រាធានីភ្នំពេញ ៖ ចំពេលដែលមហាជនលើបណ្តាញសង្គមនៅកម្ពុជាកំពុងផ្ទុះការចាប់អារម្មណ៍លើប្រធានបទ Low seasonនោះ គេឃើញលោក Akihiro Kato ដែលត្រូវបានគេស្គាល់ថា និងជាម្ចាស់ក្លិបបាល់ទាត់អង្គរថាយហ្គឺរនៅកម្ពុជាចេញមកបង្ហោះសារមួយ តាមហ្វេសបុកបង្ហាញពីរឿងហួសចិត្តមួយដែលមិត្តភក្តិរបស់លោកជាជនបរទេស បានជួបប្រទះនៅព្រលានយន្តហោះអន្តរជាតិភ្នំពេញ ហើយដែលរឿងមួយនេះ ត្រូវបានមហាជនចាត់ទុកថា ជារឿងអវិជ្ជមានដែលប៉ះពាល់ដល់មុខមាត់ប្រទេសជាតិជាខ្លាំង។
តាមរយៈការបង្ហោះលើគណនីហ្វេសបុក កាលពីថ្ងៃទី០៥ ខែកក្តដា ឆ្នាំ២០២៤ វិនិយោគិនជនជាតិជប៉ុនវ័យ៤៣ឆ្នាំរូបនេះ បានរៀបរាប់ទាំងជា ភាសាខ្មែរ និងភាសាអង់គ្លេសយ៉ាងដូច្នេះថា៖
« មិត្តភ័ក្តិរបស់ខ្ញុំម្នាក់បានទទួលវិក្កយបត្រក្លែងក្លាយសម្រាប់ការទូទាត់វីសានៅអាកាសយានដ្ឋានភ្នំពេញ។ ខ្ញុំតែងតែប្រាប់មិត្តភក្តិរបស់ខ្ញុំថា ប្រទេសកម្ពុជា ជាប្រទេសមួយដ៏ស្រស់ស្អាត។ ប៉ុន្តែវាពិតជាសោកស្ដាយណាស់ដែលមិត្តខ្ញុំត្រូវឆ្លងកាត់បទពិសោធន៍បែបនេះ។បើគេចង់បង្កើនវិស័យទេសចរណ៍រឿងបែបនេះគួរតែត្រូវបានកែលម្អឥឡូវនេះ។»
សារខ្លី តែមានខ្លឹមសារជ្រៅ ដែលបង្ហាញឱ្យឃើញពីភាពអាម៉ាស់មួយនេះ Akihiro ចង់សំដៅថា ផ្ទុយពីអ្វីដែលលោកខំអួតប្រាប់ មិត្តបរទេសអំពីរឿងល្អនៅកម្ពុជា ប៉ុន្តែគ្រាន់តែគេឈានចូលដល់ទឹកដីកម្ពុជាភ្លាម បែជាលក់មុខគាត់ភ្លែត។
រឿងរ៉ាវមួយនេះ ជំរុញឱ្យមហាជនខ្មែរដែលប្រើប្រាស់បណ្តាញសង្គមចូលទៅខមមិនសូមអភ័យទោសចំពោះបញ្ហាខាងលើ ហើយបានស្នើសុំទៅកាន់ ក្រសួងទេសចរណ៍ ក្រសួងមហាផ្ទៃ ជាពិសេស អគ្គនាយកដ្ឋានអន្តោប្រវេសន៍ ឱ្យស៊ើបអង្កេតនិងដោះស្រាយរឿងមួយនេះបន្ទាន់ ព្រោះវាពិតជាប៉ះពាល់យ៉ាងធ្ងន់ធ្ងរដល់មុខមាត់កម្ពុជា ជាពិសេសវិស័យទេសចរណ៍ ដែលកំពុងតែត្រដាបត្រដួសស្រាប់ផង។
ឆ្លើយតបនឹងសំណួររបស់កម្មវិធី 60 Buzz នៃសារព័ត៌មានកោះសន្តិភាព លោកបណ្ឌិត ទូច សុខៈ បានអះអាងនៅរសៀលថ្ងៃទី៦ ខែកក្តដា ឆ្នាំ២០២៤ថា «ខាងជំនាញកំពុងតែត្រួតពិនិត្យរឿងនេះ។ អាចសួរបន្ថែមទៅអគ្គនាយកដ្ឋានអន្តោប្រវេសន៍ ដែលជាអាណាព្យាបាលផ្ទាល់។ »
គិតត្រឹមម៉ោង៤និង៣០ល្ងាចថ្ងៃទី៦ ខែកក្តដា ឆ្នាំ២០២៤ គេនៅមិនទាន់ឃើញប្រិតកម្មតបណាមួយពីអគ្គនាយកដ្ឋានអន្តោប្រវេសន៍ នៅឡើយទេ ខណៈដែលលេខhot line របស់អគ្គនាយកដ្ឋានតេចូលតែគ្មានអ្នកលើក។
យ៉ាងណាក៏ដោយយោងតាមប្រភពដដែលពីម្ចាស់ក្លិបបាល់ទាត់អង្គរថាយហ្គឺរ លោក Akihiro Kato បានបន្ថែមបច្ចុប្បន្នភាពចំពោះរឿងរ៉ាវខាងលើថា «យើងត្រូវបានប៉ូលិសអន្តោប្រវេសន៍ប្រាប់ថា ពួកគេនឹងធ្វើការស៊ើបអង្កេតនិងកែលម្អបញ្ហានេះ។ គ្មានប្រទេសណាដែលគ្មានបញ្ហាទេ។ អរគុណសម្រាប់សកម្មភាពរហ័សនេះ។»។
គួរកត់សម្គាល់ថា ជុំវិញបញ្ហាជនបរទេស ទទួលបានលុយអាប់ ជាលុយដុល្លារក្លែងក្លាយនេះ ត្រូវបានអ្នកលេងបណ្តាញសង្គម ជាច្រើនចេញមកនិយាយថា មិនមែនតែកើតមាននៅតាមព្រលានយន្តហោះប៉ុណ្ណោះទេ ប៉ុន្តែបានកើតមានទាំងនៅតាមហាងម៉ាស្សា ភោជនីដ្ឋាន សណ្ឋាគារ កន្លែងលក់ដូរជាច្រើនករណី ដែលនាំឱ្យមានការខឹងសម្បារជាខ្លាំងពីសំណាក់ជនបរទេសដែលមកទស្សនា រកស៊ី ធ្វើការ និងរស់នៅក្នុងប្រទេសកម្ពុជា៕
ចែករំលែកព័តមាននេះ