តើនរណាជាអ្នកខុស? គ្រោះថ្នាក់ចរាចរណ៍រវាងរថយន្តម៉ាកតូយ៉ូតាព្រូស និងរថយន្តម៉ាក FORD RANGER ក្រោយរថយន្តទាំង២គ្រឿងបានបុ.កគ្នា បណ្ដាលឱ្យរងរបួសខូចខាតរៀងៗខ្លួន។ ថែមទាំងរថយន្តតូយ៉ូតាព្រូសដេញតាមពីក្រោយស្ទាក់រថយន្ត FORD RANGER ខណៈម្ចាស់រថយន្តនិយាយមានហេតុផលរៀងៗខ្លួន បង្កឲ្យការភ្ញាក់ផ្អើលដល់
រាជធានីភ្នំពេញ ៖ តើនរណាជាអ្នកខុស? គ្រោះថ្នាក់ចរាចរណ៍រវាងរថយន្តម៉ាកតូយ៉ូតាព្រូស និងរថយន្តម៉ាក FORD RANGER ក្រោយរថយន្តទាំង២គ្រឿងបានបុ.កគ្នា បណ្ដាលឱ្យរងរបួសខូចខាតរៀងៗខ្លួន។ ថែមទាំងរថយន្តតូយ៉ូតាព្រូសដេញតាមពីក្រោយស្ទាក់រថយន្ត FORD RANGER ខណៈម្ចាស់រថយន្តនិយាយមានហេតុផលរៀងៗខ្លួន បង្កឲ្យការភ្ញាក់ផ្អើលដល់សមត្ថកិច្ចចុះអន្តរាគមន៍កាលពីវេលាម៉ោង១១និង២០នាទីយប់ ថ្ងៃទី១៥ ខែវិច្ឆិកា ឆ្នាំ២០២៣ នៅត្រង់ចំណុចក្បែរអធិការដ្ឋាននគរបាលខណ្ឌសែនសុខ តាមបណ្ដោយផ្លូវបេតុង ស្ថិតក្នុងសង្កាត់ឃ្មួញ ខណ្ឌសែនសុខ។
តាមប្រភពព័ត៌មានពីសមត្ថកិច្ចមូលដ្ឋាន បានប្រាប់ឲ្យដឹងថា នៅមុនពេលកើតហេតុ មានប្រជាពលរដ្ឋរាយការណ៍ប្រាប់ថា មានបុរសម្នាក់បើករថយន្តមួយគ្រឿងម៉ាក FORD RANGER ពណ៌ប្រផេះ ពាក់ស្លាកលេខ ភ្នំពេញ2BJ-8447 រងការខូចខាតក្រពឹតផ្នែកខាងក្រោយចំហៀងខាងស្តាំ និងមានបុរសម្នាក់ទៀតបើករថយន្តមួយគ្រឿងម៉ាកតូយ៉ូតាព្រូស ពណ៌ប្រផេះ ពាក់ស្លាកលេខ ភ្នំពេញ2BO-3925 រងការខូចខាតផ្នែកខាងមុខយ៉ាងដំណំ បានបើកដេញតាមពីក្រោយរថយន្ត FORD RANGER រហូតស្ទាក់ចាប់បាននៅចំណុចកើតហេតុ ដោយមិនដឹងថា តើរថយន្តទាំងពីរគ្រឿងនោះបុ.កគ្នាពីចំណុចណាមកនោះទេ? ហើយកម្លាំងសមត្ថកិច្ចក៏បានចុះធ្វើការអន្តរាគមន៍ភ្លាមៗតែម្ដង។
តាមប្រភពព័ត៌មានពីម្ចាស់រថយន្តតូយ៉ូតាព្រូស បានរៀបរាប់ប្រាប់ឲ្យដឹងថា «នៅមុនពេលកើតហេតុ រថយន្ត FORD RANGER បានបើកបុ.ករថយន្តរបស់គាត់នៅចំណុចក្បែរផ្សារដើមអំពិល ស្ថិតក្នុងសង្កាត់ភ្នំពេញថ្មី ខណ្ឌសែនសុខ ហើយរថយន្ត FORDRANGER នោះ មិនព្រមឈប់ចុះមកដោះស្រាយគ្នានោះទេ បែរជាបន្ថែមល្បឿនបើករត់គេចខ្លួនទៅវិញ ទើបគាត់បើករថយន្តដេញតាមរហូតដល់ចំណុចកើតហេតុនេះតែម្តង»។
ដោយឡែកម្ចាស់រថយន្ត FORD RANGER វិញ បានរៀបរាប់ប្រាប់ឲ្យដឹងដែរថា «គាត់មិនបានបើករថយន្តបុ.ករថយន្តតូយ៉ូតាព្រូសនោះទេ។ ដោយនៅមុនពេលកើតហេតុ គាត់បានបើករថយន្តតាមបណ្ដោយផ្លូវ១០០៧ ទិសដៅពីត្បូងទៅជើង រួចក៏បានបើកវ៉ាជែងរថយន្តតូយ៉ូតាព្រូស ខណៈពេលនោះ ហាក់ដូចជាម្ចាស់រថយន្តតូយ៉ូតាព្រូសខឹង ក៏ព្យាយាមបើកវ៉ាជែងរថយន្តរបស់គាត់វិញ»។
ម្ចាស់រថយន្ត FORD RANGER បន្តទៀតថា «លុះដល់ចំណុចក្បែរផ្សារដើមអំពិល ផ្លូវ១០០៧កែងនឹងផ្លូវឧកញ៉ាម៉ុងរិទ្ធី ស្ថិតក្នុងសង្កាត់ភ្នំពេញថ្មី ខណ្ឌសែនសុខ គាត់ក៏បម្រុងបើករថយន្តបត់ឆ្វេងទៅផ្លូវឧកញ៉ាម៉ុងរិទ្ធី ខណៈពេលនោះក៏ស្រាប់តែរថយន្តតូយ៉ូតាព្រូស បានបុ.កចំពីក្រោយចំហៀងខាងស្តាំនៃរថយន្តរបស់គាត់ពេញទំហឹងតែម្ដង។ បន្ទាប់មក ម្ចាស់រថយន្តតូយ៉ូតាព្រូសរូបនោះ ក៏ចុះពីលើរថយន្ត រួចដើរទៅវា.យកញ្ចក់រថយន្តរបស់គាត់មួយដៃទៀត ធ្វើឲ្យរូបគាត់ភ័យស្លន់ស្លោក៏បើករថយន្ដគេចទៅដល់ចំណុចកើតហេតុតែម្តងទៅ»។
ក្រោយពេលកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញ បានធ្វើវាស់វែងនៅកន្លែងកើតហេតុ រួចយករថយន្តទាំងពីរគ្រឿងនោះទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយជាបន្តទៀត៕
ចែករំលែកព័តមាននេះ