ខេត្តសៀមរាប ៖ ស្ដ្រីម្នាក់បានបង្ហោះវីដេអូភ្ជាប់ជាមួយនិងសំឡេងផ្ទុះអាវុធ ដែលនាំឱ្យមានការយល់ច្រឡំ និងប៉ះពាល់ដល់សន្ដិសុខ ត្រូវបានសមត្ថកិច្ចឃាត់ខ្លួនធ្វើកិច្ចសន្យា និងសុំទោសជាសាធារណៈតាមបណ្តាញសង្គមហ្វេសប៊ុក ។ បន្ទាប់ពីមានស្ដ្រីម្នាក់បង្ហោះវីដេអូ ដែលជាម្ចាស់គណនី…
ខេត្តសៀមរាប ៖ ស្ដ្រីម្នាក់បានបង្ហោះវីដេអូភ្ជាប់ជាមួយនិងសំឡេងផ្ទុះអាវុធ ដែលនាំឱ្យមានការយល់ច្រឡំ និងប៉ះពាល់ដល់សន្ដិសុខ ត្រូវបានសមត្ថកិច្ចឃាត់ខ្លួនធ្វើកិច្ចសន្យា និងសុំទោសជាសាធារណៈតាមបណ្តាញសង្គមហ្វេសប៊ុក ។
បន្ទាប់ពីមានស្ដ្រីម្នាក់បង្ហោះវីដេអូ ដែលជាម្ចាស់គណនី TikTok ភ្ជាប់ជាមួយសំឡេងផ្ទុះអាវុធ នាំឱ្យមានការយល់ច្រឡំ និងប៉ះពាល់ដល់សន្ដិសុខ នៅថ្ងៃទី ២២ មិថុនា ២០២៤ ដោយមានការចង្អុលបង្ហាញ ពីលោកឧត្តមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្តសៀមរាប បានឱ្យកម្លាំងជំនាញការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលខេត្តសៀមរាបចុះស្រាវជ្រាវរហូតឈានឃាត់ខ្លួនយកមកធ្វើការសួរនាំ ។
លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាបបានឱ្យដឹងនៅថ្ងៃទី២៣ ខែមិថុនា ឆ្នាំ២០២៤ នេះថា ក្រោយឃើញស្ដ្រីម្នាក់បង្ហោះវីដេអូ ដែលជាម្ចាស់គណនី TikTok ភ្ជាប់ជាមួយសំឡេងផ្ទុះអាវុធនាំឱ្យមានការយល់ច្រឡំ និងប៉ះពាល់ដល់សន្ដិសុខនោះត្រូវបានគេចែកចាយ លោកនិង អនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិបានបញ្ជាកម្លាំងការិយាល័យប្រឆាំងបទល្មើសបច្ចេកវិទ្យាខេត្ត សហការជាមួយកម្លាំងនាយកដ្ឋានប្រឆាំងបទល្មើសបច្ចេកវិទ្យា ស្រាវជ្រាវបន្ទាន់លើករណីនេះភ្លាម ។
ជាលទ្ធផល នៅថ្ងៃទី២៣ ខែមិថុនា ឆ្នាំ២០២៤ កម្លាំងជំនាញបានហៅឈ្មោះ ហម ផល់ ភេទស្រី អាយុ ២៥ឆ្នាំ មានស្រុកកំណើតភូមិត្រពាំងផុង ឃុំពពេល ស្រុកសូទ្រនិគម ខេត្តសៀមរាប អាសយដ្ឋានបច្ចុប្បន្ន ភូមិស្ទឹងថ្មី សង្កាត់ស្វាយដង្គំ ក្រុងខេត្តសៀមរាប ជាបុគ្គលិកលក់ចាប់ហួយ គឺជាម្ចាស់គណនី Tik Tok ឈ្មោះ Srey Pol952 ដែលបានបង្ហោះវីដេអូ អមដោយសម្លេងផ្ទុះអាវុធ លើបណ្ដាញសង្គម Tik Tok មកសាកសួរនៅកន្លែងសមត្ថកិច្ច ។
នៅចំពោះមុខសមត្ថកិច្ច ស្ដ្រីខាងលើបានឆ្លើយសារភាពថា នៅអំឡុងឆ្នាំ២០២២ ខ្លួនបានបង្កើតគណនី Tik Tok ឈ្មោះ Srey Pol952 ដេីម្បីលេងកម្សាន្ដ។ ក្រោយមក អំឡុងឆ្នាំ២០២៣ ខ្លួនបានថតនៅលើដងផ្លូវសាធារណៈចំណុចកន្លែងហាងខ្លួនលក់ចាបហ៊ួយ មានរយៈពេល១០វិនាទី ជា
លក្ខណៈដូចមានការភ័យស្លន់ស្លោ អមដោយសម្លេងផ្ទុះអាវុធ ដោយសម្លេងនោះ គឺខ្លួនបានទាញយកពីគណនី Tik Tok (មិនចាំឈ្មោះ) ក្នុងចេតនាបង្ហោះលេងប៉ុណ្ណោះ។
លុះដល់ថ្ងៃទី១៩ ខែមិថុនា ឆ្នាំ២០២៤ ស្រាប់តែខ្លួនបានឃើញគណនី TikTok របស់ខ្លួន បានធ្វើការលោតរំលឹកវីដេអូចាស់ដែលបានបង្ហោះខាងលើម្តងទៀត ពេលនោះខ្លួនក៏បានបង្ហោះលេងសារជាថ្មី ដែលមានអ្នកចូលមើលច្រើន ដោយខ្លួនពុំបានគិតដល់នាំឲ្យមានការប៉ះពាល់ដល់សន្តិសុខ សណ្តាប់ធ្នាប់សង្គមនោះទេ។
ក្រោយបញ្ចប់ការសួរនាំ កម្លាំងនគរបាលជំនាញនៃស្នងការដ្ឋាននគរបាលខេត្តសៀមរាបបានធ្វើកិច្ចសន្យា អប់រំណែនាំ និងឱ្យថតជាវីដេអូសុំទោសជាសាធារណៈឡើងវិញ ។
ចែករំលែកព័តមាននេះ