សាលារៀនចំនួន១០ ដោយនៅក្នុងនោះវិទ្យាល័យចំនួន៥ និងបឋមសិក្សាចំនួន៥ នៅខេត្តមណ្ឌលគីរី នឹងទទួលបានបន្ទប់សុខភាពថ្មីដែលបំពាក់ទៅដោយគ្រែអ្នកជំងឺ សម្ភារៈសង្គ្រោះបឋម និងកញ្ចប់សម្ភារៈប្រើប្រាស់សម្រាប់ក្មេងស្រីជំទង់ ។
សាលារៀនទាំងនេះ អាចទទួលបានឱកាសបែបនេះ គឺធ្វើឡើងក្រោមកិច្ចសហការរវាង មន្ទីរសុខាភិបាល មន្ទីរអប់រំ យុវជន និងកីឡា ខេត្តមណ្ឌលគិរី សហការជាមួយនឹងមូលនិធិសហប្រជាជាតិសម្រាប់ប្រជាជន (UNFPA) ប្រចាំកម្ពុជា ។
អង្គការ UNFPA បានអះអាងថា គំនិតផ្តួចផ្តើមនេះ បង្កើតឡើងក្នុងន័យធានាថា សិស្សានុសិស្សនៅតំបន់ឆ្ងាយដាច់ស្រយាលទទួល បានព័ត៌មាន និងសេវាថែទាំសុខភាពបន្តពូជជាសារវន្ត ការអប់រំសុខភាព និងការសង្គ្រោះបឋមនៅក្នុងសាលារៀនរបស់ពួកគេ ។
ប្រភពដដែលបានបន្តថា មណ្ឌលគិរី គឺជាខេត្តដំបូងគេ ក្នុងប្រទេសកម្ពុជា ដែលអនុវត្តគំរូនៃការអប់រំ និងយកចិត្តទុកដាក់លើបញ្ហាសុខភាពបែបនេះ ។ ប្រភពដដែលបានបន្តថា តាមរយៈការបង្កើតបន្ទប់សុខភាព នៅតាមសាលារៀនទាំងនេះ គឺកំពុងតែវិនិយោគលើអនាគតអ្នកជំនាន់ និងផ្តល់អំណាចឱ្យពួកគេទទួលខុសត្រូវលើសុខភាព និងសុខុមាលភាពរបស់ពួកគេផងដែរ ។
ប្រភពដដែលសង្កត់ធ្ងន់ថា នៅពេលដែលយុវជនមានលទ្ធភាពទទួលបានសេវាសុខភាពបន្តពូជ ការថែទាំសុខភាពសំខាន់ៗ និង ព័ត៌មានត្រឹមត្រូវនៅក្នុងសាលារៀន នោះពួកគេអាចធ្វើការសម្រេចចិត្តប្រកបដោយការយល់ដឹងជំនះរាល់ឧបសគ្គ និងផ្តោតលើការសិក្សារបស់ពួកគេកាន់តែប្រសើរឡើង ។
លោក លី សាមិ ប្រធានមន្ទីរអប់រំ យុវជន និងកីឡាខេត្តមណ្ឌលគិរី បានសម្តែងការកោតសរសើរចំពោះភាពជាដៃគូជាមួយ UNFPA និងកិច្ចសហប្រតិបត្តិការយ៉ាងជិតស្និទ្ធ ជាមួយមន្ទីរសុខាភិបាលខេត្តមណ្ឌលគិរី ។ លោកបានអះអាងថា ការចូលរួមចំណែករបស់មន្ទីរសុខាភិបាលបាននឹងកំពុងអនុញ្ញាតឱ្យមានសិស្សានុសិស្សកំពុងអនុញ្ញាតឱ្យមានសិស្សានុសិស្សបានទទួលសេវានៅបន្ទប់សុខភាពនៅតាមសាលារៀន ហើយកិច្ចការនេះជំរុញឱ្យការទទួលបានសេវាយុវវ័យ នៅតាមមណ្ឌលសុខភាពកាន់តែប្រសើរ ។
លោកបានបន្តថា កិច្ចខិតខំប្រឹងប្រែងទាំងនេះ មានប្រសិទ្ធភាពគាំទ្រដល់ចក្ខុវិស័យរបស់រដ្ឋាភិបាលក្នុងការ កសាងធនធានមនុស្ស ដែលតម្រូវឱ្យមានការផ្តល់អាទិភាពដល់សុខភាពសិស្ស រួមទាំងសុខភាពផ្លូវភេទ និងសុខភាពបន្តពូជ ៕
ចែករំលែកព័តមាននេះ