើយ ផ្ទុយទៅវិញ ពួកគាត់ដែលជាប្រជាពលរដ្ឋរស់នៅខេត្តជាប់ព្រំដែនកម្ពុជា-ឡាវ មានតែការចូលរួមប្រកាសគាំទ្រ កិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ទៅវិញនោះទេ ។
ពួកគាត់បានបន្តទៀតថា បច្ចុប្បន្នមានជនខិលខូចមួយចំនួនតូច បានឆ្លៀតឱកាស ប្រឌិត និងបំភាន់កាឡៃ សភាពការណ៍ទៅឲ្យវិទ្យុផ្សាយជាខេមរភាសាមួយ ដែលធ្វើការផ្សាយចេញពីក្រៅស្រុក ក្នុងន័យបង្កាច់បង្ខូចប្រជាពលរដ្ឋ ដើម្បីកេងចំណេញផលប្រយោជន៍ផ្ទាល់ខ្លួន ។
ប្រជាពលរដ្ឋទាំងនោះបានស្នើអោយដល់វិទ្យុខាងលើ បញ្ឈប់ជាបន្ទាន់ ក្នុងការយកប្រជាពលរដ្ឋធ្វើជាឈ្នាន់ និងផ្សាយព័ត៌មានមិនពិតញុះញង់ ឲ្យមានការភាន់ច្រឡំ ក្នុងន័យបង្កាច់បង្ខូច ថា ប្រជាពលរដ្ឋមានគំនិតប្រឆាំងរដ្ឋាភិបាល ។
លោក លី មីណា អភិបាលស្រុកបុរីអូរស្វាយសែនជ័យ បានលើកឡើងថា ប្រជាពលរដ្ឋនៅក្នុងភូមិឫទ្ធិសែនជ័យ១ ពុំមានចេតនាណាមួយ ដើម្បីបង្កើតចលនាតវ៉ារឿងដីធ្លី និងចលនាប្រឆាំងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTAនោះទេ ផ្ទុយទៅវិញពួកគាត់បានប្រកាសគាំទ្រ កិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ព្រមគ្នាផងដែរ ៕
ចែករំលែកព័តមាននេះ