ទីក្រុងតៃប៉ិ៖ ថ្ងៃនេះ ក្រសួងការពារជាតិតៃវ៉ាន់ប្រកាសថាមាននាវាល្បាតរបស់ប្រទេសចិន៥គ្រឿងបើកចូលទៅកៀកនឹងតំបន់ហាមឃាត់នៃប្រជុំកោះឃីនមេន (Kinmen) របស់តៃវ៉ាន់។ ប៉ុន្តែនាវាទាំងនោះក៏បើកចាកចេញពីទីនោះដោយឥតបង្អង់យូរទេបន្ទាប់ពីពួកគេទទួលការព្រមានពីឆ្មាំសមុទ្ទតៃវ៉ាន់។ ហេតុការណ៍នេះកើតឡើងចំពេលចិន និងតៃវ៉ាន់កំពុងមានភាពតានតឹងនឹងគ្នាចាប់តាំងពីក្រោយព្រឹត្តិការណ៍សំខាន់បីនៅក្នុងរយៈពេលប៉ុន្មានអាទិត្យចុងក្រោយនេះ។
![](https://kohsantepheapdaily.com.kh/wp-content/uploads/2024/02/9e10eb8b06cc962db4abfa34be380198-2.jpg)
ទី១-ករណីស្លាប់អ្នកនេសាទេចិននៅក្បែរកោះឃីនមេនដោយសារទូកតៃវ៉ាន់ជិះដេញតាម។ ពួកគេមានគ្នា៤នាក់បើកទូកលឿនពេកក៏ក្រឡាប់ស្លាប់២នាក់ នៅរស់២នាក់។ ទី២-ចិនដាក់ប៉ុស្តិ៍ត្រួតពិនិត្យ និងឡើងឆែកឆេរនាវាទេសចរណ៍តៃវ៉ាន់មួយគ្រឿង និងទី៣-តៃវ៉ាន់ដេញទូកល្បាតរបស់ចិនត្រឡប់ថយក្រោយវិញ។ ដូច្នេះហេតុការណ៍នាវា៥គ្រឿងនេះជាករណីទី៤។
![](https://kohsantepheapdaily.com.kh/wp-content/uploads/2024/02/444bed36edb63affb194108840e16c03-2.jpg)
តាមពិត បើយើងគិតអំពីរយៈចម្ងាយនៃប្រជុំកោះឃីនមេនឃើញថាកោះនេះស្ថិតនៅកៀកប្រទេសចិនជាងកោះតៃវ៉ាន់។ នៅពេលគេឡើងទៅលើកោះនេះសម្លឹងមើលទៅប្រទេសចិនអាចមើលឃើញលឹមៗពីចម្ងាយ។ លោកស្រីឃួនពីលីង (Kuan Bi-ling) ជាប្រធានក្រុមប្រឹក្សាជាតិផ្នែកទំនាក់ទំនងរបស់តៃវ៉ាន់ប្រាប់ថាទូកល្បាតរបស់ចិនទាំងនោះប្រញាប់ចាកចេញភ្លាមគ្រាន់តែទូកល្បាតតៃវ៉ាន់ប្រាប់ឱ្យពួកគេចាកចេញ។
![](https://kohsantepheapdaily.com.kh/wp-content/uploads/2024/02/b80f0e2f5e87e1901bb21039f5749cde-2.jpg)
ឆ្មាំការពារដែនសមុទ្ទចិនមិនទាន់ធ្វើអត្ថាធិប្បាយចំពោះរឿងនេះទេ។ ប៉ុន្តែការិយាល័យទំនាក់ទំនងចិន-តៃវ៉ាន់នៅទីក្រុងប៉េកាំងនឹងរៀបចំសន្និសីទសារព័ត៌មាននៅថ្ងៃពុធស្អែក។ ការិយាល័យនេះធ្លាប់ប្រកាសថាប្រទេសចិនមិនកំណត់ថាដែនទឹកត្រឹមណាដែលអ្នកនេសាទចិនអាចបើកទូកចូលទៅបាននោះទេ។ មានន័យថាដែនទឹកទាំងអស់សុទ្ធតែជារបស់ចិន។
![](https://kohsantepheapdaily.com.kh/wp-content/uploads/2024/02/361403fe2410a76b9226f01b72e2b2e8-2.jpg)
