(ថៃ) ៖ បុរសម្នាក់នៅខេត្តប៉ាតានីដាច់ចិត្តសម្លាប់ក្រពើ ដែលខ្លួនចិញ្ចឹមតាំងតែតូចទាំងទឹកភ្នែក ព្រោះតែបារម្មណ៍ខ្លាចទឹកជំនន់ធ្វើឱ្យវារួចពីទ្រុងបង្ករគ្រោះថ្នាក់ និងបានយកសាច់ក្រពើនោះទៅធ្វើម្ហូបជូនកងទ័ពដែលកំពុងសង្គ្រោះអ្នកស្រុក ។ ដោយសារតែហានីភ័យនៃទឹកជំនន់នៅខេត្តប៉ាតានី ភាគខាងត្បូងប្រទេសថៃ ម្ចាស់ក្រពើមួយរូបបានសម្រេចចិត្តទាំងទឹកភ្នែក…
(ថៃ) ៖ បុរសម្នាក់នៅខេត្តប៉ាតានីដាច់ចិត្តសម្លាប់ក្រពើ ដែលខ្លួនចិញ្ចឹមតាំងតែតូចទាំងទឹកភ្នែក ព្រោះតែបារម្មណ៍ខ្លាចទឹកជំនន់ធ្វើឱ្យវារួចពីទ្រុងបង្ករគ្រោះថ្នាក់ និងបានយកសាច់ក្រពើនោះទៅធ្វើម្ហូបជូនកងទ័ពដែលកំពុងសង្គ្រោះអ្នកស្រុក ។
ដោយសារតែហានីភ័យនៃទឹកជំនន់នៅខេត្តប៉ាតានី ភាគខាងត្បូងប្រទេសថៃ ម្ចាស់ក្រពើមួយរូបបានសម្រេចចិត្តទាំងទឹកភ្នែក ទម្រាំដាច់ចិត្តលើកដៃប្រហារសត្វក្រពើមួយក្បាល ជាសត្វចិញ្ចឹមសំណព្វចិត្តដែលខ្លួនបានចិញ្ចឹមវាតាំងពីតូចទម្រាំងធំពេញវ័យ ដើម្បីបង្ហាញពីការទទួលខុសត្រូវចំពោះសង្គម ព្រោះទឹកជំនន់ហក់ឡើងខ្ពស់ ដោយគាត់ព្រួយបាម្ភពីសុវត្ថិភាពអ្នកស្រុកនៅក្នុងតំបន់នោះ ប្រសិនបើសត្វក្រពើរួចចេញពីស្រះចិញ្ចឹម។
ប្រភពពីសារព័ត៌មានសៅខធបានឱ្យដឹងថា នៅថ្ងៃទី២៩ ខែវិច្ឆិកា ឆ្នាំ២០២៤ បុរសម្ចាស់ក្រពើ ដែលជាប្រជាពលរដ្ឋរស់នៅក្នុងស្រុកយ៉ារីងខេត្តប៉ាតានី បានបង្ហោះរូបភាពសាកសពក្រពើរបស់ខ្លួន ដែលមានឈ្មោះថា អាបូ តាមរយៈគណនីហ្វេសបុករបស់ខ្លួន ដោយបានសរសេររៀបរាប់ក្នុងខ្លឹមសារថា៖ «RIP Abu និងកូនៗរបស់ឯង សូមឯងទៅកាន់សុគតិភព បើទឹកមិនលិចទេនោះ ឯងក៏មិនស្លាប់ដែរ ប៉ុន្តែការស្លាប់របស់ឯង គឺជាការលះបង់ដើម្បីសុវត្ថិភាពរបស់អ្នករាល់គ្នា។
អ្នកណាក៏ដោយដែលបានឃើញរឿងនេះ អោយខ្ញុំសូមចិត្តណា លោកអ្នកអាចបញ្ចេញមតិក្នុងន័យស្ថាបនា តែសូមកុំវាយប្រហារអី។ ដូចយើងដឹងហើយថា មនុស្សគ្រប់គ្នាសុទ្ធតែស្រឡាញ់សត្វចិញ្ចឹមរបស់ពួកគេ ព្រោះពួកគេបានចិញ្ចឹមវាតាំងពីតូចមកម្ល៉េះ ហើយរស់នៅស្និទស្នាលជាមួយគ្នាយូឆ្នាំ។ តែភ្លាមៗ ពួកវាបែជាត្រូវសម្លាប់ដោយដៃម្ចាស់របស់វាទៅវិញ ហើយជាការលះបង់ដ៏ធំធេង និងធ្វើវាសម្រាប់អ្នកស្រុក។ សាច់របស់អាបូ បានចូលទៅក្នុងពោះបងប្អូនទាហាន» ។
