រាជធានីភ្នំពេញ ៖ ប្រជាពលរដ្ឋជាច្រើននាក់តំណាងឲ្យជាង៦០គ្រួសារ ដែលបានទិញផ្ទះរស់នៅក្នុងបុរី «កំបូលស៊ីធី» ដែលមានទីតាំងស្ថិតនៅក្នុងភូមិគល់ សង្កាត់កំបូល ខណ្ឌកំបូល រាជធានីភ្នំពេញ បានប្រមូលផ្ដុំគ្នាកាលពីវេលាព្រឹកថ្ងៃទី៣០…
រាជធានីភ្នំពេញ ៖ ប្រជាពលរដ្ឋជាច្រើននាក់តំណាងឲ្យជាង៦០គ្រួសារ ដែលបានទិញផ្ទះរស់នៅក្នុងបុរី «កំបូលស៊ីធី» ដែលមានទីតាំងស្ថិតនៅក្នុងភូមិគល់ សង្កាត់កំបូល ខណ្ឌកំបូល រាជធានីភ្នំពេញ បានប្រមូលផ្ដុំគ្នាកាលពីវេលាព្រឹកថ្ងៃទី៣០ ខែវិច្ឆិកា ឆ្នាំ២០២៤ ។ ពួកគាត់បានឈរនៅតាមបណ្ដោយផ្លូវជាតិលេខ៤ត្រង់ចំណុចខាងមុខបុរីខាងលើ ធ្វើការកូដកម្មទាមទារសុំឲ្យម្ចាស់បុរីខាងលើក៏ដូចជាអាជ្ញារធរខណ្ឌកំបូល និងអាជ្ញាធរពាក់ព័ន្ធនានា ជួយដោះស្រាយបញ្ហាទុក្ខលំបាក ដែលពួកគាត់កំពុងជួបប្រទះនាពេលនេះ ។
នៅពេលធ្វើការតវ៉ានោះប្រជាពេលរដ្ឋទាំងនោះ បាននាំគ្នាយកសំបកកង់រថយន្តចាស់ៗជាច្រើនទៅដាក់លើគ្នា ប្រុងចាក់ប្រេងដុតបង្ហុយឲ្យមានផ្សែងទៀតផង ប៉ុន្តែត្រូវបានលោកអភិបាលរងខណ្ឌកំបូលម្នាក់ ដឹកនាំកម្លាំងចុះទៅធ្វើការហាមឃាត់និងសម្របសម្រួលទាន់ពេល ទើបប្រជាពលរដ្ឋបោះបង់ចោលការដុតបំពក់សំបកកង់រថយន្តនោះវិញ ហើយធ្វើការតវ៉ាដោយសន្តិវិធី ។
ក្រុមអ្នកតវ៉ាបានរៀបរាប់ប្រាប់ឲ្យដឹងថា ការតវ៉ានាពេលនេះពួកគាត់ទាមទារសុំឲ្យភាគីម្ចាស់បុរីកំបូលស៊ីធីនោះចេញមកដោះស្រាយនូវបញ្ហា២ចំណុចទី១, សម្រាប់អ្នកដែលមានលទ្ធភាពអាចរស់នៅក្នុងបុរីបន្តទៀត ស្នើរសុំបង់ប្រាក់រំលស់ប្រចាំខែ ទៅក្រុមហ៊ុនបុរីនេះរយៈពេល០២ឆ្នាំ ដោយមិនគិតការប្រាក់ ។ ទី២, សម្រាប់អ្នកដែលមិនមានលទ្ធភាពអាចរស់នៅក្នុងបុរីបន្តតទៅទៀត ស្នើរសុំប្រាក់វិញចំនួន៥០% នៃចំនួនប្រាក់សរុបដែលបានបង់រួច ក្រៅពីនេះក៏នៅមាន ផលលំបាកនិងការប្រឈមផ្សេងៗច្រើនទៀត ដែលពួកគាត់ត្រូវទាមទារឲ្យម្ចាស់បុរីដោះស្រាយជូនពួកគាត់ផងដែរ ។
ប្រជាពលរដ្ឋបាននិយាយទៀតថា ម្ចាស់បុរីកំបូលស៊ីធីនេះគ្មានចេតនាជួបដោះស្រាយជាមួយពួកគាត់នោះទេ និងបានគេចវេសរហូត ជាក់ស្ដែងក្នុងពេលកន្លងមកពេលពួកគាត់តវ៉ាអាជ្ញាធរខណ្ឌកំបូលបានហៅឲ្យទៅជួបដោះស្រាយជាមួយពួកគាត់ ក៏ម្ចាស់បុរីនេះមិនបានទៅចូលរួម ឬចាត់តំណាងឲ្យទៅចូលរួមនោះឡើយ គឺដាំដើមគធ្វើមិនដឹងមិនឮសោះ ។
