ពលរដ្ឋកម្ពុជានៅភូមិបឹង សង្កាត់ពញាពន់ ខណ្ឌសែនសុខ ដែលមានចម្ងាយប្រមាណ២០គីឡូម៉ែត្រខាងជើង រាជធានីភ្នំពេញបានជួបជុំគ្នារៀបចំពិធីប្រចាំឆ្នាំតាមជំនឿ ដើម្បីសុំទឹកភ្លៀងដោយពួកគេបានហៅពិធីនេះថា «ហែអ្នកតាព្រីងក្អែក» ។ នៅក្នុងពិធីដែលអ្នកភូមិ បានរៀបចំឡើង…
ពលរដ្ឋកម្ពុជានៅភូមិបឹង សង្កាត់ពញាពន់ ខណ្ឌសែនសុខ ដែលមានចម្ងាយប្រមាណ២០គីឡូម៉ែត្រខាងជើង រាជធានីភ្នំពេញបានជួបជុំគ្នារៀបចំពិធីប្រចាំឆ្នាំតាមជំនឿ ដើម្បីសុំទឹកភ្លៀងដោយពួកគេបានហៅពិធីនេះថា «ហែអ្នកតាព្រីងក្អែក» ។
នៅក្នុងពិធីដែលអ្នកភូមិ បានរៀបចំឡើង កាលពីព្រឹកថ្ងៃទី១១ ខែមិថុនា ឆ្នាំ២០២៤នេះ គឺមានអ្នកភូមិផាត់មុខលាបមាត់ តុបតែងខ្លួនចម្លែកៗបែបជាមនុស្សព្រៃសត្វ និងតួអង្គអមនុស្ស ជាព្រាយ ខ្មោច ឬម្រេញគង្វាល ព្រមទាំងក្រុមមនុស្សមានឈុតជាមេទ័ព កាន់ព្រះខ័នរាជ នាំមុខគេចេញដង្ហែរក្បួនតាមផ្លូវទៅកាន់តំបន់វាលស្រែនៃទីដីទួលអ្នកតាព្រីងក្អែក ឬអ្នកតាកាហ៊េ ក្នុងភូមិសាស្ត្រភូមិបឹង ។
លោក ស៊ឹម ប៉ុម ជាប្រជាពលរដ្ឋមួយរូប បានប្រាប់អ្នកសារព័ត៌មានថា ពិធីនេះ គឺជាពិធីដែលពលរដ្ឋតែងតែជួបជុំគ្នារៀបចំប្រារព្ធធ្វើឡើងជារៀងរាល់ឆ្នាំ ។
លោកបានបន្តថា វាជាទំនៀមទម្លាប់ប្រពៃណីសាសនា មានតកូនតចៅ ដែលអ្នកភូមិនៅតំបន់នោះធ្វើឡើងឥតដាច់ ដោយមានមានរយៈពេលមួយថ្ងៃមួយយប់ គឺចាប់ផ្តើមនៅល្ងាចថ្ងៃ ៤ កើត ខែជេស្ឋ និងបញ្ចប់នៅថ្ងៃ ៥ កើត ខែជេស្ឋ ទៅតាមប្រតិទិនចន្ទគតិរបស់ខ្មែរ ដើម្បីបន់ស្រន់សុំទឹកភ្លៀងដើមរដូវវស្សា ពិសេសសុំពរសេចក្តីសុខចម្រើនដល់មនុស្សសត្វទាំងពួង។
លោក ស៊ឹម ប៉ុម ដែលមានអាយុ៣៥ ឆ្នាំបានឲ្យដឹងថា តាំងពីក្មេងមកលោកតែងតែឃើញអ្នកភូមិរៀបចំពិធីនេះជាប្រចាំដើម្បីសុំសេចក្តីសុខចម្រើន សំណាងល្អ និងទឹកភ្លៀងសម្រាប់ធ្វើស្រែចម្ការ។ លោកបានអះអាងថា នេះជាទំនៀមទម្លាប់រាប់តំណររបស់អ្នកភូមិនៅទីនេះ ៕
ចែករំលែកព័តមាននេះ