រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជា នៅថ្ងៃទី២១ ខែធ្នូ ឆ្នាំ២០២៤ បានប្រកាសពីការផ្ទុះឡើងវិញ នូវជំងឺកញ្ជ្រឹល នៅកម្ពុជា…
រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជា នៅថ្ងៃទី២១ ខែធ្នូ ឆ្នាំ២០២៤ បានប្រកាសពីការផ្ទុះឡើងវិញ នូវជំងឺកញ្ជ្រឹល នៅកម្ពុជា និងប្រទេសជិតខាង ។
សេចក្តីជូនព័ត៌មានរបស់ក្រសួង បានឱ្យដឹងថា ជំងឺកញ្ជ្រឹល គឺជាជំងឺបង្កដោយវីរុស មានលក្ខណៈឆ្លងខ្លាំង ហើយរាលដាលលឿនតាមផ្លូវដង្ហើម ក្អក ឬកណ្តាស់ វាអាចបង្កជាជំងឺធ្ងន់ធ្ងរ និងស្លាប់បាន ជាពិសេសលើកុមារតូចៗ ដែលខ្វះអាហារូបត្ថម្ភ ។
ក្រសួងសុខាភិបាល ក៏បានបញ្ជាក់ដោយយោងតាមរបាយការណ៍របស់អង្គការសុខភាពពិភពលោក មកបញ្ជាក់ថា ចាប់តាំងពីឆ្នាំ២០២៣មក មានការផ្ទុះរាលដាល នៃជំងឺកញ្ជ្រឹលនៅបណ្តាប្រទេសជាច្រើន ក្នុងតំបន់និងលើពិភពលោក ដោយសារអត្រាគ្របដណ្តប់វ៉ាក់សាំងបង្ការជំងឺកញ្ជ្រឹលបានធ្លាក់ចុះ ក្នុងអំឡុងពេលផ្ទះរាតត្បាតជំងឺកូវីដ-១៩ ។
លិខិតក្រសួងឱ្យដឹងទៀតថា “ប្រទេសកម្ពុជា រួមជាមួយនឹងប្រទេសជិតខាងកម្ពុជា កំពុងតែប្រឈមនឹងហានិភ័យ នៃការផ្ទុះរាលដាលជំងឺកព្រើល ឡើងវិញ ជាពិសេសប្រជាជន ដែលងាយរងគ្រោះ ដូចជាកុមារ ជនចំណាកស្រុក ប្រជាជនចល័ត និងសហគមន៍ នៅតាមព្រំដែនជាដើម” ។
ជាមួយគ្នានេះ ក្រសួងសុខាភិបាល កត់សំគាល់ឃើញថា ករណីនៃជំងឺកញ្ជ្រឹលមានការកើនឡើងជាបន្តបន្ទាប់ជាពិសេស នៅតាមសាលារៀន និងខេត្តមួយចំនួននៅតាមព្រំដែន ចាប់តាំងពីខែតុលា ឆ្នាំ២០២៤មក ក្នុងនោះពីខែមករា ដល់ខែធ្នូ ឆ្នាំ២០២៤នេះ កម្ពុជា បានរកឃើញករណីវិជ្ជមានជំងឺកព្រឹលសរុប ៣៧៥ករណី ក្នុងខេត្តចំនួន១៧ ។
ដូចនេះហើយ ទើបក្រសួងសុខាភិបាល បានដាក់ចេញនូវយុទ្ធនាការផ្តល់វ៉ាក់សាំងបន្ថែម បង្ការជំងឺកញ្ជ្រឹល-ស្អូច នៅទូទាំងប្រទេសដល់កុមារដែលមានអាយុចាប់ពី៩ខែ ដល់៥៩ខែ ចាប់តាំងពីថ្ងៃទី៣១ ខែតុលា ឆ្នាំ២០២៤ រហូតដល់បច្ចុប្បន្ននេះ ដើម្បីបង្កើនភាពស៊ាំនៅក្នុងសហគមន៍ ៕
ចែករំលែកព័តមាននេះ