គេនៅចាំបានថា ការសម្រេចចិត្តដ៏លំបាក់របស់ម្ចាស់ក្រពើនៅក្នុងខេត្តប៉ាតានី ដោយសាតែវិបត្តិទឹកជំនន់ដ៏ធ្ងន់ធ្ងរ កំពុងវាយប្រហារភាគ ខាងត្បូងប្រទេសថៃ ក៏មិនខុសអីពីរឿងរ៉ាវរបស់ម្ចាស់កសិដ្ឋានចិញ្ចឹមក្រពើក្នុងខេត្តឡាំភូនកាលពីចុងខែកញ្ញាកន្លងទៅ ដែលកាលនោះភាគខាងជើងប្រទេសថៃជួបប្រទះនឹងវិបត្តិទឹកជំនន់ដែលបង្ករឡើងដោយព្យុះទីហ្វុងយ៉ាក់ជី។
យោងតាមសេចក្តីរាយការណ៍ពីសារព័ត៌មាន PBS នារសៀលថ្ងៃទី២៩វិច្ឆិកា បានឱ្យដឹងថា ដោយសារតែស្ថានភាពទឹកជំនន់ក្នុងខេត្តប៉ាតានីកាន់តែធ្ងន់ធ្ងរ ព្រោះតែភ្លៀងបន្តធ្លាក់ និងទឹកហូរចុះពីខេត្តយ៉ាឡាក្នុងបរិមាណច្រើន អភិបាលខេត្តប៉ាតានីបានប្រកាសបិទមន្ទីរពេទ្យ ៤កន្លែង និងដង្ហោយស្វែងរកការបរិច្ចាគអាហារហាឡាលស្ងួតដែលប្រឈមនឹងការខ្វះខាត។
ប្រភពីសារព័ត៌មាន The Nation ក៏បានធ្វើបច្ចុប្បន្នភាពថា មកដល់ថ្ងៃស្រុកនេះទឹកជំនន់នៅភាគខាងត្បូងបានសម្លាប់មនុស្សបួននាក់ និងជម្លៀសប្រជាជនជាង ២៤ម៉ឺនគ្រួសារនៅក្នុងតំបន់ធំៗនៃខេត្តចំនួន៧ ដែលត្រូវបានប្រកាសតំបន់គ្រោះមហន្តរាយ និង លើកទង់ជ័យអាសន្នពណ៌ក្រហម។
ការិយាល័យធនធានទឹកថៃ បាននិយាយថា គិតត្រឹមព្រឹកថ្ងៃសុក្រ មានភូមិយ៉ាងហោចណាស់ ២,៩៥៩ភូមិ និងទីប្រជុំជននៃស្រុក៧៨ នៅក្នុងខេត្តណៈខនស៊ីធម្មរាជ, ប៉ាថាឡុង, សាទុន, សងក្លា, ប៉ាតានី, យ៉ាឡា និងខេត្តណារ៉ាធីវ៉ាត់ នៅតែស្ថិតនៅក្រោមទឹកនៅឡើយ។
គួរកត់សម្គាល់ថា ដើម្បីឆ្លើយតបនឹងវិបត្តិទឹកជំនន់នាភាគខាងត្បូង លោកឧបនាយករដ្ឋមន្ត្រី Anutin Charnvirakul រដ្ឋមន្ត្រីក្រសួងមហាផ្ទៃថៃ នៅព្រឹកថ្ងៃទី២៩ ខែវិច្ឆិកា បានចុះទៅដល់ខេត្តNarathiwat ដើម្បីដឹកនាំប្រតិបត្តិការជួយសង្គ្រោះដោយផ្ទាល់។ លោករដ្ឋមន្ត្រី បានបង្ហាញពីកង្វល់របស់រដ្ឋាភិបាល ដោយសង្កត់ធ្ងន់លើសារៈសំខាន់នៃការដោះស្រាយការរំខាននៃការផ្គត់ផ្គង់អាហារសម្រាប់ជនរងគ្រោះដោយទឹកជំនន់។ អភិបាលខេត្តនៃបណ្តាខេត្តរងគ្រោះទាំងអស់ ត្រូវបានណែនាំឱ្យអនុវត្តវិធានការជាបន្ទាន់ដើម្បីជួយដល់សហគមន៍ដែលរងគ្រោះ៕
ចែករំលែកព័តមាននេះ