ខេត្តត្បូងឃ្មុំ ៖ ស្របពេលដែលប្រជាពលរដ្ឋក្មេងចាស់ប្រុសស្រី កំពុងតែដេកលង់លក់ ស្រាប់តែនាំគ្នាភ្ញាក់ផ្អើល ដោយឃើញភ្លើងបានឆាបឆេះយ៉ាងសន្ធោសន្ធៅ ចេញពីឃ្លាំងដាក់សម្ភារៈកសិកម្មមួយកន្លែង ស្ថិតនៅឃុំជប់ ស្រុកត្បូងឃ្មុំ ។…
ខេត្តត្បូងឃ្មុំ ៖ ស្របពេលដែលប្រជាពលរដ្ឋក្មេងចាស់ប្រុសស្រី កំពុងតែដេកលង់លក់ ស្រាប់តែនាំគ្នាភ្ញាក់ផ្អើល ដោយឃើញភ្លើងបានឆាបឆេះយ៉ាងសន្ធោសន្ធៅ ចេញពីឃ្លាំងដាក់សម្ភារៈកសិកម្មមួយកន្លែង ស្ថិតនៅឃុំជប់ ស្រុកត្បូងឃ្មុំ ។
ជាមួយគ្នានោះដែរ លោកឧត្តម សេនីយ៍ស្នងការនគរបាលខេត្ត បានទាក់ទងតាមអាយកូម ដោយមានរថយន្តពន្លត់អគ្គិភ័យជាច្រើនគ្រឿងចេញមកជួយអន្តរាគមន៍បាញ់ទឹកពន្លត់រហូតដល់គ្រប់គ្រងស្ថានការណ៍បាន មិនរាលដាលឆេះដល់លំនៅដ្ឋានពលរដ្ឋនៅក្បែរនោះឡើយ ។
លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំបានឱ្យដឹងថា៖ ក្រោយពេលដែលមានគ្រោះអគ្គិភ័យកើតឡើង ប៉ុស្តិ៍រដ្ឋបាលមូលដ្ឋានបានរាយការណ៍មករូបលោក ភ្លាមៗនោះបានឲ្យរថយន្តពន្លត់អគ្គិភ័យនៃអធិការដ្ឋាននគរបាលស្រុកត្បូងឃ្មុំ ដែលប្រចាំការ២៤ម៉ោង លើ២៤ម៉ោង ចេញទៅអន្តរាគមន៍បាញ់ទឹកទន្លត់ ។ ហើយហេតុការណ៍នេះបានកើតឡើង នៅវេលាម៉ោង២យប់ទាបភ្លឺ ថ្ងៃទី៧ កក្កដា ឈានចូលព្រឹកថ្ងៃទី៨ កក្កដា ឆ្នាំ២០២៤។
អធិការនគរបាលស្រុកត្បូងឃ្មុំ បានបន្តឲ្យដឹងទៀតថា គ្រាដែលរូបលោកដឹកនាំកម្លាំងចុះទៅដល់កន្លែងកើតហេតុជាបន្ទាន់ និងបានរាយការណ៍ជូនលោកឧត្តមសេនីយ៍ស្នងការនគរបាលខេត្តក៏បានបញ្ជាឲ្យរថយន្តនៅតាមបណ្ដាស្រុកក្រុងក្នុងខេត្តត្បូងឃ្មុំ ចេញមកអន្តរាគមន៍បាញ់ទឹកពន្លត់ជាបន្តបន្ទាប់ ។
សូមបញ្ជាក់ថា អគ្គិភ័យឆាបឆេះឃ្លាំងដាក់សម្ភារកសិកម្មវិញជាងស្ថិតនៅភូមិវាលកណ្ដៀង ឃុំជប់ ស្រុកត្បូងឃ្មុំ ខេត្តត្បូងឃ្មុំ ប្រើប្រាស់រថយន្តចំនួន៦គ្រឿង (ស្រុកត្បូងឃ្មុំ ស្រុកអូររាំងឪ ក្រុងសួង ស្រុកតំបែរ ស្រុកពញាក្រែក និងរថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត ។ ប្រើប្រាស់ទឹកអស់ចំនួន១៧រថយន្ត គ្រប់គ្រងបានទាំងស្រុង នៅវេលាម៉ោង៥ព្រឹក ថ្ងៃទី៨ កក្កដា ។
ចំពោះសម្ភារខូចខាតរួមមាន ៖ ឃ្លាំងសម្ភារៈ ធ្វើពីថ្ម ដំបូលសង្កសីទំហំ២៥X៤០ ម៉ែត្រ ខូចខាតជញ្ជាំខាងកើតមួយចំហៀង ប្រវែង២៥ម៉ែត្រ ។ សម្ភារៈគ្រឿងបម្រើអោយកសិកម្មក្នុងឃ្លាំងមួយចំនួនធំ (មិនទាន់អាចកំណត់បាន) ។ ចំពោះមូលហេតុ ឆ្លងចរន្តអគ្គិសនី ។
អធិការនគរបាលស្រុកត្បូងឃ្មុំបញ្ជាក់ថា នៅក្នុងហេតុការណ៍គ្រោះអគ្គិភ័យនេះ គឺពិតជាសំណាងល្អ ដែលកម្លាំងសមត្ថកិច្ចចុះអន្តរាគមន៍យ៉ាងសស្រាក់ស្រាំទាន់ពេលវេលា ដោយធ្វើឲ្យភ្លើងបានរលត់ទៅវិញជាស្ថាពរ មិនបានរាលដាលឆេះដល់លំនៅឋានរបស់បងប្អូនប្រជាពលរដ្ឋនៅក្បែរនោះទេ ។ ហើយទំហំនៃការខូចខាតមិនទាន់ត្រូវបានវាយតម្លៃគិតជាទឹកប្រាក់អស់ចំនួនប៉ុន្មាននៅឡើយ ៕
ចែករំលែកព័តមាននេះ