សង្គ្រាមរវាងក្រុមហាម៉ាស់ និងអ៊ីស្រាអែលធ្វើឱ្យប៉ះពាល់សេដ្ឋកិច្ចនៅក្នុងតំបន់មជ្ឈិមបូព៌ា។ ខាងលើនេះជាការលើកឡើងរបស់ប្រធានមូលនិធិរូបិយវត្ថុអន្តរជាតិ (IMF)។ លោកស្រីយល់ថាស្ថានភាពសេដ្ឋកិច្ចពិភពលោកកំពុងជួបនឹងភាពផុយស្រួយស្រាប់ទៅហើយ ហើយថែមវិបត្តិនៅអ៊ីស្រាអែល និងហ្កាហ្សាមួយទៀត។ ដូចនេះ វារឹតតែបង្កបញ្ហា ឬទុក្ខជាន់លើទុក្ខ។…
សង្គ្រាមរវាងក្រុមហាម៉ាស់ និងអ៊ីស្រាអែលធ្វើឱ្យប៉ះពាល់សេដ្ឋកិច្ចនៅក្នុងតំបន់មជ្ឈិមបូព៌ា។ ខាងលើនេះជាការលើកឡើងរបស់ប្រធានមូលនិធិរូបិយវត្ថុអន្តរជាតិ (IMF)។ លោកស្រីយល់ថាស្ថានភាពសេដ្ឋកិច្ចពិភពលោកកំពុងជួបនឹងភាពផុយស្រួយស្រាប់ទៅហើយ ហើយថែមវិបត្តិនៅអ៊ីស្រាអែល និងហ្កាហ្សាមួយទៀត។ ដូចនេះ វារឹតតែបង្កបញ្ហា ឬទុក្ខជាន់លើទុក្ខ។
លោកស្រីសូមឱ្យក្រឡេកមើលស្ថានភាពសេដ្ឋកិច្ចនៅប្រទេសជិតខាងអ៊ីស្រាអែលដូចជាអេហ្ស៊ីប លីបង់ ហ្សកដង់។ល។ គេអាចមើលឃើញថាផលប៉ះពាល់ចាប់ផ្ដើមកើតឡើងជាបណ្ដើរៗហើយ។ លោកស្រីគ្រីស្ទីណា ចចជីវ៉ា (Kristalina Georgieva) ថ្លែងដូចនេះនៅក្នុងវេទិកាស្ដីពីគម្រោងវិនិយោគអនាគតដែលរៀបចំឡើងនៅរាជធានីរីយ៉ាត ប្រទេសអារ៉ាប៊ីសាអូឌីត។
មូលនិធិរូបិយវត្ថុអន្តរជាតិខ្វាយខ្វល់អំពីការបាត់បង់ជីវិតមនុស្សនៅតំបន់ដែលកំពុងផ្ទុះសង្គ្រាម ហើយក៏បារម្ភអំពីទំហំនៃការខូចខាត និងការថយចុះសកម្មភាពធ្វើអាជីវកម្មដោយសារជម្លោះនេះ។ ព្រឹត្តិការណ៍ដែលកំពុងកើតឡើងនៅតំបន់នេះកើតឡើងចំពេលដែលសេដ្ឋកិច្ចកំពុងដើរយឺត, អត្រាការប្រាក់បញ្ញើត្រូវដំឡើងខ្ពស់ និងការសងបំណុលក៏ហក់ឡើងខ្ពស់។ បញ្ហាទាំងអស់បង្កឡើងដោយវិបត្តិកូវីដ១៩ និងសង្គ្រាម។ នេះបើតាមការលើកឡើងរបស់ប្រធានមូលនិធិរូបិយវត្ថុអន្តរជាតិ។