ផ្ទុយទៅវិញគិតតែពីផលប្រយោជន៍ផ្ទាល់ខ្លួនប៉ុណ្ណោះ ហើយក៏មានគំនិតចង់តែរឹបអូសយកផ្ទះពីអតិថិជនដូចជាពួកគាត់វិញទទេៗ ព្រមទាំងផ្ដាច់ទឹកផ្ដាច់ភ្លើងមិនឲ្យពួកគាត់ប្រើប្រាស់បានទៀតផង ក្នុងពេលដែលពួកគាត់រកប្រាក់បង់រំលស់ថ្លៃផ្ទះមិនទាន់ ឬ គ្មានលទ្ធភាពប្រចាំខែបង់គ្រប់នោះ ។ ដោយម្ចាស់បុរីនេះមិនបានយល់យោគថា ពួកគាត់ម្នាក់ៗសុទ្ធតែបានបង់ថ្លៃផ្ទះខ្ទង់ម៉ឺនដុល្លារទៅហើយនោះទេ ហើយដោយសារតែរកលុយបង់មិនបាន និងត្រូវក្រុមហ៊ុនរឹបអូសយកផ្ទះផង កាត់ផ្ដាច់ទឹកភ្លើងផងមិនឲ្យប្រើបានផងនោះ ទើបអ្នកខ្លះមិនអាចរស់នៅកើតតទៅទៀត ហើយក៏បានចាកចេញតែម្ដង ។
ប្រជាពលរដ្ឋដដែលបានប្រាប់ឲ្យដឹងបន្តថា ផ្ទះនៅក្នុងបុរីកំបូលស៊ីធីនេះ ១ល្វែងថ្លៃចាប់ពីជាង៦ម៉ឺនដុល្លារ ដល់ជាង១០ម៉ឺនដុល្លារឯណោះ ទៅតាមផ្ទះដែលស្ថិតនៅជួរខាងមុខ ឬ នៅជួរខាងក្រោយ ហើយពេលទៅទិញត្រូវបង់មុន១០ភាគរយនៃតម្លៃផ្ទះ ។ ប៉ុន្តែក្រុមហ៊ុនមិនបានលក់ផ្ទាល់នោះទេគឺលក់តាមរយៈ(Sell) ហើយគ្មានគោលការណ៍ច្បាស់លាស់ជាមួយអតិថិជននោះឡើយ នៅពេលចូលទិញមុនដំបូងពួកគាត់មិនបានដឹងនោះទ ចំណែកក្រុមSeelនោះពូកែនិយាយឃោសនាអូសទាញខ្លាំងណាស់ ។
ពួកគេនិយាយយ៉ាងម៉េចឲ្យតែអតិថិជនទន់ចិត្តព្រមកក់លុយប៉ុណ្ណោះ ហើយក្រោយពួកគាត់កក់លុយរួចនិងបង់រំលស់បានមួយរយៈទើបដឹងថារញ៉េរញ៉ៃ ប៉ុន្តែត្រូវជាប់ផុងនិងខកខ្លួនហើយ បើទោះជាចង់ដកខ្លួនចេញវិញក៏មិនរួចដែរ ដូចនេះក៏ចេះតែទ្រាំរហូតមកដល់ពេលនេះ ប៉ុន្តែក៏ទ្រាំលែងបានទៀត ទើបផ្ទុះការតវ៉ាបែបនេះតែម្ដងទៅ ។
ក្រុមកូដករបានបញ្ជាក់ប្រាប់បន្ថែមទៀតថា តាមគោលការណ៍ពួកគាត់បង់រំលស់ប្រាក់ថ្លៃទិញផ្ទះនោះរយៈពេល២៥ឆ្នាំ ហើយចាប់ពីឆ្នាំដំបូងដល់ឆ្នាំទី៣ការប្រាក់០,៨៤% និងចាប់ពី៣ឆ្នាំឡើងទៅការប្រាក់១,៣% ហើយពួកគាត់ខ្លះត្រូវបង់ជិត១ពាន់ដុល្លារឯណោះ ។ មិនតែប៉ុណ្ណោះក្រុមហ៊ុននេះបានតម្រូវឲ្យបង់២បែបគឺទី១,បង់ជាកញ្ចប់ឆ្នាំដោយក្នុង១ឆ្នាំពី៥,០០០ដុល្លារទៅ៦,០០០ដុល្លារ ប៉ុន្តែបានតែការសុទ្ធអត់បានរំលស់ដើមទេ ចំណែកទី២,បង់ជាខែ ដោយក្នុង១ខែ២៩៧ដុល្លាររយៈពេល៣ឆ្នាំ ក្នុងនោះបានរំលស់ប្រាក់ដើមតែ២៨ដុល្លារក្នុង១ខែប៉ុណ្ណោះ ក្រៅពីនេះប្រាក់ការទាំងអស់ ។ ផុតពី៣ឆ្នាំទៅការប្រាក់ក៏ឡើង ហើយលែងបង់២៩៧ដុល្លារទៀតដែរ គឺបង់កាន់តែច្រើនឡើងៗ ដែលកាលពីមុនទោះជាជួបការលំបាកខ្លះ តែពួកគាត់អាចរកប្រាក់បង់បាន ប៉ុន្តែពេលនេះសេដ្ឋកិច្ចធ្លាក់ចុះ រកលុយមិនបានបង់មិនគ្រប់ជួបការលំបាកខ្លាំងណាស់ ។
អ្នកទិញផ្ទះបុរីខាងលើបាននិយាយទៀតថា ក្រោយជួបការលំបាកពួកគាត់ក៏បានសុំការយោគយល់ និងស្នើរសុំជួបម្ចាស់បុរីដើម្បីរកដំណោះស្រាយតាមរយៈការបន្ធូរបន្ថយចំនួនបង់ខ្លះឬ ក៏សុំឲ្យមានការបង់បន្តតាមលទ្ធភាពក្នុងចំនួនសមរម្យណាមួយជាការឈ្នះឈ្នះទាំងអស់គ្នា ។ ប៉ុន្តែម្ចាស់បុរីមិនព្រមចេញមុខជួបដោះស្រាយនោះទេគឺបានគេចវេសរហូត ហើយផ្ទះណាគ្មាលុយបង់ត្រូវរឹបអូស ឬ បង់យឺតបង់អត់គ្រប់ ត្រូវកាត់ផ្ដាច់ទឹកនិងភ្លើងចោលមិនឲ្យប្រើប្រាស់ឡើយ ។ សម័យនេះទៅហើយ បើគ្មានទឹកនិងភ្លើងតើឲ្យពួកគាត់រស់នៅដូចម្ដេចម៉េចនិងកើតទៅ ? ទើបនៅថ្ងៃទី៧ ខែវិច្ឆិកា ឆ្នាំ២០២៤ ពួកគាត់ធ្វើការតវ៉ាជាលើកទី១ទាមទារលក្ខខណ្ឌខាងលើ ហើយពេលនោះម្ចាស់បុរីមិនចេញមកជួបពួកគាត់ឡើយ ។
ពួកគាត់បានប្រាប់បន្ថែមថា ខណៈនោះអាជ្ញាធរខណ្ឌកំបូលដឹកនាំដោយលោកអភិបាលរងខណ្ឌម្នាក់ចុះទៅជួបសម្របសម្រួលជាមួយពួកគាត់ ហើយក្រោយមកបានហៅតំណាងពួកគាត់ទៅដោះស្រាយនៅសាលាខណ្ឌកំបូល ប៉ុន្តែអ្វីដែលជាការខកចិត្ត ហើយក៏គ្មានលទ្ធផលនោះ គឺព្រោះតែខាងម្ចាស់បុរីមិនព្រមទៅចូលរួមដោះស្រាយឡើយ ។ រហូតមកដល់ព្រឹកថ្ងៃទី៣០ ខែវិច្ឆិកា នេះពួកគាត់បានធ្វើការតវ៉ាជាលើកទី២ទៀត ហើយលើកនេះពួកគាត់បានយកសំបកកង់រថយន្តជាច្រើនដើម្បីដុតធ្វើការតវ៉ា ។ ប៉ុន្តែខណៈហៀបនិងដុតទៅហើយ ស្រាប់តែលោកអភិបាលរងខណ្ឌកំបូលម្នាក់ទៀត ដឹកនាំកម្លាំងទៅរារាំង ហើយសន្យាថានិងព្យាយាមហៅម្ចាស់បុរីទៅជួបដោះស្រាយនៅសប្ដាហ៍ក្រោយទៀត ទើបពួកគាត់អត់ដុតកង់រថយន្តនោះនិងរំសាយ ។
ទាក់ទិនទៅនិងការតវ៉ានិងរៀបរាប់ពីសំណាក់ប្រជាពលរដ្ឋខាងលើនោះ កោះសន្តិភាពមិនអាចទាក់ទងសុំការបំភ្លឺពីម្ចាស់បុរីបានឡើយ៕
ចែករំលែកព័តមាននេះ