កោះតៃវ៉ាន់នៅតែខ្វាយខ្វាល់យ៉ាងខ្លាំងថាប្រទេសចិននឹងបន្តដាក់សម្ពាធទៅលើតៃវ៉ាន់បន្ទាប់ពីចិនដឹងថាអនាគតប្រធានាធិបតីតៃវ៉ាន់ លោកឡៃឆឹងតេ ដែលត្រៀមស្បថចូលកាន់តំណែងនាខែឧសភាខាងមុខនេះជាមនុស្សប្រឆាំងនឹងចិន។ ប្រទេសចិនចាត់ទុកថាលោកជាអ្នកបំបែកទឹកដី។ តៃវ៉ាន់បានដាក់កម្លាំងការពារប្រជុំកោះឃីនមេននេះយ៉ាងក្រាស់ឃ្មឹកព្រោះទីនេះជាតំបន់ក្ដៅ និងធ្លាប់ជាទីលានប្រយុទ្ធគ្នាជាច្រើនដងមកហើយកាលពីសម័យសង្គ្រាមត្រជាក់។
![](https://kohsantepheapdaily.com.kh/wp-content/uploads/2024/02/e0109d2668fc12276f81b9da3ffb442d-2.jpg)
កាលពីសប្ដាហ៍មុន, ក្រសួងការពារជាតិតៃវ៉ាន់ថ្លែងថាសម្រាប់ពេលនេះ ខ្លួនមិនត្រូវការពង្រឹងទ័ពនៅប្រជុំកោះឃីនមេនទេ។ នៅក្នុងចំណោមនោះក៏មានប្រជុំកោះម៉ាត់ស៊ូ (Matsu) ផងដែរ។ បើគេជិះទូកពីទីក្រុងសៀមេន និងក្វាងចូវត្រឹមតែមួយភ្លែតប៉ុណ្ណោះអាចទៅដល់កោះឃីនមេន។ កាលពីសប្ដាហ៍មុន, ទាហានជើងទឹកចិន៦នាក់ស្ទាក់ឡើងទៅឆែកឆេរនាវាទេសចរណ៍តៃវ៉ាន់អស់មួយម៉ោងទើបពួកគេ (ទាហានជើងទឹក) ចុះពីលើនាវានោះវិញ និងអនុញ្ញាតឱ្យបន្តដំណើរទៅមុខទៀត។
![](https://kohsantepheapdaily.com.kh/wp-content/uploads/2024/02/386ccc1d7d59da2d5a847c9dff31d90f-2.jpg)
នាយករដ្ឋមន្ត្រីតៃវ៉ាន់ប្រាប់អ្នកសារព័ត៌មានថារដ្ឋាភិបាលលរបស់ខ្លួននឹងខិតខំបញ្ចៀសការប៉ះទង្គិចគ្នាស្របទៅតាមនីតិវិធីប្រតិបត្តិការជាកម្រិតស្តង់ដារ។ លោកថាតៃវ៉ាន់យកចិត្តទុកដាក់ណាស់ចំពោះការការពារសិទ្ធិរបស់អ្នកនេសាទ និងការបើកបរដោយសុវត្ថិភាពនៅលើផ្ទៃសមុទ្ទ។ រាល់ការបដិបត្តិរបស់យើងធ្វើឡើងស្របទៅតាមទម្លាប់ធម្មតាដូចប្រទេសដទៃទៀតនៅទូទាំងពិភពលោកកំពុងអនុវត្តដែរ។ លោកថ្លែងដូច្នេះបន្ទាប់ពីអ្នកនេសាទចិន២នាក់ស្លាប់ដោយសារពួកគេបើកទូកទៅកៀកកោះឃីនមេន ហើយត្រូវទូកល្បាតរបស់តៃវ៉ាន់ជិះដេញតាម។ រដ្ឋាភិបាលចិនខឹងសម្បារយ៉ាងខ្លាំងនឹងឧបទ្ទវហេតុនេះ៕
ប្រភព៖ Reuters
https://www.reuters.com/world/asia-pacific/taiwan-minister-says-5-china-coast-guard-ships-entered-waters-around-kinmen-2024-02-27/
ចែករំលែកព័តមាននេះ