ក្រុមហាម៉ាស់វាយប្រហារដ៏គួរឱ្យភ្ញាក់ផ្អើលកាលពីថ្ងៃទី៧ ខែតុលា ដោយបានសម្លាប់មនុស្ស១៤០០នាក់ និងចាប់មនុស្ស២២០នាក់ធ្វើជាចំណាប់ខ្មាំង។ ជាកិច្ចឆ្លើយតប, អ៊ីស្រាអែលទម្លាក់គ្រាប់បែកទៅលើតំបន់ហ្កាហ្សា និងបិទខ្ទប់តំបន់នេះទាំងផ្លូវទឹក ផ្លូវគោក និងផ្លូវអាកាស។ យុទ្ធនាការទម្លាក់គ្រាប់បែកទៅលើមូលដ្ឋានរបស់ក្រុមហាម៉ាស់ក៏បានប៉ះពាល់អាយុជីវិតរបស់ជនស៊ីវិល និងធ្វើឱ្យចំនួនអ្នកស្លាប់នៅហ្កាហ្សាកើនឡើងដល់ជាង៦ពាន់នាក់។ នេះបើយោងតាមក្រសួងសុខាភិបាល។
ការថ្លែងរបស់ប្រធានមូលនិធិរូបិយវត្ថុអន្តរជាតិធ្វើឡើងបន្ទាប់ពីក្រុមអ្នកវិភាគសេដ្ឋកិច្ចរបស់សារព័ត៌មានវ៉លស្ទ្រីតជើណល (Wall Street Journal) ថ្លែងនៅក្នុងវេទិកានោះថាសង្គ្រាមអ៊ីស្រាអែល និងហាម៉ាស់អាចនឹងបង្កការខូចខាតយ៉ាងធ្ងន់ធ្ងរចំពោះសេដ្ឋកិច្ចពិភពលោក។ ជាពិសេស នៅពេលដែលសង្គ្រាមនេះរីករាលដាលទៅដល់ប្រទេសដទៃទៀត។
យោងតាមលោកស្រីចចជីវ៉ា, គេអាចមើលឃើញថាស្ថានភាពពិភពលោកដែលចុះដុនដាបស្រាប់ទៅហើយ នឹងចុះដុនដាបបន្ថែមទៀត។ នៅលើពិភពលោក, សេដ្ឋកិច្ចប្រទេសខ្លះពឹងផ្អែកទៅលើប្រាក់ចំណូលពីវិស័យទេសចរណ៍។ នៅពេលស្ថានភាពមិនសូវស្រួលបែបនេះ វាធ្វើឱ្យអ្នកទេសចរខ្លាចរអា លែងចង់កម្សាន្តនៅប្រទេសដទៃ។ នេះគ្រាន់តែជាការរៀបរាប់ត្រួសៗអំពីហានិភ័យសេដ្ឋកិច្ចដែលប្រទេសខ្លះនៅក្នុងតំបន់នឹងជួបប្រទះ។ គេមិនទាន់គិតទៅដល់ហានិភ័យលម្អិតជាងនេះផង។
លោកស្រីថ្លែងថាក្រុមអ្នកវិនិយោគនឹងមានអារម្មណ៍អល់អែកនៅក្នុងការទៅបណ្ដាក់ទុននៅប្រទេសទាំងនោះ។ បើអ្នកចង់ដឹកជញ្ជូនទំនិញ, អ្នកត្រូវចំណាយកាន់តែច្រើនទៅលើថ្លៃធានារ៉ាប់រង។ ប្រទេសទាំងនោះអាចនឹងមានជនភៀសខ្លួនរត់ទៅជ្រកកោនកាន់តែច្រើន ខណៈដែលពួកគេ (ប្រទេសទាំងនោះ) ចាប់ផ្ដើមទទួលជនភៀសខ្លួនច្រើនស្រាប់ទៅហើយនោះ៕
ប្រភព៖ Al Jazeera
https://www.aljazeera.com/news/2023/10/25/israel-hamas-war-already-affecting-regional-economies-imf-head
ចែករំលែកព័តមាននេះ